Հունվարի 26-ին ԵԽԽՎ-ում տեղի ունեցած բրիտանացի պատգամավոր Ռոբերտ Ուոլթերի «Բռնության աճը Լեռնային Ղարաբաղում եւ Ադրբեջանի այլ գրավյալ տարածքներում» թեմայով բանաձեւի ու բոսնիացի պատգամավոր Միլիցա Մարկովիչի «Ադրբեջանի սահմանամերձ շրջանների բնակիչները միտումնավոր զրկված են ջրից» թեմայով բանաձեւի նախագծերի քվեարկության ժամանակ երկուսին էլ «կողմ» էր քվեարկել, ո՛չ ավել, ո՛չ պակաս, Թուրքիայի ազգությամբ հայ պատգամավոր ՄԱՐԳԱՐ ԵՍԱՅԱՆԸ:

 

Նշենք, որ վերջինս ԵԽԽՎ-ում ներկայացնում է հենց Թուրքիայի նախագահ Էրդողանի կուսակցությունն ու իր գործունեությամբ էլ աչքի ընկնում` նրան «աստվածացնելով»: Ի վերջո, թե ինչու վերջինս գոնե «ձեռնպահ» չքվեարկեց կամ իր ազգի համար հարցի լրջությունը կարեւորելով` չգտավ որեւէ տարբերակ` քվեարկությանը չմասնակցելու, «Իրավունքը» փորձեց պարզել հենց նրանից` նամակ ուղարկելով իր ֆեյբուքյան պաշտոնական էջին, որտեղ վերջինս ակտիվորեն նյութեր էր հրապարակում Ստրասբուրգից` իր 10 հազարից ավելի սոցցանցային ընթերցողների համար: Սակայն մեր նամակից հետո, որտեղ մասնավորապես նշված էր, որ նրա քվեարկությունը ամենեւին ընդունելի չէր հայ հանրության համար, վերջինս պատասխանելու փոխարեն, ընդհանրապես ջնջվել էր սոցցանցից: Հավանաբար, եթե մենք փորձել էինք կոռեկտության շրջանակում հարցն ուղղել, ապա մի շարք հայեր, պարզապես, հայհոյանքներ էին ուղղել նրան, կամ էլ Մ. Եսայանը, ուղղակի, ամոթից է փորձում չերեւալ հրապարակային որեւէ հարթակում: Հավելենք, որ ԵԽԽՎ-ում հայկական պատվիրակության անդամ, ԱԺ ԲՀԿ խմբակցության ղեկավար ՆԱԻՐԱ ԶՈՀՐԱԲՅԱՆԸ հակահայկական երկու զեկույցների քվեարկությունից հետո մոտեցել է Մարգար Եսայանին եւ իր կարծիքը հայտնել: «Նրան ասացի, ինչ որ պետք էր»,- նշել է Ն. Զոհրաբյանը:

 

ՀՐԱՆՏ ՍԱՐԱՖՅԱՆ

- See more at: http://unicodenow.com/#sthash.Iu1LADOu.dpuf

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝