Ակնհայտ էր, որ Աղավնոն և Լաչինը ստանալուց հետո Ալիևը ռազմական գործողություններ է սկսելու Սյունիքում

Օգոստոսի 4-ին iravunk.com-ին տված հարցազրույցում «Սահմանադրական իրավունք միության» (ՍԻՄ) նախագահ,  «Ուժեղ Հայաստան Ռուսաստանի հետ. հանուն նոր միության» շարժման գործկոմի անդամ Հայկ Բաբուխանյանն ասել էր, որ «սեպտեմբերին Ալիեւը կփորձի ռազմական գործողություններ սանձազերծել»:

«Արցախյան երկրորդ պատերազմից հետո Ադրբեջանն ակտիվորեն պատրաստվում է հաջորդ պատերազմին, ինչի արդյունքում ծրագրում է գրավել Արցախն ու Սյունիքը, հնարավոր է հասնել նաև Սևանի արևելյան ափ,-  ասել էր փորձառու քաղաքական գործիչը այդ հարցազրույցում, -Նույն երկու տարիների ընթացքում, երբ Ադրբեջանը Արցախի օկուպացված տարածքներում կառուցում էր ճանապարհներ, օդանավակայաններ և այլ ռազմական ենթակառուցվածքներ, Հայաստանն ազդարարեց խաղաղության դարաշրջանի սկիզբը։ Սակայն ներկայիս իշխանությունները չեն հասկանում, որ եթե խաղաղություն ես ուզում, պատրաստվիր պատերազմի. բանակն ուժեղացնելու, տնտեսությունը զարգացնելու և ռազմավարական դաշնակցի՝ Ռուսաստանի հետ հարաբերություններն ամրապնդելու փոխարեն իշխանություններն արեցին ճիշտ հակառակը։ Ցավոք, վերջերս հակառուսական ալիքին միացել են որոշ ընդդիմադիր ուժեր՝ իրենց լրատվամիջոցներով ու ակտիվիստներով։ Հասկանալի է, որ նման իրավիճակը բերելու է նոր տարածքային ու մարդկային կորուստների։ Ամենայն հավանականությամբ, ամերիկացիների և բրիտանացիների դրդմամբ սեպտեմբերին Ալիևը կփորձի ռազմական գործողություններ սանձազերծել այդ տարածքներում՝ այն պատրվակով, թե հայկական կողմն իբր չի կատարում 2020 թվականի նոյեմբերի 9-ի փաստաթղթում նշված կետերը։ »

Այսօր, երբ Հ.Բաբուխանյանի նախազգուշացումը, ցավոք, իրականություն դարձավ, և ադրբեջանցիների հարվածները հասցվեցին հենց այն հատվածներում, որոնց մասին նախազգուշացրել էր ՍԻՄ կուսակցության նախագահը, iravunk.com-ի հարցին, թե ինչպես կզարգանան իրադարձությունները, Հ. Բաբուխանյանը պատասխանեց. «Ակնհայտ էր, որ Աղավնոն և Լաչինը ձեռք բերելուց հետո Ալիևը ռազմական գործողություններ է սկսելու Սյունիքում։ Այս ամենը կշարունակվի այնքան ժամանակ, քանի դեռ կա՛մ Թուրքիան ու Ադրբեջանը չեն հասել իրենց նպատակներին, կա՛մ այնքան ժամանակ, մինչև Հայաստանը չմիանա Ռուսաստանի հետ միութենական պետությանը»։

Սեփական լրատվություն

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝