Սեփական տանը՝պատանդ-տնվորի կարգավիճակում․ԱՀ ԱԺ նախկին պատգամավոր Արզիկ Մխիթարյան

Արդեն 9-րդ օրն է չի հաջողվում հեռացնել Լաչինի միջանցքը փակած ադրբեջանցի «բնապահպան ակտիվիստներին» ու վերականգնել Արցախ-Հայաստան կապը:  Ի՞նչ է իրականում տեղի ունենում, ի՞նչ աշխարհաքաքաղաքական խաղ է թաքնված եւ ինչպե՞ս է Արցախցին դիմակայում օր-օրի ահանգնացող մարտահրավերներին այս եւ օրախնդրային այլ հարցերի շուրջ զրուցել ենք Արցախի խորհրդարանի նախկին պատգամավոր, ԱԺ արտաքին հարաբերությունների հանձնաժողովի նախկին նախագահ Արզիկ Մխիթարյանի հետ, ով նախ արձանագրեց հետեւյալը․

-Գաղտնիք չէ, որ գերտերությունները մութ գործարքների մանրադրամ են դարձրել Արցախը և մեր արդարամիտ, հայրենապաշտ ու խիզախ ժողովուրդը հայտնվել է անլուծելի թվացող դիլեմայի առաջ։ Երևույթների մի այնպիսի խառնաշփոթ են առաջացրել այդ մութ ուժերը, որ հաճախ տրամաբանությունն ու նույնիսկ քաղաքագիտական գիտելիքները բավարար չեն հասկանալու իրերի իրական դրությունը։ Վարպետորեն ստեղծել են դեպքերի ու երևույթների այնպիսի կոնգլոմերատ, որ ժողովուրդն ակամայից իր դժգոհության վեկտորը մե՛կ ուղղում է դեպի Թուրքիա ու Ադրբեջան, մե՛կ դեպի արևմուտք, մե՛կ դեպի Ռուսաստան և հաճախ էլ սեփական երկրի իշխանավորներին ու ընդիմադիրներին։ Արցախցիները կասկածում են ամենքին, կասկածում են ցանկացած իրողության, որոնց տեսանելի կողմը մի բան է, խորքայինը՝ այլ։ Ցավալի վիճակ է՝ սեփական երկրում հայտնվել ենք պատանդ-տնվորի կարգավիճակում, իսկ «տանտերերի» շքերթն էլ կանգ չի առնում նոր խարդավանքների առաջ։

Ամենաահավորը, սակայն, «պալատական» խարդավանքն է, որի մասնակիցների փաղանգի վերջը տեսանելի չէ։ Ափսո՜ս, հազար ափսոս, որ ի դերև արեցին մեր ժողովրդի արդար զավակների՝ հայդուկ, ֆիդային, ազատամարտիկ, զինվորական, հրամանատար ու գեներալ անհատների վաստակը։ Իսկ Արցախյան Էլիտան՝ ազնվագույն մտավորականությունը պարզապես ցնցված ու ըմբոստության մեջ է…

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝