ԳՈՐԾԱՐԱՐ ՊԱՏԳԱՄԱՎՈՐԸ ԿՈԱԼԻՑԻԱՅԻ ՄԱՍԻՆ. ՄԻ ԳԼՈՒԽԸ ԼԱՎ Է, ԵՐԿՈՒՍԸ` ԱՎԵԼԻ ԼԱՎ

ԳՈՐԾԱՐԱՐ ՊԱՏԳԱՄԱՎՈՐԸ` ԿՈԱԼԻՑԻԱՅԻ ՄԱՍԻՆ. ՄԻ ԳԼՈՒԽԸ ԼԱՎ Է, ԵՐԿՈՒՍԸ` ԱՎԵԼԻ ԼԱՎ

ՀՀԿ պատգամավոր, մեծամասնական ընտրակարգով ընտրված Գարեգին Նուշիկյանի կարծիքով Սերժ Սարգսյանի  փետրվարի 12-ի ելույթը ուղղված էր թե հանրությանը, թե քաղաքական գործիչներին:

Թե ինչ ենթատեքստեր կան Սերժ Սարգսյանի ելույթում,  Գարեգին Նուշիկյանը  դժվարացավ ասել:

- Պարոն Նուշիկյան, Սերժ Սարգսյանը նաեւ հայտարարել է, որ հաջորդ խորհրդարանում ոչ մեկի տեղն ապահովագրված չէ:  Չե՞ք մտահոգվում, որ հաջորդ խորհրդարանում  գուցե չլինեք:

- Ոչ մեկն էլ երաշխավորված չէ, որ հաջորդ խորհրդարանում կլինի: Ես աշխատում եմ այնպես, ինչպես աշխատել եմ:  Խորությամբ դեռ չեմ մտածել` կցանկանա՞մ լինել հաջորդ ԱԺ-ում: Դեռ ժամանակ կա մինչ հաջորդ ընտրությունները: Թե՛ պատգամավոր դառնալուց հետո, թե՛ մինչ այդ իմ կյանքում, ըստ էության, ոչինչ չի փոխվել:

- ՀՀԿ-ՀՅԴ կոալիցիան մի քանի պորտֆելի կռի՞վ է, թե՞ ինչպես դաշնակցականներն են ասում, երկրում իրավիճակ փոխելու համար են իշխանության ձգտում:

- Լավ կլիներ, որ Ձեր երկրորդ ասածը լիներ: Ինչո՞ւ մենակ ՀՅԴ-ը: Չէ՞ որ  այլ  կուսակցություններ էլ կան, որոնք  կցանկանային  պատասխանատվություն վերցնել…

- Օրինակ:

- Բոլոր կուսակցությունների մասին է խոսքս: Չէ՞ որ  ապրում ենք ծանր ժամանակաշրջան ե՛ւ արտաքին, ե՛ւ ներքին մարտահրավերների առումով:

-ՀՅԴ խմբակցության  ղեկավար Արմեն Ռուստամյանը  վերջերս հայտարարել է, որ իշխանությունը հեղինազրկված է:  Ինչպե՞ս եղավ, որ հեղինակազրկված իշխանության հետ  ՀՅԴ-ը ցանկանում է   կոալիցիա կազմել:

- Դե գիտենք, ցանկացած իշխանություն  որոշ ժամանակ աշխատելուց հետո  հիմնականում վարկանիշի անկում  է ունենում, քանի որ հանրության սպասումները շատ են, հնարավորությունները` քիչ: Այդպիսի իրավիճակ է Ֆրանսիայում, Գերմանիայում:  Բայց այսօր դժգոհ են, վաղը կարող են գոհ լինել:

- Այսինքն, Արմեն Ռուստամյանի հայտարարությունը ճի՞շտ եք համարում: Նա ասում էր, որ ՀՅԴ –ի համագործակցության շնորհիվ  իշխանության հեղինակությունը կբարձրանա:

- Ես համաձայն չեմ, որ ՀՅԴ-ը գալիս է իշխանության հեղինակությունը բարձրացնելու: Բայց դաշնակցության գալուն դրական եմ վերաբերվում, քանի որ խելացի անձնավորություններ կան ՀՅԴ-ի ներսում: Ամեն դեպքում մի գլուխը լավ է, երկուսը` ավելի լավ:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝