Ֆիլմի պրեմիերա՝ «Ուղիղ եթեր»
ՄշակութայինՕգոստոսի 24-ին «Կինոպարկում» կկայանա «Ուղիղ եթեր» նոր կինոկատակերգության անդրանիկ ցուցադրությունը: Ներկա կլինի ֆիլմի ստեղծագործական կազմը։
Ֆիլմի ռեժիսորներն են Ֆիլիպ Պողոսյանը և Օնիկ Հովհաննիսյանը: Օպերատորը Վարդան Հարությունյանն է։ Դերակատարներն են` Վարուժան Մանուկյանը, Էմմա Շաբոյանը, Արմեն Մարգարյանը, Օնիկ Հովհաննիսյանը, Ֆիլիպ Պողոսյանը, Տիգրան Բարսեղյանը, Սեդա Ավագյանը, Հարութ Բեգ-Վանյանը, Ջեմմա Մարտիրոսյանը, Արև Հակոբյանը, Լարիսա Ենգիբարյանը և Դանիել Տատինցյանը:
Ֆիլմը ընկերության և սիրո մասին է, նաև այն մասին, թե ինչերի է ընդունակ մարդը հանուն սիրո ու ընկերության՝ անկախ իր սոցիալական դիրքից և հասարակության մեջ իր մասին ձևավորված պատկերացումներից։
Ֆիլմի գործողությունները տեղի են ունենում Երևանում։ Նկարահանումները տևել են 6 ամիս։ Հիմնականում նկարահանել են «Ջրվեժ» անտառապարկում։ Ֆիլմի համար հատուկ երաժշտություն է գրել կոմպոզիտոր Թաթոս Հակոբյանը, ինչպես նաև ձեռք է բերվել հեղինակային երաժշտության իրավունք՝ արտասահմանյան երաժշտական հայտնի կայքերից օգտվելու համար։
Ֆիլմի գլխավոր հերոսը՝ Հենրին, սկանդալային հրապարակումներով հայտնի լրագրող է։ Օլիգարխներից մեկի մասին հերթական սկանդալային նյութը նկարահանելու ընթացքում նրան առևանգում են: Հենրիի ընկերները՝ Արսենը և Ֆելիքսը, պարզում են նրա գտնվելու վայրը և շտապում օգնության: Արկածներով և տարօրինակ հանդիպումներով լի ճանապարհը նրանց հասցնում է անսպասելի վերջնակետի...
Օգոստոսի 25-ից «Ուղիղ եթերը» կցուցադրվի Հայաստանի բոլոր կինոթատրոններում։ Ֆիլմը նախատեսված է 12+ անձանց համար։
