Ինքնամեկուսացում, հիգենիայի անտեսում, անքնություն, ցնորքին բնորոշ զգացում․ Հոգեբույժը՝ հոգեկան առողջության խաթարման առաջին ազդակների մասին

<<Հոգեկան առողջությունն ազդում է  ուտելու սովորությունների, ֆիզիկական գործունեության մակարդակի, նյութերի օգտագործման վարքագծի և այն բանի վրա, թե ինչպես ենք մենք մտածում, զգում և հաղթահարում դժվար իրավիճակները:  Անձի հոգեկան առողջությունը նույնքան կարևոր է, որքան նրա ֆիզիկական առողջությունը, իսկ հոգեկան առողջության պայմանները նույնքան իրական են, որքան ֆիզիկական հիվանդությունները>>,- անդրադառնալով հոգեկան առողջության կարեւորությանը մեզ հետ զրույցում ասաց «Հոգեկան առողջության պահպանման ազգային կենտրոն» ՓԲԸ-հոգեբույժ ԿԱՐԵՆ ԱՍԼԱՆՅԱՆԸ, ապա անդրադառնալով հոգեկան հիվանդությունների աշխարհագրությանը եւ տարեց-տարի նկատվող տենդենցներին մասնագետը նկատում է․

-2016թ․-ից առ այսօր հոգեկան խնդիրների աճ է նկատվում առհասարակ տարածաշրջանում, ինչի վրա մեծապես ազդել են պատերազմական տագնապները, Քովիդը եւ այլ սթրեսային ապրումները։ Դէ էլ չեմ խոսում ժառանգական ֆակտորով պայմանավորված հոգեկան խնդիրների մասին։ Ժառանգական ֆակտորով պայմանավորված հոգեկան հիվանդությունները ի հայտ են գալիս մինչեւ 30 տարեկան հասակը՝ հնարավոր է նոպայաձեւ ընթացք, հնարավոր է դանդաղ ընթացք։ Ունենք նաեւ սիտուացիոն դեպքեր։

-Բժիշկ, իսկ սեռային առումով ի՞նչ պատկեր ունենք։

-Ընդհանուր առմամբ կարող ենք արձանագրել, որ կանանց մոտ ավելի շատ են նկատվում հոգեկան առողջության խաթարման պաթոլոգիաները։

-Ի՞նչ տարիքի են Ձեր ամենափոքր եւ ամենամեծ տարիքով պացիենտները։

-Հաշվի առնելով, որ մենք հիմնականում աշխատում ենք մեծահասակների հետ, ապա հիմնական պացինենտների տարիքային շեմը 18-ից մինչեւ խորը ծերունական տարիքի են։

-Բժիշկ, կառանձնացնե՞ք երեք, այսպես ասած, ազդանշաններ, որոնք ահազանգում են, որ մենք գործ ունենք կամ առաջիկայում կարող ենք գործ ունենալ հեգեկան առողջության պաթոլոգիաների հետ։

-Առաջին հերթին ինքնամեկուսացման ձգտումն է, հաճախ ակտիվ կենցաղով, առօրյայով ապրող մարդը դառնում է ինքնամփոփ, լռակյաց, երկրորդը՝ հիգենիայի անտեսում, անքնություն, թույլ՝ ցնորքին բնորոշ զգացողություններ։ Երեմն հիվանդությունները այնպես են արտահայտվում, որ հիվանդը իրեն հիվանդ չի համարում եւ ահա այստեղ է, որ պահանջվում է հարազատների օգնությունը: Հոգեկան հիվանդության վաղ հայտնաբերումը և բուժումը կարևոր նշանակություն ունեն՝ թույլ չտալու հոգեկան խանգարումների թվաքանակի աճը մինչև ճգնաժամային կետին հասնելը։

Զրույցը՝ ԻԼՈՆԱ ԱԶԱՐՅԱՆԻ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝