Հնարավոր է՝ հանդիսատեսն իրեն կամ իր հարազատին գտնի այս բեմադրության մեջ. Բեմադրիչ

Օրերս Կ. Ստանիսլավսկու անվան ռուսական դրամատիկական թատրոնում կայացավ առաջնախաղ: Հանդիսատեսի դատին հանձնվեց «Գարդենիա»՝ ըստ լեհ երիտասարդ դրամատուրգ Էլջիբեթա Հովանեցի համանուն պիեսի (թարգմանությունը՝ Իրինա Ադելգեյմի) ներկայացումը, որի բեմադրիչը Գոռ Մարգարյանն է:

«Գարդենիա» ստեղծագործությունն ունի գեղարվեստական բարձր արժեք իր նախ պատմողական, ապա՝ երկխոսությունների հստակ, կտրուկ, թվացյալ պարզ լեզվի շնորհիվ։ Այն ուղերձ է այսօրվա ընթերցողի, ապա՝ հանդիսատեսի համար՝ ինքնաճանաչողության, կնոջ դերակատարման, նրան ուղղված նախախնամ մարտահրավերների վերլուծությամբ։

Չորս կին, որ հայտնվել են նույն ընթացքի մեջ, չորսն էլ գեղեցիկ, չորսն էլ անանուն, ընդամենը համարակալված, չորսն էլ մտովի, ենթագիտակցաբար, նույնիսկ՝ անգիտակցաբար, փնտրում են իրենց սեփական ընտանիքի պատկերը՝ այդ փնտրտուքի ճանապարհին բացահայտելով իրենց ներսում քնած զգայական աշխարհը, որի ցուցադրումը ստեղծագործության հեղինակը կարողացել է հմտորեն պրոյեկտել կենցաղային խնդիրների ու ցանկությունների վրա։

Ներկայացման մեջ խաղում են թատրոնի դերասաններ՝ ՀՀ վաստակավոր արտիստ Իռա Հարությունյանը, Ելենա Վարդանյանը, Հայարփի Զուռնաչյանը եւ Աննա Մանուչարյանը: Նկարչական ձեւավորումն ու զգեստները՝ Նելլի Բարսեղյանի:

Մեզ հետ զրույցում ռեժիսոր Գոռ Մարգարյանն ասաց, որ հնարավոր է՝ հանդիսատեսն իրեն կամ իր հարազատին գտնի այս բեմադրության մեջ:

«Ներկայացումը հետաքրքիր է եւ այլ բեմադրություններից տարբերվում է ձեւաչափով ու բեմադրական լուծումներով: Այն խաղում ենք բացօթյա հարթակում ոչ այն պատճառով, որը մեզ այսօր թելադրում է աշխարհում տիրող իրավիճակը: Ի սկզբանե մտածված էր այն բեմադրել Ռուսական թատրոնի բակում, որտեղ կատարվել են բեմանկարչական աշխատանքները: Սա մեզ համար եւ՛ հետաքրքիր է, եւ՛ նոր»,-պատմեց Մարգարյանն ու հավելեց, որ, երբեմն, փողոցի աղմուկն է խանգարում, բայց բոլոր խնդիրները փորձում են օգտագործել ի շահ ներկայացման, ի շահ ստեղծագործության։

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝