«ՊԱՅՔԱՐԵՆՔ ՄԵՐ ՄԱՆԿՈՒԹՅԱՆ ԵՐԵՎԱՆԻ ՀԱՄԱՐ»

«ՊԱՅՔԱՐԵՆՔ ՄԵՐ ՄԱՆԿՈՒԹՅԱՆ ԵՐԵՎԱՆԻ ՀԱՄԱՐ»

Ընդամենը օրեր առաջ ՀՀ քաղաքաշինության նախարար Նարեկ Սարգսյանը լրագրողներիս վստահեցնում էր, որ միայն ծայրահեղ դեպքում է երեւանյան հին շենք քանդվելու, ու ինքն անձամբ դեմ է այդպիսի շենքերի քանդմանը: Ավելին` ըստ նախարարի. «Անընդհատ լրատվության մեջ տեսնում եմ ինչ-որ կարծիքներ, թե Պատկերասրահն են քանդում կամ մեկ ուրիշ շենք, հասեք-փրկեք, չկա նման բան: Երբեւիցե չի եղել որեւիցե կառավարության կամ քաղաքապետարանի օրակարգում այդպիսի խնդիր»: Բայց, արի ու տես, որ օրակարգից դուրս շարունակվում են քանդվել երեւանյան հին շենքերը, եւ հիմա էլ հերթը հասել է Ամիրյան 2 հասցեում գտնվող Ավ. Իսահակյանի անվան գրադարանի նախկին շենքի ճակատային մասին:

 

Շինարարները սպասում են հարմար պահի շենքը հատվածաբար ապամոնտաժելու համար` խոստանալով, որ այն ավելի ուշ վերականգնելու են: Իսկ ակտիվիստներն ու մտահոգ քաղաքացիները հերթապահություն են սահմանել` թույլ չտալով, որպեսզի վերացվի եւս մի երեւանյան հին շենք: Նրանց թվում է նաեւ «Հանուն օրենքի» հասարակական շարժումը, որի համակարգող խմբի անդամ ԱՐՄԱՆ ՂՈՒԿԱՍՅԱՆԸ «Իրավունքի» հետ զրույցում նշեց հետեւյալը. «Մենք թույլ չենք տալու, որ քանդվեն մեր քաղաքի արժեքները, ու տեր ենք կանգնելու դրանց: Եվ եթե մեզ ցույց չտան համապատասխան քանդման մասին հիմքերը, որոնք կասկածում եմ, որ գոյություն ունեն, ապա բոլոր օրինական ճանապարհներով թույլ չենք տալու որեւիցե քար պակասի գրադարանի շենքի ֆասադից»:

Ինչեւէ, հուսանք` այս անգամ պայքարն իր արդյունքը կտա, այլապես ստացվում է` ինչ-որ մեկի սրտով չէ, որպեսզի Ամիրյան 2 հասցեում կրկին գործի գրադարանը, որի վերանորոգման աշխատանքները անհիշելի ժամանակներից սկսել ու առ այսօր չի ավարտվել: Թեպետ ճարտարապետ Դավիթ Մկրտչյանը երեկ հրապարակել էր շենքի նախագիծը, ըստ որի, նախկին կառույցը պահպանվում է ու վրան էլ` կարկատան արվում մի անհասկանալի շենք:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝