ՓԱՇԻՆՅԱՆԸ ՎԵՐԱՊԱՀՈՒՄՆԵՐ ՈՒՆԻ ՄԱՐՏԻՄԵԿՅԱՆ ՀԱՆՐԱՀԱՎԱՔԻ ՎԵՐԱԲԵՐՅԱԼ

ՓԱՇԻՆՅԱՆԸ ՎԵՐԱՊԱՀՈՒՄՆԵՐ ՈՒՆԻ ՄԱՐՏԻՄԵԿՅԱՆ ՀԱՆՐԱՀԱՎԱՔԻ ՎԵՐԱԲԵՐՅԱԼ

Ազատության հրապարակում «տնավորված» «Նոր Հայաստան» հանրային փրկության ճակատը որոշել է այս տարի մարտիմեկյան հանրահավաքի նախաձեռնությունը վերցնել իր վրա: Այս կապակցությամբ վերջիններս առաջարկել են հայաստանյան ընդդիմադիր ուժերին մարտի 1-ին համատեղ հանրահավաք անցկացնել: Թե այս շարքում արդյոք ԱԺ ՀԱԿ խմբակցության պատգամավոր Նիկոլ Փաշինյանն իր «Քաղաքացիական պայմանագիր» կուսակցությամբ կմասնակցի՞ հանրահավաքին, «Իրավունքը» պարզեց կուսակցության մամուլի խոսնակ ԱԼԵՆ ՍԻՄՈՆՅԱՆԻՑ.

– «Նոր Հայաստան» հանրային փրկության ճակատի Քաղաքական խորհրդի անունից մարտի 1-ի հանրահավաքին մասնակցելու պաշտոնապես հրավեր է եկել «Քաղաքացիական պայմանագիր» կուսակցությանը: Նրանք պարոն Փաշինյանի հետ են հանդիպել, եւ նա իր դիրքորոշումը հայտնել է: Այն է` պատրաստ ենք մասնակցել մարտիմեկյան հանրահավաքին, եւ կարծում ենք, որ հանրահավաքի հիմնական թեման պետք է լինի 2008 թվականի մարտի 1-ից բխող քաղաքական օրակարգը, որը հրատապ է նաեւ այսօր: Ինչպես նաեւ միանշանակ պաշտպանում ենք «Նոր Հայաստանի» առաջ քաշած օրակարգի երկրորդ կետը` քաղբանտարկյալների ազատ արձակման պահանջը: Բայց վերապահումներ ունենք մարտիմեկյան հանրահավաքի համար առաջ քաշած օրակարգի 3-րդ եւ 4-րդ կետերի վերաբերյալ, որոնք որոշակի պարզաբանումների կարիք ունեն: Գտնում ենք, որ անհրաժեշտ է հանրահավաքի եւ հնարավոր երթի վերաբերյալ սցենարը համաձայնեցնել հանրահավաքի մասնակից բոլոր ուժերի հետ, եւ այս կապակցությամբ ձեռք բերվի կոնսենսուս, ու քայլերի մասին հայտարարվի այդ ուժերին:

ՀՐԱՆՏ ՍԱՐԱՖՅԱՆ

Հ.Գ.- Հավելենք, որ «Նոր Հայաստանի» մարտիմեկյան օրակարգի 3-րդ ու 4-րդ կետերով պահանջվում է. «Հայտարարել համաներում` բանտերի գերբեռնվածության հետեւանքով բանտարկյալների փաստացի խոշտանգումը վերացնելու, ինչպես նաեւ այդ համակարգում առկա համատարած կոռուպցիայի ռիսկերը մասամբ չեզոքացնելու նպատակով եւ վարչախմբի ձեռքում բռնության գործիքի վերածված ոստիկանության զորքերի ռեսուրսները ազգային անվտանգության ապահովման առաջնահերթ շահերի թելադրանքով տրամադրել հայ-ադրբեջանական սահմանի պահպանությանը»:

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝