Դա ինձ համար ցավոտ թեմա է. Ֆուտբոլի լեգենդը ցավի, հիասթափության, ձեռքբերումների եւ նոր ֆուտբոլային դպրոցի բացման մասին. Բացառիկ զրույց ֆուտբոլի լեգենդ Խորեն Հովհաննիսյանի հետ

«Իրավունքը» շարունակում է ներկայացնել համաշխարհային ֆուտբոլի պատմություն կերտած լեգենդներին: Վերջ ի վերջո, հայկական ֆուտբոլի զարթոնքը եղել է նրանցով, և հենց նրանց խաղի շնորհիվ է հայկական ֆուտբոլն արձանագրել իր լավագույն, դեռևս միակ արդյունքը: Այսօրվա մեր զրուցակիցն է Խորհրդային Միության հավաքականի եւ Երեւանի լեգենդար ֆուտբոլիստ Խորեն Հովհաննիսյանը:

Ո՞վ չի կարող լինել Խորեն Հովհաննիսյանի ընկեր, ի՞նչը երբեք չի ների, որն՞ է եղել լեգենդի ամենամեծ հիասթափությունը, ինչպես նաեւ «Խորեն Հովհաննիսյանի» անվան ֆուտբոլային դպրոցի բացնան մասին բլից հարցերի շրջանակում բացառիկ մանրամասներ է հայտնել մերօրյա լեգենդը:

-Հայրենիքը Ձեզ համար:

-Ընտանիք, սրբություն:

-Արցախը:

-Հայրենիքիս անբաժան մասը:

-Զինվորը:

-Հայի գոյատեւման առհավատչյան, մեր ուժը: Զինվորը իմ ցավն ու իմ ուժն է, իմ հպարտությունը:

-Ո՞վ չի կարող լինել Ձեր ընկերը:

-Ստորը, անթասիբը:

-Ի՞նչը երբեք չեք ների:

-Դավաճանությունը:

-Ինչի՞ մասին եք ափսոսում:

-Մտածում եմ գուցե կարողանայի ավելին անել ազգիս համար, չգիտեմ...

-Ո՞վ է այն  մարդը, ով գիտի Ձեր բոլոր գաղտնիքները:

-Դա մի մարդ է ու այդ մարդը ես եմ:

-Հաջողության Ձեր բանաձեւը:

-Ճիշտ ու ազնիվ ապրելը, այդ երկու հատկանիշը միշտ մոտեցնում են հաջողությունը:

-Արտասվո՞ւմ եք:

-Երբեմն պատահում է, երբ մենակ եմ լինում:

-Եթե կյանքը նորից սկսելու հնարավորություն ունենայիք ի՞նչը կփոխեիք:

-Համենայնդեպս ոչ շատ բան, ուղղակի երեւի ավելի քիչ կվստահեի մարդկանց:

-Որն՞ է եղել Ձեր կյանքի ամենամեծ հիասթափությունը:

-Նման դեպքեր շատ են եղել, մի անգամ չի եղել, բայց ամեն դեպքում կյանքը շարունակվում է:

-Կա՞ սեր առաջին հայացքից:

-Չեմ պատկերացնում:

-Ձեր կյանքի ամենամեծ ձեռքբերումը:

-Ընտանիքս, կարիերայիս հաջողությունները, հիմա արդեն թոռնիկներս:

-Ի՞նչ պլաններ ունեք առաջիկայում:

-Մոտ երկու ամսից բացվելու է «Խորեն Հովհաննիսյանի» անվան ֆուտբոլային դպրոցը, որտեղ կրթելու ապագա ֆուտոլային լեգենդների: Արդեն աշխատանքների ութսուն տոկոսը կատարված է:

-Ինչպե՞ս կգնահատեք այսօրվա ֆուտբոլը, ինչո՞ւ մենք չենք ունենում ֆուտբոլային նոր լեգենդներ:

-Եկեք, դրա մասին չխոսեմ, դա իմ համար ցավոտ թեմա է, բայց ես հավատում եմ, որ մոտ ապագայում կունենանք ֆուտբոլային չեմպիոններ, որովհետեւ Հայաստանը ֆուտբոլային երկիր է:

-Եվ վերջում, ֆուտբոլիստ ծնվո՞ւմ են, թե՞ ֆուտբոլիստ դառնում են:

-90 տոկոսով Ֆուտբոլիստ ծնվում են, էն տաս տոկոսն էլ ճիշտ աշխատանքի արդյունքն է:

Զրույցը` ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝