ԶԱՐՄԱՆՔ

Քաղաքացիական անհնազանդության ակցիաները բացահայտեցին մի զարմանալի իրողություն` որ գեներալ-մայորի կոչում ստացած ՀՀ ԱԱԾ պետական պահպանության ծառայության պետ ՍԱՐԳԻՍ ՀՈՎՀԱՆՆԻՍՅԱՆՆ այսուհետ արժանի է նաեւ գեներալ-խուլիգանի «պատվավոր» կոչմանը: Բանն այն է, որ մայիսի 2-ին նա զարմանալիորեն աչքի ընկավ աքացիներ տալով եւ հայհոյանքներով ինչպես ցուցարարների, այնպես էլ լրագրողների նկատմամբ: Թեեւ նիկոլախունտայի իշխանազավթման 4 տարիներին տեսել էինք գրեթե ամեն ինչ, սակայն սա առաջին դեպքն է, երբ տեսանյութերում եւ անգամ ուղիղ եթերում տեսնում ենք աքացի տվող գեներալ: Դե հասկանալի է, ում էլ «կապես» ՔՊ-ի կողքը, կա՛մ կծել կսովորի, կա՛մ աքացի տալ, սակայն միեւնույնն է, արտասովոր էր: Ինչեւէ, այդ վարքագծի համար Իշխան Սաղաթելյանը խոստացավ նրա ուսադիրները պոկել, իսկ նախկին օմբուդսմեն Արման Թաթոյանն արտահայտվեց ավելի բարեկիրթ. «Պետական պահպանության ծառայության պետին ու իր ենթականերին` չհամարձակվե՛ք մյուս անգամ նման բացահայտ անհարգալից վերաբերմունք ցուցաբերել քաղաքացիների նկատմամբ: Դա օրենքի կոպիտ խախտում է, եւ դուք դրա իրավունքը չունեք: Վերջ: Չհամարձակվե՛ք մյուս անգամ բռնություն գործադրել մասնագիտական գործունեություն իրականացնող լրագրողների նկատմամբ կամ խոչընդոտել նրանց աշխատանքը` այն էլ նման արհամարհական պահվածքով»:

Ծանոթացե՛ք, այս` դաժանությամբ լեցուն տմարդի հայացքով կերպարանքը Ոստիկանության զորքերի հրամանատար ՀԱՅԿ ԲԱԲԱՅԱՆ է: Ցուցարարների նկատմամբ դիմակավորված «ոստիկանների» դրսեւորած բացառիկ սադիզմի համար սոցիալական ցանցերում նրան արդեն ֆաշիստ են որակել, սակայն կարծում ենք, որ այդ որակումը վիրավորանք է ֆաշիստների հասցեին: Մի զարմանալի իրողություն. «Ըստ ոչ այդքան օդում կախված լուրերի` ներքին զորքերի հրամանատար Հայկ Բաբայանը հավանություն է ստացել նորին դավաճանություն Փաշինյանից` բիրտ ուժ կիրառել ցուցարարների նկատմամբ»,-  գրել է «Հայրենիք» կուսակցության խոսնակ Սոս Հակոբյանը: Դաժանությունն այնքան ակնառու է, որ անգամ զուսպ Արտակ Զաքարյանը գրել է. «Դիմակավորված ոստիկաններ, կեցցե՛ք: Այսօր ձեզ պահեցիք իսկական վայրագի պես... Ձեզանից թուրքերն անգամ սովորելու բան ունեն»:

Դե, իսկ եթե ուզում ես իմանալ ճշմարտությունը ՔՊ-ական խունտայի եւ վերջինիս պարագլծի մասին, ապա իմացիր գժից, ճժից կամ ԱՂԱԶԱՐՅԱՆ ՀՈՎԻԿԻՑ: Նա զարմանալիորեն նորից կիսվել իր «ոսկեղենիկ» մտքի «գանձերով»` կամա-ակամա բացահայտելով այս օրերին Նիկոլի հոգեվիճակին բնորոշ մութ կողմերն ու վախերը: Մասնավորապես` սպառնացել է փողոց փակելու միջոցով իրենց բողոքի ձայնը արտահայտող քաղաքացիներին կաթավածահար անել, եթե նրանք շարունակեն կաթվածահար անել երթեւեկությունը. «Փողոցում կարող են տարբեր պատրվակներով կանգնեցնել վարչապետի ավտոշարասյունը, եւ այն 200 հոգին, որ վխտում են քաղաքում, իրացնեն իրենց «պապաների» հանձնարարությունն ու սեւ գործը, այն է` սպանել վարչապետին»: Զարմանալի է, այդ ինչ աստիճանի են վախեցած սրանք, որ ցուցարարների միակ «զենքը»` ՀՀ եւ Արցախի դրոշները, աչքներին թնդանոթին հավասար մահաբեր սպառազինություն է երեւում: Համապատասխան դեղ խմեք, թե չէ ձեր փորլուծության գարշահոտից արդեն խեղդվում ենք:

Զարմացած է ՀՈՎՀԱՆՆԵՍ ԳԱԼԱՋՅԱՆԸ

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝