«Թրքաքայլականների անապագա ապագան շուտով լրիվ ընկալելի կդառնա նույնիսկ հիպնոզի տակ հայտնված անմեղսունակներին».ԽԱՉԻԿ ՄԱՆՈՒԿՅԱՆ

«Իրավունքը» զրուցել է ՀԳՄ անդամ, գրող ԽԱՉԻԿ ՄԱՆՈՒԿՅԱՆԻ հետ:

— Պարոն Մանուկյան, վերջերս ասպարեզում քիչ եք երեւում, ի՞նչ նոր ծրագրեր ունեք:

— Որոշ տեխնիկական խնդիրների հետ էր կապված համացանցում քիչ հայտնվելս, որը շուտով կլուծվի բարեկամուհուս օժանդակությամբ: Ծրագրեր չէի ասի, պարզապես, ապրելաոճ է՝ չլռել, երբ ազգդ եւ Հայրենիքդ վտանգի առաջ են կանգնած: Այս ստախոս-շառլատան-խաբեբա իշխանությունների կողմից մեզ պատուհասված աղետները դեռ չեն սպառվել: Այս չարքապատկան գոյանքները մահվան գեներատորներ են եւ շարունակում են իրենց ավերիչ շունչը սփռել ամենուր: Պիտի կարողանանք արթնացնել եւ սթափության մղել մեր հանրությանը, պիտի կարողանանք հայոց հին եւ նորօրյա քաջերի ոգեղեն ուժն ու պատգամները հաղորդել մեր ժողովրդին, հակառակ դեպքում՝ պատմության դռները կփակվեն մեր առջեւ:

— Նոր գիրք առաջիկայում լինելո՞ւ է:

— Իհարկե, լինելու է: Հավանաբար, եկող տարվա հունվարին լույս կտեսնի 44-օրյա պատերազմում հերոսացած Վաչագանին եւ մյուս քաջերին նվիրված «Անմահականս» բանաստեղծություններիս ժողովածուն:

— Ապագայի տեսլականում ինչպե՞ս եք պատկերացնում թուրքի հետ խաղաղության պայմանագիր կնքելը:

— Այնպես, ինչպես նախկինում է եղել՝ Զոհրապին, Սիամանթոյին, Վարուժանին, մյուս մեր երեւելիներին՝ խոշտանգելով, գլուխները ջարդելով, կանանց մորթոտելով, ինչի ականատեսը մենք էլ եղանք մեր օրերում... Թրքաքայլականների անապագա ապագան շուտով լրիվ ընկալելի կդառնա նույնիսկ հիպնոզի տակ հայտնված անմեղսունակներին:

— Մի՞թե հայի համար ապագա կարող է լինել թուրքի հետ:

— Կարող է լինել, իհարկե, կարող է լինել, երբ հայն իր հավաքական ուժը գոյացնելով, այնպիսի երկիր ստեղծի, երբ բանակն ու տնտեսությունը, գիտությունն ու մշակույթը գերազանցի այդ քոչվորների ունեցածին, եւ դրանք, իրենց սովորության համաձայն, կգան համբուրելու հզորի ձեռքերը: Իսկ այն քաղաքականությունը, որը հիմա է տարվում այս լրտեսախմբի եւ դրանց հարող դիլետանտների կողմից՝ վիշապի երախն ինքնակամ մղվելու է նման:

— Արդեն երկու տարի է անցել 44-օրյա պատերազմից: Այս երկու տարվա մեջ որեւէ բան արվե՞լ է՝ մեր բանակը ինչ-որ չափով բարելավելու համար:

— Սրանց համար բանակն արժեք չէ՝ դատելով ներկայացրած իրենց բնորոշմամբ՝ բարեփոխումներից: Միայն այն հանգամանքը, որ գումարով կարող են ազատվել զինվորական ծառայությունից, շրջանցում է Հայրենիքի հանդեպ պարտավորություններն ու սակարկելի դարձնում անքննելի սրբությունները: Երկիրը բացահայտորեն հանձնում են կողոպտիչ, թալանչի, անազգ, անգաղափար վաշխառուներին: Տուր համապատասխան գումարն ու գնիր ամեն ինչ: Անբարոյականության տիրականությունը մեզանում բացահայտորեն հաստատվում է, եւ ոչ մի ընդվզում կամ պայքար նկատելի չէ: Սրանք ոչ միայն Շուշին, այլեւ ողջ Հայաստանն են գորշ համարում:

— Այսօր քննարկում են համույթներ, ինստիտուտներ միավորելու հարցը, մի՞թե դա է մեր երկրի համար ամենակարեւոր խնդիրը:

— Երկիրը կործանման տանողների համար, իհարկե, դա է՝ քանդել, ավերել, մարդկանց կարեւորագույն նախապատրաստումներից շեղել եւ, կառուցողական իմիտացիաներ բանեցնելով՝ կործանել ամեն ինչ:

— Ի՞նչ կասեք այն պասիվ Ձեր գրչակից ընկերների մասին, որոնք բառ անգամ չեն ասում երկրում կատարվող իրադարձությունների մասին եւ թաքնվում են իրենց գրչի ետեւում:

— Նախ՝ գրիչ պիտի ունենան, որ ետեւում թաքնվեն: Ձեր նշածները գետնաքարշ միջակություններն են, որոնք այսպահական գոյանքներ են եւ արժեքավոր ոչինչ չեն ստեղծել: Անկարողների այդ խմբուլիկը շատ ներդաշնակ է շառլատանների փալասախմբին: Իմ ընկերները պայքարի մեջ են՝ Գագիկ Սարոյանը, Գուրգեն Խանջյանը, Գայանե Փայտյանը... Եվ Գրողների միության նախագահ Է. Միլիտոնյանն էլ մշտապես իր մտահոգությունները հայտնելով, վերլուծելով իրավիճակը, դիտարկումների արդյունքում՝ մթնոլորտն առողջացնելու առաջարկություններ է անում:

— Նոյեմբերի 8-ին լրանում է Ձեր տղայի՝ 44-օրյա պատերազմի հերոս Վաչագան Մանուկյանի պատերազմում հերոսաբար զոհվելու 2-րդ տարին: Երբ հետադարձ հայացք եք նետում, ինչպիսի՞ն եք նրան հիշում:

— Հարգելի Նունե Զաքարյան, Վաչագանը միշտ ինձ հետ է՝ ուժեղ, խելացի, աննահանջ, հաղթական, նա անմահական է…

— Վաչագանի եւ մեր քաջերի արյամբ ներկված հողում այսօր ադրբեջանցին է տիրում, ոչնչացնում է մեր մշակութային արժեքները, պղծում: Ի՞նչ կասեք այս ցավալի փաստի մասին:

— Կգան ազնվազարմ հայերը, իշխանությունը խաբեություններով զավթած անազգ-անհայրենիք խառնածիններին արդար դատաստանի կարժանացնեն եւ Եռաբլուրի քաջերի ոգու զորությամբ ծնկի կբերեն բոլոր թշնամիներին:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝