Այս իշխանությունները մշակույթ եւ արվեստ գնահատել չգիտեն. Մհեր Արմենիա

«Իրավունքի» զրուցակիցն է «Ազգի ձայն» կուսակցության նախագահ, Հայաստանի վաստակավոր արտիստ ՄՀԵՐ ԱՐՄԵՆԻԱՆ (Մեսրոպյան): Մեզ հետ զրույցում նա անդրադարձավ օրեր առաջ ԿԳՄՍ նախարարության կողմից հրապարակված օրենքի նախագծին, որով նախատեսվում է չեղարկել մի շարք պետական կոչումներ, այդ թվում` ՀՀ վաստակավոր եւ ժողովրդական արտիստի կոչումները:

ԱՅՍ ԻՇԽԱՆՈՒԹՅՈՒՆՆԵՐԸ ՄՇԱԿՈՒՅԹ ԵՎ ԱՐՎԵՍՏ ԳՆԱՀԱՏԵԼ ՉԳԻՏԵՆ

- Ի՞նչ կասեք նախարարության այս որոշման մասին: Ի դեպ, այսօր նաեւ հայտնի դարձավ, որ Նիկոլ Փաշինյանի հանձնարարականի հիմքով մշակվել է նոր պետական մրցանակ` «Հանրապետություն»:

- Ես հետաքրքրվել եմ, պարզվում է, այն արվեստագետները, որոնք ժամանակին ստացել են վաստակավորի կամ ժողովրդականի կոչումներ, կշարունակեն կրել համապատասխան կոչումները: Այսինքն` նախկինում տրված կոչումները ուժի մեջ են եւ չեն կարող չեղարկվել: Նույնիսկ երեկ հարցազրույցի ընթացքում այդ մասին խոսել էր փոխնախարարը եւ հաստատել: Այն, ինչ արվում է, արդեն միտված է ապագային, որպեսզի նշված կոչումներն այլեւս հանվեն:

- Այնուամենայնիվ, ընդհանուր առմամբ, ինչպե՞ս եք վերաբերվում այդ երեւույթին:

- Կարող եմ միայն ասել, որ վատ է, երբ ուզում են հանել այդ կոչումները: Կոչումը պետության գնահատականն է, որը ստեղծագործողին ինչ-որ տեղ ոգեւորում, ինչ-որ տեղ շահագրգռում է: Ես շատ վրդովված եմ, որ պետք է այդ կոչումները վերացնեն: Ճիշտ է, թեպետ դրանք խորհրդային ժամանակներից մնացած կոչումներ են, բայց դրանք խթան են, որպեսզի ստեղծագործողը ներշնչանքով աշխատի: Սա անթույլատրելի քայլ է եւ հերթական անգամ ապացուցում է, որ այս իշխանությունները մշակույթ եւ արվեստ գնահատել չգիտեն, մեղմ ասած` հետաքրքրված չեն, որպեսզի արվեստագետները արժանանան պետական գնահատականի: Սա պարզապես արվում է նրա համար, որ ստեղծագործող մարդը հիասթափվի: Ամեն դեպքում, կոչումները չեն որոշում` արտի՞ստ է, թե` ոչ:

- Իսկ ի՞նչ եք կարծում` «Հանրապետություն» մրցանակը բովանդակային առումով հենց նույն կոչումնե՞րն է արտացոլելու:

- Ոչինչ չեմ կարող ասել: Կարծում եմ, մենք մեր երկրում այնքան չլուծված խնդիրներ ունենք, որ առնվազն տեղին չէ գոնե այս ժամանակահատվածում նման հարցերով զբաղվել: Մեր երկիրը կանգնած է լուրջ մարտահրավերների առաջ, եւ պետք է այնպես անել, որ ապահովության զգացում լինի երկրում: Հաճախ ենք սահմանին մի նոր զոհ ունենում, տեսնում ենք, թե որքան են շատացել ինքնասպանության դեպքերը: Սրանք շատ լուրջ խնդիրներ են, իսկ իշխանությունները լծվել են կոչումներ չեղարկելու գործին: Դրանով որեւէ հա՞րց է լուծվելու: Իհարկե, ո՛չ: Դեռ այն ժամանակ, երբ այս իշխանությունները Մշակույթի նախարարությունը միացրին ԿԳՄՍ նախարարությանը, կարելի էր եզրակացնել, որ նրանք հետաքրքրված չեն, որպեսզի Հայատանում զարգանան արվեստն ու մշակույթը:

- Բազմաթիվ արվեստագետներ պնդում են, որ կարիք կա նորից վերաբացելու Մշակույթի նախարարությունը: Դուք է՞լ ունեք այդ մտահոգությունը:

- Միանշանակ, Մշակույթի նախարարությունը պետք է լինի լրիվ առանձին ինստիտուտ եւ պետք է գործի ինքնուրույն: Հենց արվեստի եւ մշակույթի ոլորտում մենք ունենք զանազան խնդիրներ: Այնպես չէ, որ այսօր մեր մշակույթը ծաղկում է: Եթե վերաբացվի Մշակույթի նախարարությունը, կարծում եմ, շատ դրական հետեւանքներ կունենա: Բայց, համոզված չեմ, որ այս իշխանությունները կգնան այդ քայլին:

ՌՈՒԶԱՆՆԱ ԽԱՉԱՏՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝