Որեւէ մեկի մտքով անգամ, եթե անցնի մեր թիմի հարված հասցնի, ապա այդ հարվածը հետ է վերադառնալու բումերանգի էֆեկտով. Աղազարյանը աղմկահարույց ձայնագրության հետքերով

Նախօրեին, Ռուբեն Վարդազարյանն հայտարարել էր, թե ապացույց ունի, որ իր դեմ կատարվող բոլոր գործողությունները քաղաքական որոշման արդյունք են։ Որպես ապացույց նա հրապարակել էր իր, ԲԴԽ նախագահի պարտականությունները կատարող Գագիկ Ջհանգիրյանի ու ԲԴԽ անդամ Ստեփան Միքայելյանի մասնակցությամբ զրույցի ձայնագրությունը։

«Ինձ 2021 թվականի փետրվարի 20-ին վարչապետի անունից փոխանցել են, որ պետք է հրաժարական տամ։ Ես ասել եմ, որ ինձ մինչև մարտի 1-ը ժամանակ է պետք, քանի որ պետք է գործուղվեմ Մոսկվա։ Բացի այդ, ասել եմ, որ կհանդիպեմ վարչապետի հետ, որ իրենից լսեմ իմ հրաժարականի պահանջը, եթե այդպիսին կա, ոչ թե դա փոխանցի երրորդ անձի միջոցով»,- ձայնագրության հրապարակումից հետո մեկնաբանել է Վարդազարյանը։

Նրա խոսքով` իրեն ժամանակ է տրվել մինչև 2021 թվականի մարտի 1-ը։ Եվ ձայնագրությունում հենց այդ մասին է խոսվում, որ մինչև նշված ժամանակահատվածը Վարդազարյանի դեմ չպետք է որևէ քրգործ հարուցվի, եթե նա հրաժարական տա։ Հակառակ դեպքում Ջհանգիրյանը «ոչինչ չի կարող երաշխավորել»։

Վերը նշվածի շուրջ «Իրավունքը» զրուցել է «Քաղաքացիական պայմանագիր» խմբակցության պատգամավոր ՀՈՎԻԿ ԱՂԱԶԱՐՅԱՆԻ հետ, ով նախ նկատեց.

-Նախ ասեմ, որ ձայնագրելը հացի սեղանի շուրջ շատ տգեղ բան է, ավելի նողկալի է, որ այդ ձայնագրությունը, փաստորեն տեղի է ունեցել մոտ մեկ տարի առաջ, ու փաստորեն հիմա է հրապարակվել, ըստ էության, սա բարոյական առումով ոչ մի տեղ չտեղավորվող բան է:

Ինչ վերաբերում է պարոն Ջհանգիրյանի ասած շատ մտքերի հետ ես համաձայն եմ, եթե հանենք լեքսիկոնից որոշ նրբություններ: Ասում են ինքը վարչապետի դեմ բաներա խոսել, ես նման բան չեմ նկատել, որովհետեւ ինքը զրույցի մեջ ընդհանուր գնահատականներ է տվել, համեմատելով տարբեր գործիչների միմյանց: Այսինքն պարոն Ջհանգիրյանը Վանեցյանին համեմատում է Ռոբերտ Քոչարյանի հետ եւ իր համար նախապատվելի է Վանեցյանը: Բայց, եթե առիթը լինի, բնական է, որ չի գնալու կանգնի Վանեցյանի կողքին:

-Այսինքն վստա՞հ եք, որ Ջհանգիրյանը թիկունիքից հարված չի հասցնի:

-Նախ ես վստահ եմ, որ ինքը այն մարդը չի, որ թիկունքից հարված հասցնի, երկրորդ, այսօր մեր իշխանության մեջ կառավարումը տեղի է ունենում այնպիսի մեխանիզմներով եւ այնպիսի թափանցիկությամբ, որ որեւէ մեկի մտքով անգամ, եթե անցնի մեր թիմի հարված հասցնի, ապա այդ հարվածը հետ է վերադառնալու բումերանգի էֆեկտով:

ԻԼՈՆԱ ԱԶԱՐՅԱՆ