Իսկ գուցե ինչ-որ կրոնական ծեսի արդյո՞ւնք էր Պեմզաշենի սպանությունը. Ինչ թաքնված պատվիրատուններ կարող են ի հայտ գալ

Պեմզաշենում մոր և երկու երեխաների առանձնակի դաժանությամբ սպանության գործով կալանավորված 32-ամյա Վրույր Բարսեղյանը կարող է անմեղսունակ ճանաչվել ու խուսափել պատժի կրումից։ «Եթե անգամ հանցագործն անմեղսունակ ճանաչվի, չի ազատվի պատժից», -այս մասին Հանրայինի եթերով հայտարարել է վերը նշված գործով քննչական խմբի ղեկավար Նարեկ Գարեգինյանը: Այս հարցի եւ սպանության հնարավոր շարժառիթների մասին զրուցել ենք  աղմկոտ գործերով հայտնի փաստաբան Լեւոն Բաղդասարյանի հետ, ով նախ նկատեց.

-Նախ արձանագրենք, որ հանցագործության այդ տեսակը նորությունն էր ՀՀ-ի համար, ի տարբերություն հարեւան այլ երկրների: Ինչ վերաբերում է անձի անմեղսունակությանը, ապա եթե հաստատվի, որ տվյալ անձը հանցագործություն կատարելու ընթացքում գտնվել է անմեղսունակ, ապա վերջինս ազատվում է պատժի կրումից եւ տեղափոխվում հոգեբուժարան հարկադիր բուժման:

Ես ցանկանում եմ անդրադառնալ մեկ այլ կարեւոր հանգամանքի եւս, շատ հաճախ առերեւույթ կատարված հանցագործություններին շատ պրիմիտիվ իրավական գնահատական է տրվում: Մինչդեռ բոլոր վարկածները քննելուց հետո է միայն վարույթն իրականացնող մարմինը պարտավոր է դիտարկել եւ նոր միայն հրապարակել վերջնական պաշտոնական հայտարարություն: Եթե վերցնում ենք, որ տվյալ դեպքում անմեղսունակ անձն է նման հանցանք կատարել, իսկ ո՞վ է բացառում, որ անձի հետեւում կանգնած չեն եղել այլ պատվիրատուններ, որոնք հատուկ են այդ անմեսունակին «դրդել» նման սարսափազդու հանցանքի: Ակնհայտ է, որ վարույթն իրականացնող մարմինները պետք է կատարեն օպերատիվ հետախուզական լուրջ աշխատանքներ, որպեսզի հասկանան նման հանցանքի իրական պատճառը, իսկ միգուցե սա կրոնական ծիսակատարությունն էր, գուցե վրեժի՞ արդյունք է, տարբերակները կարող են շատ լինել: 

Ուստի, վարույթն իրականացնող մարմնի սուրբ պարտականությունն է, որպեսզի իրենք կարողանան ջրի երես հանել նման հանցանքի իրական դրդապատճառները: Ամփոփելով խոսքս, վաղաժամ եմ համարում հայտարարել, որ հանցագործությունը բացահայտված եւ բոլոր հանցագործները հայտնաբերված, միեւնույն ժաման չեմ ասում, որ այս ամենի տակ կան թաքնված այլ ուժեր, բայց վարույթն իրականացնող մարմինը պարտավոր է դիտարկել բոլոր հնարավոր վարկածները:

Հիշեցնենք,որ նոյեմբերի 8-ին Պեմզաշենում սարսափելի դեպք էր տեղի ունեցել:Տանը հայտնաբերվել էր մոր և 2 անչափահաս երեխաների դիերը: Սպանության գործով կա 2 ձերբակալված՝ Վրույր Բարսեղյանը և վերջինիս հորեղբոր որդին՝ Արկադի Բարսեղյանը:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝