Նախ` եկեք գտնենք քաղաքապետին, հետո` նոր պահանջենք հրաժարականը. Հռիփսիմե Առաքելյան

Երեւանի ավագանին 47 կողմ, 1 ձեռնպահ ձայներով Երեւանի փոխքաղաքապետ ընտրեց Սերգեյ Ներսեսյանին: Նորընտիր փոխքաղաքապետի, Երեւանի ավագանու նիստին քաղաքապետ Հայկ Մարությանի բացակայության, ընդունված ու առաջարկվող նախագծերի, ինչպես նաեւ ներքաղաքական առաջիկա ծրագրերի մասին, «Իրավունքը» զրուցեց Երեւանի ավագանու «Բարգավաճ Հայաստան» խմբակցության քարտուղար ՀՌԻՓՍԻՄԵ ԱՌԱՔԵԼՅԱՆԻ հետ:

«ՔԱՂԱՔԱՊԵՏԸ ՊԱՐԲԵՐԱԲԱՐ ԻՆՔՆԱՄԵԿՈՒՍԱՑՈՒՄՆԵՐԻ ՊՐՈՑԵՍՈՒՄ Է»

– «Իմ քայլը» խմբակցությունն ունի 57 ավագանի: Ստացվում է` նոր փոխքաղաքապետին ընտրել է իմքայլականների միայն մի մասը: Եթե անգամ իշխող խմբակցությունը չի վստահում իր առաջադրած փոխքաղաքապետի թեկնածուին, ի՞նչ ակնկալենք նրա պաշտոնավարումից:

– Այս փոխքաղաքապետի թեկնածության մասին իմացել եմ մամուլից, եւ տեղեկությունը, որին տիրապետում եմ, եղել է այն, որ նա ԱԺ մի շատ անհայտ, կորած-մոլորած պատգամավորի օգնական էր: Այսինքն` իր մասին տեղեկատվությունն այսքանով սպառվում է, եւ այնպես չի եղել, որ մեզ հետ քննարկվել է կամ ինքը ցանկություն է ունեցել ինչ-որ կերպ ավելի լավ ներկայացնելու իրեն: Երեկ` ընտրության օրը, ընդամենն իր կենսագրական տվյալները կային մեր ձեռքի տակ, որտեղ մի տողով նշել էր, որ աշխատել է ԱԺ աշխատակազմում, հիմա աշխատում է Հանրային խորհրդի ֆինանսատնտեսական բլոկում եւ մի շարք խորհրդատվական գործունեություններ է իրականացրել, ինչպես նաեւ մասնավոր ինչ-որ ընկերություն է ղեկավարել եւ այլն: Սա ինձ` որպես ավագանու անդամի, փոխքաղաքապետի պաշտոնի համար ոչինչ չասող կենսագրություն է: 28-29-ամյա երիտասարդի համար միգուցե` այո, ներկայանալի է, այս մարդը կրթություն է ստացել, տնտեսագետ է, բայց ուզում եմ հասկանալ` որեւէ մեկը պատկերացնո՞ւմ է, որ Երեւանի համայնքային բյուջեն տնօրինելը, բաշխելը, այդ ամբողջ պատասխանատվությունը վերցնելը, շատ բարդ գործառույթ է: Քավ լիցի, ոչ մեկին չեմ ասում, որ չեն կարող, բայց արդյոք որեւէ մեկը, որ մտնում է պաշտոնի տակ եւ ստանձնում է այդ պարտականությունը, վստա՞հ է, որ կարողանալու է իրականացնել իր գործառույթը: Ընդ որում` այն պարագայում, երբ նույն այդ անձը աշխատանքային զրո փորձ ունի պետական համակարգում կամ համայնքային: Ուղղակի, լավ է էլի` պաշտոն են առաջարկել, ասում են` գնանք, այդ պաշտոնում մի քիչ էլ մենք մնանք: Ցավոք, այդ նույն տրամաբանությամբ է ամեն ինչ այսօր մեր երկրում տեղի ունենում:

– Ողջ ամառ գրեթե չէր երեւում Հայկ Մարությանը, իսկ ո՞ւր էր երեկ` ավագանու նիստի ժամանակ: Ի վերջո, եթե անգամ իրականում առողջական խնդիրներ ունի, արդյոք չի՞ նշանակում, որ այս տեմպերով առաջիկայում կանգնելու ենք նոր քաղաքապետ ընտրելու խնդրի առաջ:

– Ճիշտն ասած, տեղեկություն չունեմ, թե ուր էր քաղաքապետը: Նրան վերջին անգամ քաղաքապետարանի լրատվական վարչության պատրաստած հաղորդման ժամանակ եմ հանդիպել` այն էլ տեսաձայնագրության տեսքով: Թե հիմա ուր է, ինչո՞ւ նիստին չկար, չգիտեմ: Նիստը երեկ մեկնարկեց 10-15 րոպե ուշացումով, կարծում եմ` եթե նախապես պլանավորված լիներ, որ պետք է նիստը վարեր քաղաքապետի առաջին տեղակալ Հրաչ Սարգսյանը, ապա միանգամից ժամը` 11:00-ին նիստի մեկնարկը կտրվեր: 10-15 րոպե հավանաբար սպասեցին, տեսան, որ քաղաքապետը ներկա չէ, եւ դրա արդյունքում արդեն փոխքաղաքապետը ստանձնեց նիստը վարելու իր պարտականությունը: Թե ինչ է պատահել այս անգամ քաղաքապետին, անկեղծ ասած, տեղյակ չեմ, բայց չեմ էլ զարմանում: Մեր քաղաքապետը մարտից մինչեւ հիմա պարբերաբար ինքնամեկուսացումների եւ կարանտինից կարանտինի պրոցեսում է եղել: Այդ ընթացքում մատների վրա կարող ենք հաշվել, թե երբ է քաղաքապետն ինչ-որ մի տեղ ակտիվ գործունեությամբ զբաղվել:

«ԳԱԳԻԿ ԾԱՌՈՒԿՅԱՆԻ ՀԱՅՏԱՐԱՐՈՒԹՈՒՆՆ ՈՒԺԻ ՄԵՋ Է»

– Գագիկ Ծառուկյանը դեռ ամիսներ առաջ հայտարարեց` կառավարության 100 տոկոսանոց փոփոխության անհրաժեշտության մասին: Իսկ Դուք չե՞ք պատրաստվում պահանջել քաղաքային իշխանության 100 տոկոսանոց փոփոխություն եւ անվստահություն հայտնել քաղաքապետ Հայկ Մարությանին:

– Այն սկզբունքները, որոնք որդեգրել է «Բարգավաճ Հայաստանը», եւ պարոն Ծառուկյանի հունիսի 5-ի հայտարարությունը ուժի մեջ է` չնայած նրան, որ տարբեր մանիպուլիացիաներ, անընդհատ սխալ տեղեկատվության թրոլինգներ են անում մամուլում, թե ԲՀԿ-ն պասիվ է: Իրականում ոչ մի պասիվություն չկա: Պարզապես, այս պահին ուսումնասիրությունների փուլում ենք: Ինչ վերաբերում է քաղաքային իշխանությանն ու քաղաքապետին, քաղաքապետը պետք է տեղում լինի, որ մի հատ էլ իր հրաժարականը պահանջես, այս մարդը չկա: Ինձ մոտ այնպիսի տպավորություն է, որ ինքն ուզում է գնալ, բայց իր թիմը չի թողնում` ասելով, թե լավ, ամոթ է, մի քիչ էլ մնա: Անգամ, ըստ օդում կախված լուրերի, նա որոշած է եղել, որ պետք է գնա, բայց երբ մամուլը բարձրաձայնեց այդ տեղեկատվությունը, մամուլին սխալ հանելու համար, անմիջապես ասացին, թե` մի քիչ էլ մնա, հետո կգնաս: Միգուցե այդպե՞ս է: Այնպես որ, նախ` եկեք գտնենք քաղաքապետին, հետո` նոր պահանջենք հրաժարականը: Ինքնահոսի գնում է քաղաքապետարանի աշխատանքը, որը շատ ցավալի է, որովհետեւ Երեւանը մեր երկրի կարեւորագույն եւ ամենաշատ ընտրողներ ունեցող համայնքն է, մոտ մեկ միլիոն եւ ավել բնակչություն է ապրում մայրաքաղաքում: Մինչդեռ հիմա, կարելի է ասել, որ Երեւան քաղաքը բարձիթողի վիճակում է, որն ավելի ցցուն կերպով արտահայտվեց կորոնավիրուսային ճգնաժամի ժամանակ: Այս հարցով քաղաքապետին մինչեւ այսօր փնտրում ենք ու չենք գտնում:

– Ե՞րբ է տեղի ունենալու Գագիկ Ծառուկյանի խոստացած հանրահավաքը:

– Մարզային այցերից հետո, երբ կլինեն մարզերի այցելությունների արդյունքները, բնականաբար, տեղեկատվությունը կհրապարվի, թե երբ եւ որտեղ է տեղի ունենալու: Հիմա իրականացվում են մարզային բնակիչների հետ հանդիպումներ, շտաբների թարմացում, այս գործընթացներն ավարտելուց հետո` ենթադրում եմ կուսակցության մամուլի քարտուղարը կներկայացնի:

– Իսկ ե՞րբ եք պատրաստվում վերադարձնել Երեւանի ավագանու «Բարգավաճ Հայաստան» խմբակցության այն մանդատը, որն օգտագործում է Լյուդմիլա Սարգսյանը, սակայն այլեւս չի կիսում Ձեր քաղաքական դիրքորոշումները:

– Մեր օրակարգում այդպիսի հարց չկա: Տիկին Լյուդմիլան մեր լավ ու հարգված գործընկերն է: Բոլորս գիտենք, որ նա նաեւ ՍԴՀԿ կուսակցության ատենապետն է, բայց սիրով է աշխատում մեզ հետ: Այնպես որ, այդ խնդիրն այս պահին չունենք, քաղաքային աշխատանքի առումով կարողանում ենք համագործակցել: Սա իր իրավունքն է, եւ իրենից որեւէ մեկը մանդատ խլելու ցանկություն չունի: Մենք բացարձակ այդ գործելաոճով չենք զբաղվում, եւ սա եւս մեկ անգամ առիթ է ասելու, որ` այո, կարող է մեր թիմի ներսում լինեն որոշ հարցերի նկատմամբ տարաձայնություններ, բայց հանուն ընդհանուր շահերի շարունակենք համագործակցել միասին:

ՀՐԱՆՏ ՍԱՐԱՖՅԱՆ