Մենք  պետք է  միշտ խաղաղությամբ պատրաստվենք պատերազմի. առաջին հետախուզադիվերսիոն ջոկատի հրամանատար, հայտնի հետախույզ Վովա Վարդանով

Ինչպես եւ տեղեկացրել էինք մեր ընթերցողին, կարճատեւ արձակուրդից հետո կրկին «Իրավունք TV»-ի եթերում է Գայանե Զարգարյանի հեղինակային ԱԶԱՏ ԽՈՍՔ հաղորդաշարը: Ապրիլյան պատերազմի թնջուկի, Տավուշյան մարտերի, լայնամասշտաբ ռազմական գործողությունների վերսկսման եւ այլ ուշագրավ հարցերի շուրջ զրուցել են հաղորդման հեղինակն ու առաջին հետախուզադիվերսիոն ջոկատի հրամանատար, հայտնի հետախույզ ՎՈՎԱ ՎԱՐԴԱՆՈՎԸ:

Նախ անդրադառնալով ապրիլյան պատերազմի ժամանակ ազերիներին անցած երկու դիրքերի խնդրին` պարոն Վարդանովը նկատեց.
- Ապրիլյան պատերազմում կորցրած դիրքերը` Թալիշի եւ Լելե Թեփեի բարձունքները, շատ կարեւոր մարտավարական դիրք էին, որոնք կարող էին դառնալ պլացդարմ, որպեսզի ազերիները իրենք ներխուժեն դեպի Սարսանգ, Քարվաճառ ուղղություն: Թուրքը հիմար չէր, որ հենց այդ երկու ուղղության վրա հիմնական հարվածը կենտրոնացրեցª հսկայական ռեսուրսներ եւ ժամանակ ծախսելով: Բոլորին թվում է, թե այդ դիրքերի գրավումը տեղի է ունեցել ապրիլի 2-ին, բայց ոչ, այդ օպերացիան սկսվել 2013-2014 թվականներից: 
Այդ թվականներից թուրքական դիվերսիոն ակտիվությունը դիտարկվում էր որպես ընդամենը Բաքվի Սուլթանի կապրիզ: Բայց իրականում իրենք  փորձ էին  ձեռք բերում, ականազերծման աշխատանքներ էին իրականացնում: Մարտն է սկսվել ապրիլին, բայց օպերացիան վաղուց էր սկսել թշնամին:
- Ըստ Ձեզ, երկա՞ր էր պատրաստվել հակառակորդը ապրիլյան քառօրյա պատերազմին:
- Այո: Իսկ զարմանք չի՞ առաջացնում, որ համատարած ականապատ դաշտերի վրա գրեթե ոչ մի թուրք չի պայթել. այդ ո՞նց եղավ: Իրենք ականազերծել էին այդ տարածքները, ճաապարհներ էին բացել, հսկայածավալ աշխատանքեր էին արել:
- Իսկ որտե՞ղ էր մեր հետախուզությունը: Մասնավորապես` ականազերծում թույլ տալու կամ դրանից եզրակացությունների չգալու հարցո՞ւմ են թերացել:
- Մեր հետախուզությունը աշխատում էր: Այլ բան, թե ամփոփելով աշխատանքները, ճիշտ եզրակացությա՞ն են եկել: 
- Ամփոփելով ապրիլյան քառօրյայի կարեւորագույն թեման, ի՞նչ կարծիք ունենք, մենք հաղթեցի՞նք, թե պարտվեցինք այդ պատերազմում: Հաշվի առնելով նաեւ, որ Սերժ Սարգսյանի հայտնի ասուլիսից հետո այդ հարցը առավել բուռն քննարկումների դաշտ մտավ: 
- Մենք ինչ-որ փուլում հաղթել ենք, իսկ ինչ-որ փուլումª պարտվել: Պարտությունները եղել են մեզ համար ցավալի, իսկ հաղթանակները` հաճախ մնացել աննկատ: 
- Պարոն Վարդանով, օրինակ, Արցախի նախագահ  Արայիկ Հարութունյանը ասել է, որ 2016 թվականին Ստեփանակերտի օդային տարածքը պաշտպանված չէր:
- Ես չեմ կարծում, որ ԱՀ նախագահը նկատի ուներ, որ ընդհանրապես անպաշտպան էր օդային սահմանը: Ուղղակի, հիմա ավելի պաշտպանված է: Որովհետեւ վերջին չորս տարիների ընթացքում որոշ համակարգեր են ձեռք բերվել, որոնք առաջնահերթությամբ տեղադրվել են Արցախում: 
- Ապրիլյանից հետո հաջորդ մասշտաբային բախումը եղավ Տավուշում: Տավուշյան էսկալացիան Թուրքիայի մտահղացո՞ւմն էր` ըստ Ձեզ: 
- Պարտադիր չէ: Պարզապես չմոռանանք, որ ցանկացած նորմալ երկիր ցանկանում է ցանկացած իրավիճակից շահող դուրս գալ. դա է երկրի հզորությունը:
 
Ամբողջական հաղորդումը դիտեք  «Իրավունք TV»-ի եւ «ԱԶԱՏ ԽՈՍՔ» հաղորդաշարի յութուբյան ալիքներում:

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝