Մինչ օրս 2100 մասնակից բերման է ենթարկվել, 48 քաղաքացի ձերբակալվել է, 24-ը՝ կալանավորվել. պաշտոնական տվյալներ

Ներքաղաքական 5 Հունիս, 2022 21:28

«Սիրելի հայրենակիցներ, ըստ պաշտոնական տվյալների, մինչ օրս Դիմադրության շարժման ավելի քան 2100 մասնակից բերման է ենթարկվել Ոստիկանության տարբեր բաժանմունքներ։ Սակայն մենք գիտենք, որ ոչ բոլոր բերման ենթարկվածներն են փաստաթղթավորվել Ոստիկանության կողմից։ Իրականում բերման ենթարկվածների թիվը մոտ 2500 հոգի է:

Ապրիլի 25-ից սկսած՝ ձերբակալվել են 48 արժանապատիվ քաղաքացիներ։ Նրանցից 24-ը կալանավորվել են։ Հենց այս պահին էլ դատարանները քննում են կալանքի միջնորդություններ։

Փաստ է, որ «ժողովրդավարության բաստիոն»-ում կան մոտ 5 տասնյակ քաղբանտարկյալներ (ներառյալ մինչեւ շարժումը կալանավորվածները):

Ձեռբակալված եւ կալանավորված քաղաքացիների մեղադրանքները անհիմն են կամ ոչ իրավաչափ:

Սրան զուգահեռ, ամբողջ համացանցն ու մամուլը ողողված են ոստիկանների ապօրինությունների, վայրագությունների ու անմարդկային վերաբերմունքի փաստերը հաստատող կադրերով։ Չնայած դրան՝ ոչ մի ոստիկան մինչ այս պահը պատասխանատվություն չի կրել իր հանցանքների համար։ Եվ սա էլ է խոսուն փաստ «նիկոլական ժողովրդավարության» մասին։

Սիրելի հայրենակիցներ, Հայաստանը բռնապետության չի վերածվելու։ Հայաստանում Ոստիկանությունը ծառայելու է օրենքին եւ օրինականությանը, այլ ոչ թե բռնապետի մոլուցքով խելագարին։ Հայաստանը լինելու է արժանապատիվ քաղաքացիների երկիր եւ ոչ թե ոստիկանական կոնցլագեր։ Վաղը ժամը՝ 19։00-ին հավաքվում ենք Ֆրանսիայի հրապարակում։ Մենք պետք է ցույց տանք, թե ով է Հայաստանի իրական տերը։ Մենք պետք է ցույց տանք, թե որոնք են Հայաստանի իրական արժեքները։ Մենք պետք է ցույց տանք, թե ինչպիսի երկիր ենք ցանկանում ունենալ։ Եվ ուրեմն, հունիսի 6-ին, ժամը՝ 19։00-ին Ֆրանսիայի հրապարակ։

Աստծով, ոգով, մինչեւ վերջ», - գրել է ԱԺ փոխնախագահ, ՀՅԴ Հայաստանի ԳՄ ներկայացուցիչ ԻՇԽԱՆ ՍԱՂԱԹԵԼՅԱՆԸ:

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝

Մինչ օրս 2100 մասնակից բերման է ենթարկվել, 48 քաղաքացի ձերբակալվել է, 24-ը՝ կալանավորվել. պաշտոնական տվյալներ

Փոխարժեք