Մեր մշակութային կյանքում քաոս է. ՄԱՎՐ ՄԿՐՏՉՅԱՆ

«Իրավունքը» զրուցել է ժողովրդական երգիչ ՄԱՎՐ ՄԿՐՏՉՅԱՆԻ հետ:

— Նոր նախագիծ եք սկսել, որտեղ ներկայացնելու եք հայ դասական գանձարանից երգեր: Այսօր որքանո՞վ է մեր հասարակությունը լսում բարձրաճաշակ երգեր:

— Այս նախագծի մասին արդեն երկար ժամանակ է մտածում էի, ու երեւի հիմա էր այդ ժամանակը, որ պետք է սկսեի, մի քանի հանգամանքներից ելնելով… եւ արդեն ապագայում այն կփորձեմ համերգային դարձնել: Իսկ ինչ վերաբերում է հասարակության լսելուն կամ պահանջին, կան ինձ համար շատ սկզբունքային պահեր, որ ես դրան չեմ նայում, ես կարծում եմ, որ բացի հասարակության պահանջին ենթարկվելուց, պետք է նաեւ հասարակությանը պարտադրել լավը եւ ազգայինը: Ու այնպես չի, որ մեր ներկայիս հասարակությունը չի լսում, կամ պետք չեն նման երգեր, հակառակը` այսօր առավել քան ազգայինը եւ բարձր մշակույթը օդի ու ջրի պես պետք են մեզ, մեր հասարակությանը:

— Երաժշտական ճաշակի խեղաթյուրումը, որ այսօր շատ է մեր իրականության մեջ, ըստ Ձեզ, ինչի՞ հետեւանք է:

— Այո, շատ է, որովհետեւ ոչ մեկ իր տեղում չի, լավի ու վատի գիտակցումը դարձել է հարաբերական, եւ կեղծ հասարակական պահանջի տակ պրոպագանդվում եւ մատուցվում է վատը: Եվ ամենագլխավոր պատճառը՝ նվիրյալների պակասն է մեր մշակույթի մեջ:

— Այսօր հիմնականում ո՞ր ժանրն է ավելի շատ պահանջված:

- Որպես այդպիսին, այսօր չկա գերակա ժանր, մեր մշակութային կյանքում քաոս է:

— Կա՞ Ձեր կողմից ամենաչընդունված երաժշտական ժանրը:

— Որպես ժանր չկա, բայց չեմ կարողանում ընդունել ու հասկանալ պրիմիտիվ ու լացող երգի իմաստը:

— Ո՞ր տարիքից պետք է երեխաների մոտ երաժշտական ճաշակ դաստիարակել:

— Օրորոցից, անգամ դեռեւս չծնված: Փոքր երեխան շատ ավելի ընկալունակ է ու նուրբ է երաժշտական ընկալունակության մեջ, քան մենք կարծում ենք: Ճիշտ երաժշտական դաստիարակությունը փոքր տարիքից անհատականություն ու բնավորություն է կերտում երեխայի մեջ:

— Երբ նայում եք շուրջբոլորը, ի՞նչը Ձեզ դուր չի գալիս մեր իրականության մեջ:

— Շատ բաներ, բայց ավելի շատ մեր հասարակության երկբեւեռությունն ու հոգեւոր եւ ազգային արմատից կտրված լինելը:

— Դեկտեմբերին Հայաստանում անցկացվելու է «Մանկական Եվրատեսիլը», ինչպիսի՞ վերաբերմունք ունեք առհասարակ միջազգային այս մրցույթի նկատմամբ:

— Շատ դրական, հետաքրքիր նախագիծ է իր ֆորմատով՝ չնայած լինելով հիմնականում քաղաքական շոու ծրագիր: Եթե կարելի է այսպես ասել, իրեն ճիշտ օգտագործելու դեպքում, շատ դրական ու օգտակար արդյունք կարելի է ունենալ: Գրեթե միշտ հետեւել եմ:

— Մեր այս տարվա մասնակցի մասին ի՞նչ կարծիք ունեք:

— Էլի շատ դրական, պոզիտիվ ու մրցունակ երգ ու մասնակից ունենք այս տարի, բայց ինձ համար բացակայում է մի բան, ազգային տարրը: Սա եզակի նախագիծ է իր մասշտաբով, որ կարելի է աշխարհին ավելի ճիշտ ու ազգային հայի տեսակ ցույց տալ, իսկ մենք հիմնականում դա չենք արել ու չենք էլ փորձում անել…

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝