Ում կցանկանար «Մանկական Եվրատեսիլի» բեմում տեսնել Բեդրոս Կիրկորովը

«Իրավունքի» հետ զրույցում ՌԴ վաստակավոր արտիստ ԲԵԴՐՈՍ ԿԻՐԿՈՐՈՎՆ անդրադարձել է իր հոբելյանական համերգին, Երեւանում կայանալիք «Մանկական Եվրատեսիլին» եւ Հայաստանում ստեղծված իրավիճակին:

— Նոյեմբերի 25-ին տեղի է ունենալու Ձեր 90-ամյակին նվիրված համերգը: Կմանրամասնե՞ք, թե ինչ է սպասվում:

— Մինչեւ չգա նոյեմբեր ամիսը, ոչինչ չեմ կարող ասել: Միայն կասեմ, որ կայանալիք համերգը միջազգային է: Մասնակցելու են իմ ընկերները՝ Իտալիայից, Ֆրանսիայից, Հայաստանից, Մոլդովայից, Բուլղարիայից, Ղրղզստանից: Մնացած տեղեկությունները կասեմ նոյեմբեր ամսին:

— Պարոն Կիրկորով, իսկ ռուսաստանյան աստղեր մասնակցելո՞ւ են:

— Իհարկե, ռուսական աստղերից մասնակցելու են Լեւ Լեւչենկոն, Ալսուն, Զառան, Անիտա Ցոյը: Մոլդովայից այն աղջիկը, որը «Եվրատեսիլի» մրցույթին զբաղեցրեց երկրորդ տեղը, Բուլղարիայից` Իվայլո Ֆիլիպովը: Նա սովորել է այստեղ: Մենք իրեն գիտենք դեռ 6 տարեկանից: Ավարտել է Գնեսինը եւ հիմա երաժշտության ուսուցիչ է: Լավ տղա է: Մենք հպարտանում ենք նրա հաջողություններով, քանի որ մենք ենք նրան Բուլղարիայից բերել, օգնել նրա մայրիկին աշխատանքի տեղավորման հարցում: Բուլղարացի գործարարը նրան աշխատանք, ավտոմեքենա տվեց: Նա տղային երաժշտական դպրոց ընդունեց: Այնպես որ, մենք մեր գործն արել ենք: Մնում է, որ ինքը հավաքի իր հաջողության պտուղները:

— Այս տարի դեկտեմբերի 11-ին Հայաստանում անցկացվելու է «Մանկական Եվրատեսիլ 2022» հոբելյանական 20-րդ մրցույթը: Ի՞նչ կասեք այս մասին:

— Ի դեպ, Վլադիմիր Արզումանյանն առաջիններից էր, որին Ֆիլիպը, երբ տեսավ, ասաց, որ այդ տղան առաջ կգնա: Նա կգնա «Եվրատեսիլ» եւ կբերի այն Հայաստան: Եվ այդպես էլ եղավ: Վլադիմիր Արզումանյանը դարձավ «Մանկական Եվրատեսիլ 2010»-ի հաղթողը, որն այդ մրցույթը բերեց Հայաստան:

— Իսկ Դուք ո՞ւմ կցանկանայիք տեսնել «Մանկական Եվրատեսիլ 2022»-ի բեմում, եթե լիներ մասնակցելու հնարավորություն:

— Ես ինձ հետ կբերեի շատ լավ, տաղանդավոր տղայի` Դանիլ Խաչատուրովին: Նա բարեկամության զավակն է: Դանիլի մայրը ուկրաինացի է, իսկ հայրը` հայ: Ապրում են Սամարայում: Այդ տղան ապագա Անդրեա Բոչելլին է: Ի դեպ, նա նույնպես մասնակցելու է իմ հոբելյանական համերգին:

— Այսօր Հայաստանը պառակտված է: Դուք երբ հետեւում եք հայկական լրահոսին, ի՞նչ կարծիք եք կազմում ներկա իրավիճակի վերաբերյալ:

— Հայերը միշտ ապրել են համերաշխ, բայց նրանց միջից եղել են մարդիկ, որոնք իրենց սխալ են պահել: Մեր երկրորդ պատերազմը սխալ էր: Ով էր առաջինը սկսել, ես չգիտեմ: Իհարկե, ադրբեջանցիները սադրիչներ են, թաքնվում են թուրքական դրոշի հետեւում, բայց ես այդպես էլ չհասկացա, թե ինչու էր Փաշինյանը Ղարաբաղը համարում անօրինական պետություն: Որպես հայ՝ նա պետք է պաշտպաներ, զենք տար կռվող տղաներին: Տղաները գրեթե անզեն էին կռվում: Ցավալի փաստ է, որ մինչեւ հիմա մենք գերիներ ունենք  Ադրբեջանում...

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝