ԳՐԻԳՈՐ ՄԻՐԶՈՅԱՆԻ ՆՈՐ ՏԵՍԱՀՈԼՈՎԱԿՈՒՄ ԶԳԱՑՄՈՒՆՔԸ ՀԱՂԹՈՒՄ Է ՆՅՈՒԹԱԿԱՆԻՆ

ԳՐԻԳՈՐ ՄԻՐԶՈՅԱՆԻ ՆՈՐ ՏԵՍԱՀՈԼՈՎԱԿՈՒՄ ԶԳԱՑՄՈՒՆՔԸ ՀԱՂԹՈՒՄ Է ՆՅՈՒԹԱԿԱՆԻՆ

Փետրվարի 1-ին ժողովրդական երգիչ ԳՐԻԳՈՐ ՄԻՐԶՈՅԱՆԻ «Իմ Հայաստան» երգի տեսահոլովակն արդեն հասանելի կլինի հանրությանը: Այդ մասին «Իրավունքին» տեղեկացրեց երգիչն ու հավելեց. «Երգն ունի գեղեցիկ սիրային սյուժե` շիկահեր գեղեցկուհին հանուն իր սիրո վերադառնում է հայրենիք: Զգացմունքը հաղթում է նյութականին, կենցաղայինին, պահպանվում է ազգայինը` մերը»,- ասաց երգիչն ու նշեց, որ տեսահոլովակի նկարահանումները կատարվել են Հայաստանի գեղատեսիլ վայրերում: Իսկ երգի ընտրությունը կատարելիս երգիչն առաջնահերթ ուշադրություն է դարձնում ե՛ւ բառերին, ե՛ւ մեղեդայնությանը. «Երկուսն էլ անչափ կարեւոր են: Հանդիսատեսի մի մասը կարեւորում է երաժշտությունը, մյուսների համար մեծ դեր ունի խոսքի ուժը: Երգիչը պիտի զգա երկուսի ներդաշնակությունը միասին: Երգը պիտի հոգուս մոտ լինի` ներաշխարհովս անցած: Երաժշտական լավ դպրոց եմ անցել, հետո ավարտել Կոնսերվատորիան: Մասնագիտությամբ վոկալիստ եմ ու սիրում եմ երգը գրագետ մատուցել: Բնությունը տալիս է ձայնային տվյալներ, ուղղակի այն պետք է հղկել, որպեսզի կատարողական արվեստի շնորհիվ տեղ հասնի»:

Երգիչը կարծում է, որ «Իմ Հայաստան» երգով իր ասելիքը տեղ կհասնի. «Ես ու հեղինակը մեծ ցանկություն ունենք, որ հայ երիտարդն իր սերը գտնի հայրենիքում, իր տունը կառուցի Հայաստանում, պահպանի ազգային ավանդույթները, որով բազմիցս հպարտացել ենք օտարի առաջ»:

Հավելենք, երգի հեղինակը Վաչե Ավեյանն է, գործիքավորումը կատարվել է «Արդինի» ստուդիայում, իսկ տեսահոլովակի ռեժիսորն է Արմեն Փիրիմասիհին:

ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝