«Ամենամեծ նվերը` խաղաղությունն է».ԲԵԴՐՈՍ ԿԻՐԿՈՐՈՎ

Հունիսի 2-ին լրացավ Ռուսաստանի Դաշնության վաստակավոր արտիստ ԲԵԴՐՈՍ ԿԻՐԿՈՐՈՎԻ 90-ամյակը: Այս առիթով «Իրավունքը» զրուցեց նրա հետ:

– Սիրո՞ւմ եք Ձեր ծննդյան օրը նվերներ ստանալ:

– Հաճելի է, որ այդ օրը լավ մարդկանց կողմից շնորհավորանքներ եմ ստանում: Իսկ նվերները կարեւոր չեն: Նվերները կգան եւ կգնան, իսկ ընկերությունը կմնա: Ամենամեծ նվերն ինձ համար այն է, որ բոլորը առողջ լինեն, եւ երկրում խաղաղություն լինի: Որպեսզի կյանքը լավանա, մարդիկ բարիանան: Երբ չարին հաղթենք, այդ ժամանակ ամեն ինչ լավ կլինի:

– Այս տարի ինչպե՞ս նշեցիք Ձեր ծննդյան օրը:

– Բանն այն է, որ ես մի քանի օր առաջ եմ դուրս գրվել հիվանդանոցից: Այնպես որ, այս տարի մտերիմների շրջապատում նշեցինք իմ ծննդյան օրը:

– Ձեր ծննդյան ամենահիմնական ուտեստը ո՞րն է:

– Խաշը` սխտորով եւ հայկական պանիրը:

– Ամենահիշվող ծննդյան օրը ո՞րն է եղել:

– Ամեն ծննդյանս օրը եղել են յուրահատուկ անակնկալներ: Այնպես որ, առանձնացնել չեմ կարող:

– Ֆիլիպն ինչպե՞ս շնորհավորեց Ձեզ:

– Վաղ առավոտյան շնորհավորեց, համբուրեց ինձ:

– Ռուսական աստղերից շատերը հիմա Ռուսաստանում չեն ապրում, իսկ Դուք հիմա ՌԴ-ու՞մ եք ապրում:

– Այո, ես ապրում եմ Ռուսաստանում: Ես ինչ եկել եմ Բուլղարիայից, դարձել եմ մոսկվացի: Այնպես որ, ո՞ւր գնամ:

– Ճի՞շտ է, որ Ֆիլիպ Կիրկորովի համերգային ծրագիրը չեղարկվել է:

– Սուտ լուրեր են: Ես դա երբ լսեցի, քիչ էր մնում ինֆարկտ ստանայի: Ֆիլիպի հակառակորդներն են նման սուտ ինֆորմացիա տարածում, որ նա ելույթ չունենա: Ֆիլիպը Ռուսաստանի, Պուտինի եւ Հայաստանի կողմից է: Եվ հիմա հովանավորում է "Նոր ալիքում" առաջին տեղը զբաղեցրած մեր տղային:

ՆՈՒՆԵ ԶԱՔԱՐՅԱՆ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝