Հայկական եռագույնը ծածանվեց ռուսական բեմում

ՌԴ Մոսկվայի մարզի Դմիտրովի շրջանի Գորկի 25 զինվորական քաղաքում կայացավ համերգ` նվիրված  տեղի Մշակույթի տան 10-ամյակին: Համերգին մասնակցում էին նաեւ «Անուշ» ազգային պարի համույթի սաները, ինչի մասին «Իրավունքը» զրուցել է համույթի հիմնադիր-գեղարվեստական ղեկավար ԱՆՈՒՇ ԳՐԻԳՈՐՅԱՆԻ հետ:

— Կբացե՞ք փակագծեր՝ արդեն տեղի ունեցած համերգային ծրագրի եւ Ձեր համույթի մասնակցության մասին:

— Արդեն յոթ տարի է, ինչ մենք Մշակույթի տան համերգային ծրագրերին մասնակցում ենք` ներկայացնելով Հայաստանը: Համերգը տեւեց երկու ժամից ավելի: 40 ելույթ ունեին, որից մեկը մենք էինք: Հայկական Եռագույն դրոշը ծածանելով՝ պարեցինք Արա Գեւորգյանի «Արտաշատ» ստեղծագործության ներքո: Փորձում ենք որտեղ էլ լինել, հայկական դրոշը բարձր պահել: Ամեն ինչ անցավ շատ լավ: Համերգից հետո մեզ հրավիրեցին նոյեմբերի 4-ին Միասնության օրվան նվիրված համերգին: Այդ օրը ամեն երկիր ներկայացնելու է իր մշակույթը: Մենք ներկայացնելու ենք մեր երկիրը` Հայաստանը:

— Ռուսաստանում պատերազմական դրություն է: Ինչպիսին է համույթի հաճախելիությունը, այն տարբերվո՞ւմ է մյուս տարիներից:

— Ստուդիայի հետ կապված չէի ասի, որ հաճախելիության առումով շատ մեծ փոփոխություններ կան, որովհետեւ ամեն դեպքում մարդիկ փորձում են ապրել:

— Իսկ ռուս ազգի ներկայացուցիչներ կա՞ն «Անուշ» ազգային պարի համույթում:

— Ներկա պահին մի հոգի է, բայց նախկինում եղել են:

— Պատերազմական իրավիճակը Ռուսաստանում ապրող հայերի հոգեվիճակի վրա ինչպե՞ս է ազդել:

— Գրեթե նույնկերպ է...  Ինչքան անհանգստանում ենք Հայաստանի, նույնքան էլ՝ Ռուսաստանում տիրող պատերազմական իրավիճակի համար, քանի որ ներկա պահին այստեղ ենք ապրում, եւ Ռուսաստանը մեզ համար երկրորդ հայրենիք է: Ինձ թվում է, որ սա բոլորիս էլ հուզում է, եւ աղոթում ենք, որ պատերազմական այս օրերը շուտ վերջանան:

ՆՈՒՆԵ ԶԱՔԱՐՅԱՆ

Դմիտրով-Երեւան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝