ՈՒՐ Է ՀԱՍԵԼ ՔՐԵԱԿԱՆ ՀԵՂԻՆԱԿՈՒԹՅԱՆ ՍՊԱՆՈՒԹՅԱՆ ԳՈՐԾԸ

ՈՒՐ Է ՀԱՍԵԼ ՔՐԵԱԿԱՆ ՀԵՂԻՆԱԿՈՒԹՅԱՆ

ՍՊԱՆՈՒԹՅԱՆ ԳՈՐԾԸ

ԱԱԾ-ում քննվող երրորդմասցի Լյովիկի եւ նրա մտերիմների սպանության գործով դեռեւս որեւէ նորություն չկա, սակայն առաջիկա տաս օրերի ընթացքում հավանաբար նորություններ կլինեն քրեական գործից: Այս մասին iravunk.com-ի թղթակցի հետ զրույցում ասաց քրեական հեղինակության սպանության մեջ կասկածվող քրեական աշխարհում ոչ պակաս հայտնի մականուններով Գաստրիկի, Տլեի եւ Ծգլի փաստաբաններից Երվանդ Վարոսյանը:

Հիշեցնենք, որ մարտի 4-ին, ժամը 13։59-ին ոստիկանությունը ահազանգ էր ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել էին 1 զոհի եւ 2 վիրավորի, վիրավորներին տեղափոխել են «Էրեբունի» ԲԿ, ճանապարհին նրանք մահացել էին։ Մի քանի հոգի կրակ են բացել «Նուբարաշեն» ՔԿՀ-ի մոտ, որի հետեւանքով կա երեք զոհ: Կրակոցների հետեւանքով մահացած երեք անձանցից մեկը Լեւոն Ղազարյանն է, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը, մահացել է տեղում՝ ՔԿՀ-ի ավտոկայանատեղիում, որտեղ տեղի է ունեցել դեպքը։

Դեպքի առնչությամբ Քննչական կոմիտեում քրեական գործ էր հարուցվել ՔՕ 104 հոդվածի 2-րդ մասին 1-ին կետով եւ 235 հոդվածի 1-ին մասով: ՀՀ քրեական օրենսգրքի 104  եւ 235 հոդվածների հատկանիշներով մեղադրանք էր առաջադրվել 1986 թ. ծնված Սարգիս Գրիգորյանի (մականունը՝ Ծգլ), 1984 թ. ծնված Սարգիս Հախանումյանի (մականունը՝ Տլե) եւ 1984 թ. ծնված Վահան Հակոբյանի (մականունը՝ Գաստիկ) նկատմամբ:

ԻԼՈՆԱ ԱԶԱՐՅԱՆ