Աղավնոն երբեք չի գնալու Փառուխի ճանապարհով, մենք դուրս չենք գալու մեր գյուղից․ Աղավնոյի գյուղապետը նոր մանրամասներ է ներկայացնում

Վերջին օրերին ակտիվ լուրեր են շրջանառվում, որ Լաչինին այլընտրանքային ճանապարհի գործարկումից հետո Աղավնոն մնում է ադրբեջանական տարածքում։ Կառուցվող ճանապարհը շրջանցում է Աղավնոն, եւ այն, ըստ էության, մեկուսանալու է։

Վերոնշյալի շուրջ <<Իրավունքը>> զրուցել է Աղավնո համայնքի համայնքապետ Անդրանիկ Չաուշյանի հետ, ով փաստեց, որ ադրբեջանական կողմը ակտիվ աշխատանքներ է իրականացնում այլընտրանքային ճանապարհը օր առաջ շահագործման հանձնելու համար, բայց սրանով հանդերձ, գյուղապետի խոսքերով․

-Բնակիչները մարտական են տրամադրված, այստեղ կարեւորը իշխանության ասելիքն է։ Բնակչության համար շատ կարեւոր է Արցախի իշխանությունների թիկունքը, հիմա սպասում ենք հստակ հայտարարություններին։ Աղավնոն երբեք չի գնալու Փառուխի ճանապարհով, մենք դուրս չենք գալու մեր գյուղից, մենք մեր գյուղը լքելու մասին չենք էլ մտածում։ Ով էլ ինչ որոշի, մենք մնալու ենք մեր գյուղում, եթե պիտի գյուղում մեռնենք, ուրեմն թող գյուղում մեռնենք, բայց փախստական չենք դառնա, մենք ենք տերը մեր գյուղի, մեր հողերի։

-Արցախի իշխանությունների թիկունքը այսօր զգո՞ւմ են բնակիչները։

-Այո, այնպես չէ, որ մեզ անտեսել են, մեզանով մտահոգ չեն, պարզապես կարծում եմ, որ իրենք էլ դեռ բանակցությունների մեջ են, հասկանան՝ ոնց, ինչ։ Թե չէ մեր մոտ միշտ գալիս-գնում են իշխանություններից մարդիկ, առանձին պատգամավորներ, օրինակ Կարենը Հովհաննիսյանը, ինքն էլ իր մանդատի շրջանակներում է փորձում խնդիրները տեղ հասցնել։ Վստահ եմ, որ բոլորիս միասնական լինելու դեպքում Աղավնոն երբեք չի դառնա Ադրբեջանի մասնիկ։ Գիտեք, պատերազմից հետո էլ ասին՝ դուրս պիտի գան, բայց դուրս չեկանք, չէ՞։ Ով ուզում է լինի, չի կարա մեր գյուղը հանձնի, մենք հանձնվո՞ղ ենք, որ գյուղը հանձնեն։ Ազերին Երեւանն էլ է ուզում, է, հետո՞, մեր մեջ հայ չկա՞, որ պայքարենք, ասենք՝ հոպ, արա, դու ո՞վ ես, Բաքուն էլ մերն ա, հո ասելով, հո ստիպելո չի։ Ասում եմ՝ կմետնենք, բայց գյուղից դուրս չենք գա։

ԻԼՈՆԱ ԱԶԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝