Երգչուհի Անի Հակոբյան. «ԱՅՆ, ԻՆՉ ՑԱՆԿԱՆՈՒՄ ԵՄ, ԵՐԱԶԱՆՔՆԵՐ ՉԵՆ. ԴՐԱՆՔ ՆՊԱՏԱԿՆԵՐ ԵՆ»

Երգչուհի Անի Հակոբյան. «ԱՅՆ, ԻՆՉ ՑԱՆԿԱՆՈՒՄ ԵՄ, ԵՐԱԶԱՆՔՆԵՐ ՉԵՆ. ԴՐԱՆՔ ՆՊԱՏԱԿՆԵՐ ԵՆ»

Համացանցում արդեն հասանելի է երգչուհի ԱՆԻ ՀԱԿՈԲՅԱՆԻ նոր երգի ձայնագրությունը, որը կոչվում է «Չեմ լքի քեզ»: Նոր երգի, առաջիկա ծրագրերի եւ իր երազանքների մասին էլ ծավալվեց «Իրավունքի» զրույցը հենց երիտասարդ երգչուհու հետ:

- Անի, Ձեր բազմաթիվ երգերը հայտնի են համացանցում, հետաքրքիր է` ե՞րբ կլինի դրանցից որեւէ մեկի հիման վրա նկարահանված նոր տեսահոլովակ:

- Իմ առաջին «Սեր չկա» երգն ունեցել է տեսահոլովակ, առաջիկայում եւս կլինեն նոր տեսահոլովակներ, երգերի ձայնագրություններ, սակայն դրանց մասին ավելի մանրամասն ներկայացնել չեմ ուզում, քանի որ ունկնդիրը սիրում է աշխատանքի մասին ոչ թե լսել, այլ տեսնել: Իմ նոր «Չեմ լքի քեզ» երգն ինձ շատ հոգեհարազատ է ու սիրելի, այդ պատճառով էլ մտադիր եմ շուտով կյանքի կոչել նաեւ տեսահոլովակ:

- Ի դեպ, Ձեր «Սեր չկա» տեսահոլովակը համացանցում միայն դրական գնահատականի արժանացավ, ըստ Ձեզ, սա տեսահոլովակո՞վ, կատարումով, թե՞ երգի բովանդակությամբ էր պայմանավորված:

- «Սեր Չկա» երգի պատրաստման համար աշխատել է ստեղծագործական մեծ թիմ: Ինչ վերաբերում է դրական արձագանքներին, կարծում եմ` իմ թիմակիցներից յուրաքանչյուրի դերն այդ առումով առկա էր: Եթե երաժշտական հատվածում երգի հեղինակը թերանար, կամ տեսահոլովակի ստեղծագործական խումբն, այսպես ասած, գործը գլուխ չբերեր, կարծում եմ` երգը չէր ընդունվի:

- «Կապույտ աչքեր»,  «Սեր չկա», «Չեմ լքի քեզ»… բոլորն էլ սիրո մասին են: Առաջիկայում կտեսնե՞նք Ձեզ այլ թեմատիկայով երգերով եւ նոր հեղինակային կատարումներով:

- Ես երգում եմ տարբեր ժանրերով, ինձ հարազատ է երաժշտության հետ կապված ամեն ինչ: Բարձր եմ գնահատում ժողովրդականը, քանի որ այն մերն է եւ կարծում եմ, որ յուրաքանչյուր հայի արյան մեջ կա ժողովրդականի հանդեպ յուրահատուկ ձգողականություն: Իմ կատարումները, որոնք համացանցում են եւ եթերում, դեռեւս էստրադային են, սակայն ոչինչ չեմ բացառում, խոստանում եմ միայն հուսախաբ չանել նրանց, ովքեր գնահատում են իմ արվեստը:

- Ժամանակին նոր դեմքերը շատ հեշտությամբ համալրում էին շոու-բիզնեսի շարքերը: Արդյո՞ք այսօր կա ինչ-որ պատնեշ, թե, պարզապես, Հայաստանում շոու-բիզնես չկա:

-Առհասարակ, մեր կյանքում բարձրանալը դժվար է, հեշտ է ընկնելը եւ այն սովորաբարայն ցավոտ է լինում: Մուտք գործել երգարվեստ, բնականաբար, հեշտ չի եղել, հիմա փորձում եմ անել հնարավոր ամեն ինչ` ձեռք բերածս չկորցնելու, չընկնելու եւ ավելիին հասնելու համար: Երբ կա ձգտում եւ նպատակ, ի վերջո, հասնում ես նպատակակետին: Հաղթանակները հեշտ ձեռք չեն բերվում, իսկ դրանց համար պայքարել է պետք: Ես պայքարում եմ….: Ինչ վերաբերում է Հայաստանում շոու բիզնես լինել-չլինելուն, գնահատական տալ չեմ ցանկանում:

- Ի՞նչ նոր ծրագրեր ունեք առաջիկայում :

- Անելիքներս շատ են,այնքան շատ, որ կարծում են 100 տարին բավական չի լինի, որպեսզի կարողանամ դրանք հերթով իրագործել: Գաղտնիք չէ, սակայն, որ ծրագրերդ իրականացնել միայնակ չես կարող, իսկ ձեռք մեկնողներն այնքան էլ շատ չեն: Հիմա ժամանակն է ընդլայնել համերգային տարբեր ծրագրերին իմ մասնակցությունը, ու ես սիրով ընդունում եմ գործնական առաջարկները, եթե դրանք իմ գործունեության շրջանակներում են:

- Իսկ ի՞նչ է երազում երիտասարդ երգչուհին:

- Այն, ինչ ցանկանում եմ` երազանքներ չեն. դրանք նպատակներ են: Դե ինչպես բոլոր աղջիկները` ցանկանում եմ ներդաշնակ ընտանիք ունենալ, միշտ գնահատված լինել, արժանանալ իմ հանդիսատեսի ծափերին (պատրաստ եմ նաեւ քննադատություններ լսելուն):

- Եվ վերջում եւս մեկ հարց. սիրո մասին երգող երգչուհու սիրտն այսօր զբաղվա՞ծ է, եւ ո՞վ կարող է լիներ Ձեր կյանքի ուղեկիցը:

- Առանց սիրո կյանքն իմաստազրկվում է. սիրում եմ ընտանիքս, աշխատանքս եւ այն ամենն, ինչ կա իմ կյանքում: Իսկ իմ կյանքի ուղեկիցը կարող է լինել նա, ով կունենա կյանքում մարդուն տրված մեծագույն շնորհը` դա մարդ լինելն է:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝