Արցախի հերոսները վստահ են` Միքայել Արզումանյանին մեղսագրվող արարքը օբյեկտիվ քննության պայմաններում կհերքվի. ԲԱՑԱՌԻԿ

ՊԲ նախկին հրամանատար, գեներալ-լեյտենանտ Միքայել Արզումանյանին բերման ենթարկելու եւ ձերբակալելու լուրից ապշած են նրա զինակիցները. պնդում են՝ Միքայել Արզումանյանն այն մարդը չէ, որ թերանար իր ծառայության ընթացքում:

«Միքայլել Արզումանյանի մասին խոսելիս կարելի է խոսել միայն նրա դրական հատկանիշների մասին: Նվիրյալ մարդ, ով պատրաստ է ամենադժվարին իրավիճակներում կանգնել պետության ու ընկերոջ կողքին` պաշտպանելով հայրենիքն ու ընկերոջ պատիվը: Նա 16-17 տարեկան հասակից անձնվիրաբար կանգնած է եղել Արցախյան ազատագրական պայքարի շարժման ակունքներում` իր գործուն մասնակցությունը ունենալով բոլոր կարեւոր ռազմական գործողություններում: Մեծ դերկատարում ունենալով նաեւ վերջնական հաջող ընթացքի վրա»,-«Իրավունքի» հետ զրույցում անդրադառնալով մարտական ընկերոջ անցած ուղղուն ասաց ՊԲ նախկին հրամանատար, Արցախի հերոս, գեներալ-լեյտենանտ  Լևոն Մնացականյանը: 

Արցախի հերոս գեներալ-մայոր Սամվել Կարապետյանն էլ ընդգծեց ՊԲ նախկին հրամանատարի հետպատերազմյան ավանդը բանակի կայացման գործում փաստելով.

-Միքայել Արզումանյանը պատերազմից հետո եւս շարունակել է իր ծառայությունները մատուցել հայրենիքին` զբաղեցնելով առանցքային պաշտոններ, ինչպես Պաշտպանության բանակում, այնպես էլ Զինված ուժերում: Երկարամյա անբիծ ծառյության ընթացքում նա իր գիտելիքներն ու փորձն է փոխանցել ինչպես սպայակազմին, այնպես ժամկետային զինծառայողներին:

Արցախյան երկու հերոսներն էլ վստահ են, որ իրենց մարտական ընկերոջը մեղսագրվող արարքը` օբյեկտիվ նախաքննության պայմաններում կհերքվի:

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝