ԶԱՐՄԱՆՔ

Չէ՛, ԱՄՆ դեսպան ԼԻՆ ԹՐԵՅՍԻՆ վերջերս զարմանալիորեն «ալաբուլա» է` մե՛կ կրունկները սրում է դեպի Բաքու` մեր թշնամու հետ գրկախառնվելու, մե՛կ տարածում հայտարարություն, որ ցույցերի ժամանակ ցանկացած պահի անսպասելիորեն բռնության դեպքեր կարող են բռնկվել: Հետո ԱՄՆ դեսպանատան տանիքին հայտնվում են դիպուկահարներ, թեեւ ծիծաղելի է անգամ ենթադրել, որ ցուցարարները կգրոհեն դեսպանատան վրա... Իսկ հիմա էլ դեսպանատունը զարմանալիորեն հայտարարում է. «Հորդորում ենք կողմերին պահպանել խաղաղությունը»: Միայն այդպիսի «խաղաղության աղավնին» էր մեզ պակաս, որ ավելի նմանվում է ագռավի: Ուստի, զարմանալով հանդերձ, պարզապես մեջբերենք քաղաքական մեկնաբան, բլոգեր, քաղաքացիական ակտիվիստ Աննա Աբրահամյանի պատասխանը սույն աստվածահաճո հիմնարկությանը. «#USEmbassyYerevan, հորդորում ենք Shut up and go home!! Your drunkenness costs Us another Genocide!!» (Ձայնդ կտրիր եւ գնա տուն: Ձեր գինարբուքի գինը մեզ մեկ այլ ցեղասպանություն կարժենա): Ինչեւէ, ասված է տիկնոջ մայրենի լեզվով, հուսանք` տիկին դեսպանը կհասկանա...

Իսկ ԵՎՐԱՄԻՈՒԹՅՈՒՆԸ մեր երկրում լրիվ խաղք ու խայտառակ եղավ: Քիչ էին այն զարմանալի կադրերը, թե ինչպես է տիկին դեսպանը խոնարհվում Նիկոլի առաջ, հիմա էլ զարմանալիորեն պարզվում է, որ ԵՄ տրամադրած միջոցներն ուղղվում են ժողովրդական ընդվզումը ճնշելուն: Ինչպես արձանագրում է քաղաքագետ Գագիկ Համբարյանը. «Դիլիջանի տեղական ինքնակառավարման մարմիններին տրամադրված եւ համայնքային շահերին սպասարկելու նպատակով Եվրոպական Միության համաֆինանսավորմամբ ձեռք բերված ավտոբուսն օգտագործվում է Հայաստանի ոստիկանության ուժերի շարժը Երեւան քաղաքում ապահովելու նպատակով: Թե այս խայտառակության համար երբ հրաժարական կտա Դիլիջանի քաղաքապետը, դա առանձին քննարկման հարց է, բայց որ Հայաստանում Եվրոպական Միության դեսպանը մեկ օր շուտ պետք է հետ կանչվի, այդ որոշումը Բրյուսելում հուսով եմ հնարավորինս շուտ կկայացվի»: Զարմանալի է, բայց փաստ. քրդին քոլոզ չի գալիս, իսկ մեզ` եվրոպական եւ ամերիկյան դեսպան:

Բողոքի ակցիաների մեջ իր օրիգինալությամբ աչքի էր ընկել ԱԺ-ի մոտ անցկացված «ուսապարկերի ակցիան», որից հետո ոստիկանները 11 քաղաքացու բերման են ենթարկել ոստիկանություն: Սովորաբար ցուցարարներին բերման են ենթարկում ոստիկանի «օրինական պահանջը» չկատարելու ձեւակերպումով, սակայն իրավապաշտպան ՌՈՒԲԵՆ ՄԵԼԻՔՅԱՆԸ զարմանալի բան էր ասել, որ նրանց մեղսագրում են տխրահռչակ «հայհոյանքի օրենքի» խախտում, եւ շատերին թվաց, թե պարոն Մելիքյանը կատակում է: Մինչդեռ նա, հրապարակելով ոստիկանական արձանագրության լուսանկարը, փաստում է. «Իմ շատ գործընկերներ ինձ չհավատացին, որ «ծանր վիրավորանքի» հոդված է դրվում` «ուսապարկերի» պատկերներներով ուսապարկերով խորհրդանշական բողոքի ակցիա իրականացնելու համար: Չեք հավատում` վ… վախենամ ստիպված եք հավատալ: Ահա` զեկուցագիրը: Ի դեպ, զեկուցագիրը ստորագրող ոստիկանի անունը դեռեւս փակել եմ, որպեսզի այդ մարդու հետ մի հատ խոսեմ` նոր տեղադրեմ: Էս մեկն էլ թող էսպես լինի: Ի դեպ-2, տեղում ոստիկանները պարզաբանեցին, որ մարդկանց բռնել են «տարածքը աղտոտելու համար»: Բայց փաստորեն զեկուցագրում ուրիշ բան են գրել: Դա ինքնին լուրջ խախտում է: Ի դեպ-3, բոլոր բռնվածները ազատ արձակվեցին: Ի դեպ-4, «ջերմ ողջույններս» էն մյուս տիկին դեսպանին»: Ինչպես կասեին տիկնայք դեսպանուհիները` No comment:

Զարմացած է ՀՈՎՀԱՆՆԵՍ ԳԱԼԱՋՅԱՆԸ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝