ՀԱՅ ԱՌԱՔԵԼԱԿԱՆ ԵԿԵՂԵՑԻՆ ՄԵԾ ՇՈՒՔՈՎ ՆՇԵՑ ԲՈՒՆ ԲԱՐԵԿԵՆԴԱՆԻ ՏՈՆԸ

ՀԱՅ ԱՌԱՔԵԼԱԿԱՆ ԵԿԵՂԵՑԻՆ ՄԵԾ ՇՈՒՔՈՎ ՆՇԵՑ ԲՈՒՆ ԲԱՐԵԿԵՆԴԱՆԻ ՏՈՆԸ

Այսօր Հայ Առաքելական Սուրբ եկեղեցին մեծ շուքով նշեց Բուն Բարեկենդանի տոնը: Առաջնորդանիստ Սուրբ Սարգիս եկեղեցում տոնը սկսվեց Պատարագով, որից հետո տեղի ունեցավ դիմակներով շքերթ: Տասնյակ երիտասարդներ, դհոլահարների, ազգային երգ ու պարի խմբեր, հեքիաթի հերոսներ Մաշտոցի պողոտայով շարժվեցին դեպի Ազատության հրապարակ, որտեղ էլ Բուն Բարեկենդանը վերածվեց մեծ տոնախմբության: Հավատարիմ մնալով «Վերականգնենք ազգային տոները» խորագրին, Արարատյան Հայրապետական թեմի երիտասարդներն արդեն երրորդ տարին տոնի շրջանակներում կազմակերպում են զանազան խաղեր, մրցույթներ, ներկայացնում տարբեր բեմադրություններ`տոնի երբեմնի ժողովրդականությունը վերկանգնելու համար: Սուրբ Սարգիս եկեղեցու հոգեւոր հովիվ Տեր ՊԵՏՐՈՍ ավագ քահանա ՄԱԼՅԱՆԻ խոսքով`տարի առ տարի տոնը մեծ ժողովրդականություն է վայելում եւ այն նշում է ամբողջ քրիստոնյա աշխարհը. «Սուրբ Սարգսի տոնից հետո բոլորը հետաքրքրվում էին, թե Բուն Բարեկենդանը երբ են նշելու: Այս տարի ամեն ինչ հրաշալի էր, տոնի նկատմամբ հետաքրքրությունը կա ոչ միայն Հայաստանից, այլեւ սփյուռքից: Այս ամենով ոչ միայն հայ երիտասարդներն են վերադառնում իրենց արմատներին, այլեւ արմատներին են վերադարձնում ուրիշներին: Եթե ծառն իր արմատից կտրես` կչորանա, նույն էլ մենք ենք` հեռանալով մեր արմատներից, կդադարենք գոյություն ունենալ»,- «Իրավունքի» հետ զրույցում նշեց Պետրոս ավագ քահանա Մալյանը: Ըստ նրա, տոնը որոշ առումով մոռացության էր մատնվել, քանի որ 70 տարի չէր նշվել. «Այսուհետեւ ամեն տարի տոնը կնշվի,  սա լինելու է շարունակական ծրագիր»,-եզրափակեց ավագ քահանան:

Այս տարի առաջին անգամ տոնի ընթացքում անցկացվեց նաեւ մի քանի մարզաձեւերի մրցույթներ` սուսերամարտի, հայկական կոխի`ըմբշամարտի եւ հունա-ռոմեական ըմբշամարտի: Բուն Բարեկենդանի տոնը մեծ շուքով նշեցին նաեւ Երեւանի վարչական շրջաններում:

«Կարին» ավանդական երգ ու պարի խմբի գեղարվեստական ղեկավար ԳԱԳԻԿ ԳԻՆՈՍՅԱՆԻ բնորոշմամբ`Բուն Բարեկնդանն ազգային տոներից է եւ առաջին հերթին ժողովրդական ավանդույթների պահպանության համար է. «Տոնը շատ լավ պահպանել է եկեղեցին եւ այս առումով պետք է վերկանգնել այն, ինչը պահպանում է ազգային նկարագիրը: Պետք է վերկանգնվի նաեւ կառնավալային խաղերը, որոնք կարծում եմ մեծ մասսայականություն կվայելեին: Մինչեւ ժողովուրդը չմասնակցի այս ամենին, չի կարելի համարել, որ տոնը վերադարձել է կենցաղ: Այս ամենը բարենորոգիչ տոներ են, առանց տոնախմբությունների չի լինի որեւէ տոն: Նախ եւ առաջ պետք է զարկ տալ ազգային տոնախմբություններին»,-փաստեց Գ. Գինոսյանը:

Նշենք, որ Արարատյան Հայրապետական թեմը Բուն Բարեկնդանի տոնը կազմակերպելիս համագործակցել է Երեւանի քաղաքապետարանի, ՀՀ մշակույթի, ՀՀ սպորտի եւ երիտասարդության հարցերի նախարարությունների հետ:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝