Եթե ուզում ենք փրկվել, պետք է հայացքներս կրկին ուղղենք դեպի Աստված. Խաչիկ Ստամբոլցյանի վերջին պատգամը

Թեմա 30 Օգոստոս, 2022 16:25

Մալաթիայի Սուրբ Մարիամ Աստվածածին եկեղեցում երեկ վերջին հրաժեշտը տվեցին ՀԽՍՀ 11-րդ գումարման ԳԽ պատգամավոր, կենսաֆիզիկոս, հասարակական-քաղաքական գործիչ, «Ղարաբաղ կոմիտեի» նախկին անդամ ԽԱՉԻԿ ՍՏԱՄԲՈԼՑՅԱՆԻՆ:

Սեպտեմբերի 15-ին նա կդառնար 82 տարեկան… Խաչիկ Ստամբոլցյանը վաղուց փակել էր քաղաքական էջն ու մինչեւ կյանքի վերջ լծվել քրիստոնեական եւ ավանդական արժեքների պահպանության գործին: Նա անձնվիրաբար պայքարում էր մեր իրողություններում առկա տարբեր յեղկելի դրսեւորումների դեմ: Ոչ այնքան հիվանդությունը, որքան արցախյան 44-օրյա պատերազմի դառը հետեւանքները ծանր ազդեցություն ունեցան նրա առողջականի վրա: Եվ նա մի առիթով «Իրավունքի» հետ զրույցում ցավով ասաց. «Եռաբլուրում նորից սպանեցինք հաղթողներին…»: Սակայն, այսօր փշաքաղվելու չափ հուզիչ է նրա վերջին պատգամը, որն ընդամենն ամիսներ առաջ իր վերջին հարցազրույցում ասել էր մեր թերթի հետ զրույցում: Մեր երկրին պատուհասած այս իրավիճակում Խաչիկ Ստամբոլցյանը գտնում էր, որ անհրաժեշտ է մեր մեղքերի համար ազգովի կանգնենք ապաշխարության:

«Միակ ճանապարհը սա է, իսկ մնացած քայլերն օգտակար չեն: Պետք է մեր մեղքերը գիտակցենք ու գնանք ապաշխարության ճանապարհով», - համոզված էր Ստամբոլցյանը:

Հարցին, թե ինչպե՞ս է պատկերացնում ազգովի ապաշխարության ճանապարհ բռնելը, երբ այսօր իշխանության մեջ կան մարդիկ, ովքեր անթաքույց անաստված են, նա ասել էր. «Սա անաստված իշխանություն չէ, այլ սատանայական իշխանություն է, դրանք սատանայապաշտներ են, սորոսականներ: Իսկ մենք բոլորս հեռացել ենք Աստծուց: Ասում ենք` քրիստոնյա ենք, բայց եկեղեցի չենք գնում, Աստվածաշունչ չենք կարդում: Եթե ուզում ենք փրկվել, պետք է հայացքներս կրկին ուղղենք դեպի Աստված»:

ՀՐԱՆՏ ՍԱՐԱՖՅԱՆ