Որոշ քաղաքական շրջանակներ շարունակում են նեղ քաղաքական շահերի բավարարման տրամաբանությամբ արցախահայությանը ներգրավվել ՀՀ-ում տեղի ունեցող գործընթացներին․ Հայացք Արցախից

Ի՞նչ է կատարվում Արցախի ներքաղաքական կյանքում, կա՞ արդյոք Արցախի շուրջ առկա մարտահրավերներին ուղղված միասնական պայքարի կոնսեսուս այս հարցի պատասխանը փորձել ենք ստանալ արցախցի հայտնի քաղաքական վերլուծաբան ԺԻՐԱՅՐ ԱԶԻԶՅԱՆԻՑ, ով փաստեց հետեւյալ իրավիճակը․

-Այսօր և ընդհանրապես հետպատերազմյան շրջանում Արցախում ակտիվ ներքաղաքական գործընթացներ մեծ հաշվով կարելի է ասել չեն իրականացվել, ինչը խոսում է արտաքին բազմաթիվ մարտահրավերների հաղթահարման ներքին քաղաքական կոնսենսուսի առկայության մասին։ Այս համատեքստում միանշանակ առանձնահատուկ դերակատարություն ունի Արցախի նախագահի կողմից որդեգրված քաղաքական գիծը, որն առաջին հերթին արտացոլվում է պետական կառավարման պատասխանատու պաշտոններում ամենատարբեր, այդ թվում ընդդիմադիր ուժերի ներկայացվածության փաստով։ Սա ըստ էության միտված է համախմբելու Արցախում գործող բոլոր քաղաքական ուժերին, ինչը շատ կարևոր է ստեղծված իրավիճակում ներքին կայունության ապահովման առումով և ինչը, կամ նույնիսկ ինչի փորձը ցավոք սրտի բացակայում է Հայաստանում ձեւավորված իշխանության և խորհրդարանական ընդդիմության քաղաքական վարքագծում։ Ցավալի իրողություն է նաեւ, երբ որոշ քաղաքական շրջանակներ շարունակում են նեղ քաղաքական շահերի բավարարման տրամաբանությամբ արցախահայությանը ներգրավվել Հայաստանում տեղի ունեցող գործընթացներին, ինչն իհարկե վնասից բացի որևէ օգուտ չի ապահովում այնքանով, որքանով որ արցախահայությունը իրավական առումով չունի ՀՀ քաղաքացիական պրոցեսների մասնակցության հնարավորություն, իսկ վերոնշյալ ներգրավման փորձերն անշուշտ էլ ավելի են խորացնում «ղարաբաղցի-հայաստանցի» կեղծ անջրպետը, ինչի միակ շահառուներն այսօր Շուշիում գտնվողներն են։

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝