Հ. Բաբուխանյանը առաջարկեց Եվրասիական կրթական հաջորդ ֆորումը անցկացնել Հայաստանում

Այսօր Բիշկեկում մեկնարկել է «Եվրասիական կրթական օր» միջազգային ֆորումը: Այն նվիրված է միջազգային համագործակցության խնդիրներին և հեռանկարներին՝ ի դեմս նոր մարտահրավերների, ինչպես նաև կրթության և մշակույթի բնագավառում միջազգային համագործակցության գործիքները համաշխարհային արժեքների համատեքստում օգտագործելու հեռանկարներին։ Ֆորումին մասնակցում են  գիտնականներ, պատգամավորներ, քաղաքական եւ հասարակական գործիչներ, բուհերի ռեկտորներ Ռուսաստանից, եվրոպական երկրներից, Չինաստանից, ԱՊՀ-ից: Ֆորումում Հայաստանը ներկայացրերլ է ՍԻՄ կուսակցության եւ «Իրավունք Մեդիա» հոլդինգի նախագահ Հայկ Բաբուխանյանը: Այսօր նա հեռավար կապով ելույթ է ունեցել «Կրթական համակարգերի միջազգային համագործակցությունը որպես եվրասիական պետությունների միջեւ դիվանագիտական հարաբերությունների հիմնական գաղափար» կլոր սեղանին, որը վարում էին  «Միջազգային համագործակցություն» ասոցացիայի  գլխավոր տնօրեն Տատյանա Բալաբանովան եւ Չեխիայի  առեւտրային պալատի նախագահ Իրժի Նեստավալը:

Իր խոսքում Հ. Բաբուխանյանը նշեց, որ այսօր երբ եվրասիական մայրցամաքում տեղի են ունենում տարանջատման բաժանարար գործընթացներ, կրթական համակարգերը կարող են դառնալ այն կամուրջները, որոնք կապ կհաստատեն ժողովուրդների ու պետությունների միջեւ: Կրթական համակարգերը պետք է  երիտասարդության մեջ դաստիարակեն հարգանք եւ ընկալում այլ ժողովուրդների  նկատմամբ, ձեւավորեն պատկերացումներ այդ ժողովուրդների իրավունքների, շահերի եւ իղձերի մասին, որը թույլ կտա գտնել կոմպրոմիսային լուծումներ միջազգային վիճելի հարթություններում: Միաժամանակ նա նշեց, որ այսօր կարեւոր է գիտականորեն հիմնավորել նոր մեթոդներ, որոնք ուղղված կլինեն եվրասիական ինտեգրացիայի զարգացման վրա:

Հ. Բաբուխանյանը ֆորումի մասնակիցներին հրավիրեց Երեւան հաջորդ ֆորումը անցկացնելու նպատակով, նշելով, որ Հայաստանը ունի  եվրասիական ինտեգրացիայի  լավ ավանդույթներ եւ միաժամանակ կրթական բազմակողմանի զարգացած համակարգ: 

ՍԻՄ լրատվական ծառայություն

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝