Երեւանի գլխավոր տոնածառի լույսերը կվառեն «Մանկական Եվրատեսիլ 2022»-ի մասնակիցները

Հայաստանը պատրաստվում է դեկտեմբերի 11-ին Մարզահամերգային համալիրում կայանալիք «Մանկական Եվրատեսիլ 2022» երգի մրցույթին: Ինչպես արդեն հայտնել ենք, այս տարվա մեր պատվիրակը 14-ամյա Նարե Ղազարյանն է:

Նարեի եվրատեսիլյան երգը շուտով հոլովակ կունենա եւ կներկայացվի հանդիսատեսին: Հեղինակը երգչուհու պրոդյուսերն է՝ Գրիգոր Կոկչյանը, գործիքավորումը Նիկ Էգիբյանն է իրականացրել:  

«Նրանք են ինձ խորհուրդ տվել մասնակցել մրցույթին: Խոստանում եմ լավ ներկայանալ ու մեծ սիրով իմ հրաշալի երկրի հետ ծանոթացնել մեր հյուրերին: Երգում եմ ութ տարեկանից. սովորել եմ Երգի թատրոնում, Արթուր Գրիգորյանի եւ Գրիգոր Կոկչյանի սանն եմ: Ես նաեւ պարում եմ, եւ բեմում ինձ հետ կլինի պարային խումբ»,- ասաց Նարեն՝ հավելելով, որ երգը ռիթմիկ է, իսկ պարուսույցը Հովհաննես Սարգսյանն է:

Մրցույթի կազմակերպչական աշխատանքների վերաբերյալ մամուլի ասուլիսի ժամանակ նա նաեւ պատմեց, որ իրեն շատ հետաքրքիր կերպով են հայտնել Հայաստանի պատվիրակը լինելու լուրը:

«Հանրայինից զանգեցին, ասացին, որ պետք է հարցազրույց վերցնեն՝ ինձ ճանաչելու համար: Եկա եւ հենց մտա սենյակ, ասացին՝ ես եմ հաղթել: Այդ պահին շատ շփոթված էի։ Սա ինձ համար մեծ հաղթանակ է: Յուրաքանյուր երգիչ կցանկանա պատվով ներկայացնել երկիրը, խոսք եմ տալիս՝ ես դա կանեմ»,- նշեց Նարեն:

Այս տարվա պատվիրակն ընտրվել է նախապես հայտարարված բաց մրցույթի արդյունքում, որին 100-ից ավելի հայտ էր ստացվել Հայաստանից եւ տարբեր երկրներից: Ժյուրին նախ ընտրել է 30 հոգու, որից հետո՝ հաղթողին:

Հանրայինի հաղորդակցության ղեկավար Աննա Օհանյանի դիտարկմամբ` շատերին հետաքրքրում է տոմսերի հարցը. «Տոմսերը կարժենան 5-30 հազար դրամ. այնպես է արվել, որ հասանելի լինի բոլորին: Երկրպագուները կարող են տոմսեր գնել եւ ներկա լինել նաեւ դեկտեմբերի 10-ին կայանալիք շոուին, որն ամբողջականությամբ ամսի 11-ի շոուն է, բայց նախատեսված է միայն ժյուրիի անդամների համար»:

Մրցույթի գործադիր պրոդյուսեր Դավիթ Ծերունյանը նշեց, որ Հանրապետության գլխավոր տոնածառի լույսերի վառման արարողությունը, որը նախատեսված է դեկտեմբերի 5-ին, վստահվել է «Մանկական Եվրատեսիլ»-ի մասնակիցներին:

https://bravo.am/news/76892

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝