Ֆրանսիացի դաշնակահարը սիրահարվել է Հայաստանին ու Կոմիտասին

Գոդեֆրուա Բերնիեն հայկական երաժշտություն նվագելը հոգեւոր ճամփորդություն է անվանում Ֆրանսիացի դաշնակահար Գոդեֆրուա Բերնիեն, որ սիրահարված է հայկական երաժշտությանը, որի միջոցով, ինչպես ինքն է ասում` ինքն իրեն է բացահայտել, գտել իր հետ կապը, հունիսի 23-ին ելույթ կունենան Արամ Խաչատրյանի տուն-թանգարանում: Նա առաջին անգամ է հանդես գալու Հայաստանում: Գոդեֆրուա Բերնիեն ավելի քան 3 տարի զբաղվում է հայկական մշակույթի եւ առավելապես հայ կոմպոզիտորների դաշնամուրային ստեղծագործությունների բացահայտմամբ: Նա խորապես սիրահարված է Հայաստանին` անգամ որեւէ հայի մինչ այդ չճանաչելով: Վերջերս Գոդեֆրուա Բերնիեն Փարիզում բարեգործական համերգ է ունեցել, որի ողջ հասույթը ուղղվելու է հայկական դպրոցի կառուցմանը: Ֆրանսիացի դաշնակահարն իր նվագացանկում ներառել է Կոմիտասի ստեղծագործությունները, որոնցից մի քանիսը տարածված չեն ու չեն կատարվում:

Հավելեց, որ հայկական երաժշտությունը մատուցելու է ֆրանսիացու՝ իր ընկալմամբ: «Սա նոր փորձառություն է ինձ համար, ուրախ կլինեմ, եթե հայ հանդիսատեսը գնահատի իմ ելույթը»,-ասաց դաշնակահարը: Հարցրինք, թե ինչպես է ծնվել սերը հայկական մշակույթի ու հայ երաժշտության հանդեպ: Գոդեֆրուա Բերնիեն նշեց, որ դաշնամուր է նվագել 18 տարեկանից, սովորել է Լիլի համալսարանում: Մի քանի տարի անց հետաքրքրվել հայկական երաժշտությամբ: «Բաբաջանյանի «Էլեգիայի» միջոցով առաջին անգամ շփվեցի հայկական երաժշտության հետ, այն ներդաշնակ էր իմ զգացմունքների հետ: Դրանք դժվար ժամանակներ էին, ես կորցրել էի մայրիկիս… Երաժշտությունն օգնեց հաղթահարել դժվարությունները: Ես զգացմունքային առումով ավելի կապվեցի դաշնամուրի հետ: Բաբաջանյանից հետո սկսեցի այլ հայ կոմպոզիտորների գործերով էլ հետաքրքրվել, ինձ համար հայտնաբերեցի Կոմիտասին, Հարությունյանին, Սարաջյանին ու մյուսներին»,-ասաց մեր զրուցակիցը: Նշեց, որ 2019-ին մենահամերգ է ունեցել, որի ծրագրում արգենտինացի եւ իսպանացի կոմպոզիտորներ էին: Այնուհետեւ մի համերգ էլ ունեցել է, որտեղ բացառապես հայ կոմպոզիտորների գործեր է նվագել` Կոմիտաս, Բաբաջանյան, Բաղդասարյան, Աբրահամյան, Սարաջյան եւ Ալան Հովհաննես: Ապա թողարկել է առաջին CD-ն, որը ներառում էր 6 հայ կոմպոզիտորների գործերը:

Գոդեֆրուա Բերնիեն նշեց, որ այդ 6 կոմպոզիտորների ստեղծագործությունները շատ յուրահատուկ է համարում, առանձնացրեց հատկապես Կոմիտասին եւ Ալան Հովհաննեսին: Նրա ձեւակերպմամբ, Կոմիտասի երաժշտության միջոցով կարելի է պատկերացում կազմել հայկական երաժշտության մասին, իրեն դուր է գալիս, որ Կոմիտասը բյուրեղացնում է հայկական մշակույթի ակունքներից եկած արժեքները: Ասում է, որ կոնսերվատորիայում սովորելիս պետք է Բեթհովեն, Շուման ու Շոպեն նվագեր, բայց Կոմիտասի ստեղծագործությունների հետ ծանոթանալուց հետո իր համար ամեն ինչ վերաիմաստավորվել է, որովհետեւ դաշնակահարի ձեւակերպմամբ, Կոմիտասի երաժշտությունն ասես աղոթք լինի, Կոմիտասը հայկական մշակույթի ոգին է խորհրդանշում: Նա հայկական երաժշտությանն անդրադառնալը բնորոշում է որպես հոգեւոր ճամփորդություն, ասում է՝ Հայաստանին պետք է արժանի լինել, պետք է վաստակել Հայաստանը, որովհետեւ հայկական երաժշտության միջոցով բացահայտվում է ժողովրդի հարուստ ու բազմադարյա պատմությունը: Ֆրանսիացի դաշնակահարը կարճատեւ այցով է Հայաստանում, բայց հասցրել է լինել Հայաստանի որոշ տեսարժան վայրերում: Ասում է` միշտ պատկերացրել է, թե ինչպիսին է հինավուրց Հայաստանը, ու հիմա իր աչքով է տեսնում ամեն բան: Երաժշտից տեղեկացանք նաեւ, որ երկրորդ CD-ն է պատրաստվում թողարկել:

Ամբողջական հոդվածը կարող եք կարդալ այս հասցեով՝ https://www.aravot.am/2022/06/23/1275807/

© 1998 - 2022 Առավոտ – Լուրեր Հայաստանից

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝