ՀՀ իշխանություն կոչվածները ժամ առաջ պետք է գնան, այսօր մենք ուղղակի անբարոյականության շքերթի ենք մասնակցում.Տավուշի թեմի առաջնորդ

Ես չէի պատկերացնում, որ 2020թ․-ին նոյեմբերի 9-ի խայտառակ կապիտուլյացիոն փաստաթուղթը կունենանք, ես այ դա՛ երբեք չէի կարող պատկերացնել, այլապես  մնացածը ուղղակիորեն դրա հետեւանքն է>>,- այսպես պատասխանեց Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանը, հարցին, թե երբեւէ կպատկերացնե՞ր որ Արցախ հասնելու համար պետք է մնանք թշնամու բարեհաճության հույսին։
Ապա անդրադառնալով Արցախում առկա իրավիճակին Սրբազան հայրը փաստում է․
-Ստեղծված իրավիճակի միակ պատասխանատուն ՀՀ ԻՇԽԱՆՈՒԹՅՈՒՆՆԵՐՆ ԵՆ, այսօրվա ղեկավարը իր ողջ քաղաքական թիմով։ Անիմաստ ճամարտակություններով  պատասխանատվությունը սրա-նրա վրա թող չգցեն, ո՛չ ռուսների, ո՛չ ամերիկացիների, ոչ էլ մեկ ուրիշի։Ինքն է ստորագրել նոյեմբերի 9-ի փաստաթուղթը,  ինքն էլ կրում է կատարվածի ողջ պատասխանատվությունը։ Ո՛չ Արցախի հանրապետության նախագահը կամ որեւէ պաշտոնյա է ստորագրել, ո՛չ էլ ռուս խաղաղապահ զորամակազմի ղեկավարը, ոչ էլ չգիտեմ ով։ Փաստաթուղթը ստորագրված է ՀՀ վարչապետի ձեռքով, հետեւաբար ինքն էլ երաշխավորն ու պատասխանատուն է այս ողջ իրադարձությունների, եւ դրանից բխող հետեւանքների համար։ 
Այսօր, երբ այս իշխանական թեւի ներկայացուցիչները, հազար ու մի անունով ու դեմքով, անդիմագիծ, անինքնություն խոսում են, թե ռուս խաղաղապահների պատասխանատվության շրջագծում է գտնվում խնդիը, ուղղակիորեն ստում են։ Որովհետեւ կրկնում եմ իրենց ղեկավարն է ստորագրել նոյեմբերի 9-ի փաստաթուղթը, ինչը նշանակում է, որ իրենք էլ երաշխավորն են Արցախի հանրապետության բնակչության խաղաղ, կամ գոնե հիմա անվտանգ կյանքի։ Պատասխանատվությունը ուրիշների վրա նետելն ամենամեծ հանցագործությունն է։
-Սրբազա՛ն, բայց մենք տեսնում ենք, որ ՀՀ իշխանությունները առիթը բաց չեն թողնում ասելու, որ նրանք, այսպես ասած, ձեռքերը լվացրել են Արցախից, հետեւաբար, որն՞ եք տեսնում ելքը։
-ՀՀ իշխանություն կոչվածները ժամ առաջ պետք է գնան, այսօր մենք ուղղակիորեն անբարոյականության շքերթի ենք ականատես լինում։ Ես ինքս ինձ անընդհատ հարցնում եմ, թե ե՞րբ է գալու այս մարդկանց պատասխանատվությունը  ստանձնելու ժամանակը ինչ-որ արարքների համար, որտեղի՞ց է սկսելու, ո՞ր կետից։ Այս մարդիկ կառավարում են առանց պատասխանատվություն կրելու, դրա համար էլ ասում եմ՝ անբարոյականության շքերթի մեջ ենք հիմա։ Ե՞րբ են ասելու որ այս կետից սկսած մենք ենք պատասխանատու, բոլորը մեղավոր ու պատասխանատու են բացի իրենք: 

Վերջում Սրբազանը դիմելով արցախահայերին ասաց․

-Մենք դեկտեմբերի 16-ին Տավուշից մի խումբ հոգեւորականներով, ուխտավորներով մեկնելու ենք Արցախ ուխտագնացության, մասնակցելու Սուրբ Հակոբի տոնին։ Մենք ընկճվելու տեղ չունենք, այ՛ո, վրդովվում ենք եւ ափսոսում այն ամեն ինչի համար, որը այս ընթացքում կորցրել ենք, բայց չենք ընկճվում։ Մենք մեր զորակցությունն ենք հայտնում Արցախում ապրող մեր սիրելի քույրերին եւ եղբայրներին, առավել քան համոզված եմ, որ այս դժվարություններն էլ կանցնեն եւ մենք վերստին կվերադառնանք մեր բնականոն կյանքին՝ հաղթանակների բերկրանքով։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝