Արտերկրում դուք կերտեցիք երկրորդ Սարդարապատը

«Սարդարապատից՝ Սարդարապատ» գիրքը մի ամփոփ բնութագիր է «Սարդարապատ» միության «կենսագրականի», որը հանրությանը ներկայացրին գրքի շնորհանդեսի մասնակիցները: Հանդիսատեսը գրքի էջերը մեկիկ-մեկիկ թերթեց հրավիրյալների միջոցով:

Գրքի շնորհանդեսն անցավ հրավառության նման: Այն կազմակերպված էր գեղագիտական բարձր ճաշակով՝ աչքի ու լսելիքի համար հաճո: Հանդիսասրահի վահանակներում տեղ գտած լուսանկարները վավերացնում էին «Սարդարապատ» միության շուրջ 38 տարվա գործունեությունը:

Գրքի բովանդակությունն ու առիթը ոգեշնչող էր, հնչեցին ոգևորիչ խոսքեր, օրինակ՝ Վանանդինը. «Կանք, պիտի լինենք ու դեռ շատանանք»:

Բայց ներկայացնենք գիրքը՝ ըստ շնորհանդեսի մասնակիցների:  

Միջոցառման հանդիսավար Արտույտ Զոհրաբյանն իր բացման խոսքում ներկայացրեց գրքից հատվածներ: Կարևոր շեշտադրումներով անդրադարձ արվեց նաև «Սարդարապատի» գործունեությունը։ Հանդիսավարն ընդգծեց այն փաստը, որ շատ նորություններ հենց այստեղ են առաջին անգամ տեղի ունեցել:

Թեհրանի հայոց թեմի առաջնորդ Տ. Սեպուհ արք. Սարգսեանի ուղերձն ընթերցեց Տեր Մաշտոց քահանան:

Թեմական առաջնորդի ուղերձով մեկնարկած միջոցառումը բացվեց միության անցյալի մասին պատմող տեսանյութով:

Իսլ. խորհրդարանում Թեհրանի եւ հյուսիսային իրանահայության պատգամավոր Արա Շահվերդյանը, բարձր գնահատելով միության կատարած աշխատանքները, հատուկ կարևորությամբ անդրադարձավ գրքի հրատարակման փաստին՝ այն համարելով քաղաքամասի մասին պատմող վավերագրություն:

Թ. Հ. Թ. Թեմական խորհրդի անունից ելույթ ունեցավ նաև ճրտ. Նորայր Արամյանը:

«Սարդարապատից՝ Սարդարապատ» գրքի շնորհանդեսի պաշտոնական արարողակարգը կատարելու համար հրավիրյալները, գրքի հեղինակի ընկերակցությամբ մոտենալով հրատարակված գրքի առաջին օրինակներին, քահանա հոր օրհնած օրինակի վրա թողեցին իրենց արձանագրությունները:

- Օրհնված օրինակը տեղադրվեց համապատասխան արկղի մեջ, որը պահվելու է միության վարչության պահարանում:

Սույն գրքի ամբողջ ծախսը հոգացել է միության անդամ, 5-րդ շրջանի վարչության նախագահ և ազգային-հասարակական վաստակավոր գործիչ Թաթուլ Եդիգարյանը:

Միջոցառմանը հաջորդը ելույթ ունեցավ բանաստեղծ Վարանդը, ով ներկայացրեց գիրքը՝ գլուխների հերթականությամբ ու բովանդակության կարևորությամբ:

«Սարդարապատից՝ Սարդարապատ» գրքի հեղինակ Հովիկ Մինասյանը ներկաներին պատմեց գրքի նյութերի հավաքագրման և ուսումնասիրությունների ընթացքը:

Հ.Մ. «Սարդարապատ» միության վարչության նախագահ Մուշեղ Ծատուրյանը վարչության անունից նրան հանձնեց նույն առիթով պատրաստված մի հուշանվեր:

Հանդիսատներից արվեստի գործիչ Սեթ Բեգիջանյանը, գնահատանքի խոսք ուղղելով կազմակերպիչներին, ծաղկեփունջ նվիրեց գրքի հեղինակին և վարչության նախագահին:

Վերջում Հ. Մ. «Սարդարապատ» միության վարչության խոսքն ընթերցեց միության համահիմնադիր Մուշեղ Ծատուրյանը:

Շնորհանդեսն ավարտվեց նախասարահում կազմակերպված ընդունելությամբ:

Քրիստինա Աբրահամյան

Քրիստինա Աբրահամյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝