Ռուբեն Վարդանյանի դեմ ուղղված ֆիզիկական սպառնալիքների, Արցախի առաջնահերթ մարտահրավերների եւ Արցախը հայկական պահելու հրամայականի մասին. ԱՀ պետնախարարի խորհրդականի առաջին զրույցը

Ալիեւի` արցախահայությանը ուղղված սպառնալիքների, Ադրբեջանում` Ռուբեն Վարդանյանի նշանակումից հետո առաջացած հիստերիայի եւ Արցախը հայկական պահելու հրամայականի մասին զրուցել ենք Արցախի հանրապետության պետական նախարար Ռուբեն Վարդանյանի խորհրդական ՆԱՐԻՆԵ ԱՂԱԲԱԼՅԱՆԻ  հետ:

-Տիկին Աղաբալյան, որպես պետնախարար Ռուբեն Վարդանյանի խորհրդական, խնդրում ենք առանձնացնել երեք կարեւոր առաջնահերթություններ, որոնք անհրաժեշտ են Արցախի զարգացման եւ առկա մարտահրավերներին դիմակայելու համար:

-Արցախի Հանրապետության պետական նախարար Ռուբեն Վարդանյանը նոյեմբերի 9-ին՝ Արցախի Հանրապետության կառավարությունում հրավիրված ընդլայնված խորհրդակցության ժամանակ հստակ նշել է 2020թ. պատերազմից հետո ստեղծված իրավիճակում Արցախի համար կարեւորագույն առաջնահերթությունները: Դրանք են՝ Արցախի սուբյեկտայնության բարձրացման, անվտանգության ապահովման խնդիրները, սոցիալ-տնտեսական և մշակութային զարգացումը: Մյուս բոլորը խնդիրները ածանցյալ են: Ինքս կիսում եմ այս համոզմունքը եւ պատիվ ունեմ Ռուբեն Վարդանյանի թիմում իմ մասնակցությունն ունենալ այս առաջնահերթությունների իրագործմանը:

-Տիկին Աղաբալյան, հայտնի է, որ ադրբեջանական լրատվամիջոցներում մեծ աղմուկ է բարձրացրել Ռուբեն Վարդանյանի՝ Արցախի պետնախարար նշանակվելու լուրը, անգամ բացահայտ սպառնալիքներ են հնչեցվել նրա հասցեին: Ըստ Ձեզ, ինչո՞վ է պայմանավորված ադրբեջանցիների այդչափ վախը ԱՀ պետնախարարից:

-Հավանաբար, պարոն Վարդանյանի կերպարը, անցած ճանապարհը, նրա ունեցած միջազգային կապերն ու հնարավորությունները լրջորեն անհանգստացրել են Ադրբեջանին, որը փորձում է Արցախի հիմնախնդիրը «լռեցնել» ու «փակել», ակնկալելով, որ միջազգային հանրությունը մոռանա այդ խնդրի մասին: Իսկ Ռուբեն Վարդանյանի ասպարեզ գալը, այդ ֆոնին Արցախի մասին հրապարակումները նաև միջազգային մամուլում, Արցախի շուրջ համախմբման նոր շարժման գեներացումը իրապես խափանում են Ադրբեջանի պլանները:

Ռուբեն Վարդանյանի անձի դեմ ուղղված ֆիզիկական սպառնալիքները ոչ այլ ինչ են, քան Ադրբեջանի՝ հայատյացության, ցեղասպան էության եւ ահաբեկչական վարքագծի հերթական դրսեւորում: Եվ այսօրինակ արձագանքը հստակ ցույց է տալիս, թե ինչու Արցախը չպիտի լինի Ադրբեջանի կազմում:

-Եվ վերջում, Ալիեւը շարունակում է պնդել, որ արցախահայությունը այլեւս Ադրբեջանի բնակիչներ են եւ, որ այդ փաստի հետ պետք է հաշտվեն արցախահայերը։ Որպես արցախցի, հայ կին, ով ուրույն ներդրումն ունի Արցախի կայացման գործում, որն՞ է Արցախը հայկական պահելու Ձեր բանաձևը:

-Արցախը հայկական պահելու մե´կ բանաձեւ կա՝ ՏԵՐ ԿԱՆԳՆԵԼ ԱՐՑԱԽԻՆ. չլքե´լ, չհրաժարվե´լ, չհանձնվե´լ: Ամուր կառչած մնալ հազարամյակների տարիք ունեցող հայկական արմատներին, հավատալ սեփական ուժին ու վերընձյուղվել: Անկախ նրանից, թե ինչ են բարբաջում կամ երազում ալիեւները...

Զրույցը` ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝