Արտահանման ծավալների կրճատման ռիսկ ունենք, ինչը կարող է հանգեցնել աշխատատեղերի կրճատման

 ՀՀ բանկերում այսօր ԱՄՆ 1 դոլարի միջին փոխարժեքը կազմում է 440-447 դրամ։ Ըստ Rate.am կայքի՝ դոլարի առքի ամենաբարձր գինը բանկերում 447 դրամ է, վաճառքի դեպքում ամենացածրը՝ 455 դրամ: Դոլարի այսպիսի փոխարժեք Հայաստանի արժութային շուկայում վաղուց չէր եղել։ Վերջին տարիներին, երբեմն արձանագրվող կտրուկ տատանումներով հանդերձ, այն հիմնականում պահպանվում էր 480-500 դրամի սահմաններում։ Այս թեմայի մասին Իրավունք թերթը զրուցել է Աուդիտորների պալատի նախագահ Նաիրի Սարգսյանի հետ։

-Պարոն Սարգսյան, վերջին մեկ ամսվա ընթացքում դոլարի կտրուկ անկում է նկատվում։ Ձեր կարծիքով ո՞րն է դոլարի արժույթի կտրուկ նվազման պատճառը։

- Դոլարի արժույթի նվազումը պայմանավորված է ժամանակավոր դուրս փոխանցման սահմանափակումներով։ Իր առաջին ազդեցությունը թողել է, երբ որ մենք սկսել ենք գազի դիմաց դոլարի փոխարեն վճարել ռուբլիով ինչի արդյունքում դոլարի պահանջարկը նվազել է։ Իսկ երկրորդ խոշորագույն շուկան Չինաստանն է, որն էլ պահանջում է վճարել յուանով։ Այսինքն մենք ունենում ենք դոլարի սովորական մուտքագրվող քանակից որոշակի ավելացումով մուտք և ունենք ելքի բավականին լուրջ սահմանափակում։ Եվ սա չէր կարող իր ազդեցությունը չթողնել հաշվի առնելով նաև այն, որ մենք ունենք մեր ԿԲ-ի կողմից կիրառվող սահմանափակումներ կախված արտարժույթի կանխիկացման թանկացման և կանխիկացման սահմանաչափի սահմանման հետ։ Այս սահմանափակումները ազդեցություն են թողել, որը պատճառ է դարձել փոխարժեքի նվազման։

-Ի՞նչ եք կարծում, արդյոք միջազգային կառույցները այդ սահմանափակումների համար ճնշում կգործադրեն ԿԲ-ի վրա։

- Այս պարագայում ոչ, չեմ կարծում, որ որևէ ճնշում լինի, քանի որ դա մեր երկրի ներքին քաղաքականությունն է և ռիսկային չի։

-Դոլարի անկումը տնտեսության վրա ի՞նչ ազդեցություն կարող է թողնել։

- Անկումը բացասական ազդեցություն է թողնում արտահանման վրա։ Այլ բան է 1000$-ի դիմաց ստանալ 480000-500000 դրամ, այլ բան է ստանալ՝ 440000 դրամ։ Այս դեպքում արտահանման ծավալների կրճատման ռիսկ ունենք հետևաբար նաև ունենք աշխատատեղերի կրճատման և աշխատավարձերի նվազման ռիսկեր ունենք շատ լուրջ մինչև որ շուկային նոր ադապտացում և գնանշաններ տրվեն։ Ներմուծման մասով որոշակի բարելավում կունենանք, այսինքն ներմուծվող ապրանքների գնանկում կլինի։

Սոնա Գիշյան

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝