Մի շարք եվրապատգամավորներ, անտեսելով միջազգային հանրության կարծիքը, դրսեւորելով միակողմանի մոտեցում, երեկ ԵԽԽՎ լիագումար նիստում քվեարկեցին Սարսանգի ջրամբարի վերաբերյալ բոսնիացի պատգամավոր Միլիցա Մարկովիչի հեղինակած հակահայկական բանաձեւի ընդունման օգտին` այդպիսով հումանիտար-տեխնիկական բնույթի զեկույցին տալով քաղաքական բովանդակություն: ԵԽԽՎ-յան վերոնշյալ քվեարկության, ինչպես նաեւ այս կառույցի որդեգրած արժեհամակարգի մասին «Իրավունքը» զրուցեց ԼՂՀ մամուլի խոսնակ, քաղաքագետ ԴԱՎԻԹ ԲԱԲԱՅԱՆԻ հետ:

«ԿԱՐՈՂ ԵՆՔ ՋՈՒՐ ՏՐԱՄԱԴՐԵԼ, ԲԱՅՑ ՈՉ ՀԱՄԱՏԵՂ ՕԳՏԱԳՈՐԾՄԱՆ ՀԱՄԱՐ»

–Պարոն Բաբայան, ԵԽԽՎ-ում Սարսանգի ջրամբարի վերաբերյալ ընդունված հակահայկական բանաձեւը ի՞նչ հետեւանքներ կարող է ունենալ:

– Իհարկե, որեւէ ռեալ հետեւանք չի ունենա, որովհետեւ այդ, այսպես կոչված, զեկույցը որեւէ պարտադիր իրավական կամ քաղաքական ուժ չունի, ուստի` որեւէ պարտավորությունների չի կարող բերել մեզ կամ որեւէ այլ կողմի: Պարզապես, մենք սա դիտարկում ենք որպես ԵԽԽՎ-ի թույլ իմունային համակարգի մի նշան, որտեղ այլեւս անհնարին է խոսել ժողովրդավարության մասին, դնել իրենց որպես ժողովրդավարական արժեքների, մարդու իրավունքների պաշտպանության կարեւոր ատյաններից մեկի տեղում, երբ, պարզապես, որպես շաբաշ վերցնում են ինչ-որ փողեր ու քվեարկում ոչ ժողովրդավարական, ինչ-որ անկապ զեկույցի համար: Սա նշանակում է, որ ԵԽԽՎ-ում վաճառքի են դրվում ժողովրդավարական գաղափարները, եւ սա բավականին լուրջ խնդիր է:  ԵԽԽՎ-ում եւ Եվրոպայի մի շարք կառույցներում արժեհամակարգի ճգնաժամ է:

– Բանաձեւի ընդունումից հետո մամուլում ու սոցցանցերում սկսվել է լայնորեն քննարկվել, թե Արցախը արդյոք Սարսանգի ջրամբարից ջուր կթողնի դեպի Ադրբեջան, թե` ոչ: Ի՞նչ կասեք այս մասին:

– Մենք մինչ այդ էլ, խոսել ենք այս տարբերակի մասին ու նշել, որ ընդհանուր առմամբ` պատրաստ ենք Ադրբեջանին ջուր մատակարարել: Մենք նույնիսկ 10 տարի առաջ ենք դրա մասին ասել, բայց Ադրբեջանը միշտ մերժում էր եւ միշտ էլ, ըստ իս, մերժելու է: Պարզապես, նրանք հիմա քաղաքական շահարկումներով են զբաղված եւ ոչ միայն այս հարցում: Բայց կրկնում եմ` որեւէ պարտադիր ուժ չունի այդ բանաձեւը, եւ մենք առանց դրա էլ ասել ենք, որ կարող ենք ջուր տրամադրել, բայց ոչ համատեղ օգտագործման համար, մի՛ խառնեք այս երեւույթները: Այնպես որ, մենք պատրաստ ենք, որպես տարածաշրջանում փոխվստահության մթնոլորտի ձեւավորման մի բաղադրամաս, այդ հարցը քննարկել, իսկ եթե իրենք դեմ են, մենք էլ չենք տա:

«ԵԽԽՎ-Ի ՊԵՍ ԿԱՌՈՒՅՑԸ ԴԱՐՁԵԼ Է ԲՈՐՍԱ»

–Փաստորեն, կարելի՞ է ասել, որ Ադրբեջանին ոչ թե ջուր է պետք, այլ հակահայկական փաստաթուղթ:

– Միանշանակ, նրանց հակահայկական փաստաթուղթ է պետք, բայց սա մի անհասկանալի քաղաքականություն է, որովհետեւ այդ փաստաթուղթը ինքնին որեւէ պարտադիր ուժ չունի: Մինչդեռ իրենք այդքան փողեր են ծախսում դրա համար, բայց թող իրենց բյուջեն թուլացնեն, ֆինանսները քամուն տան: Մենք ավելի վատ ենք ընդունում, որ ԵԽԽՎ-ի պես կառույցը դարձել է բորսա: Այսօր ԵԽԽՎ-ն ժողովրդավարության գաղափարները  հանել է վաճառքի, սա է ամենավատը:

– Այնուամենայնիվ, համարո՞ւմ եք, որ ԵԽԽՎ հայաստանյան պատվիրակությունը մասնակի, բայց հաղթանակ ունեցավ, քանի որ գոնե մերժվեց մյուս հակահայկական բանաձեւը` «Բռնության աճը Լեռնային Ղարաբաղում եւ Ադրբեջանի մյուս օկուպացված շրջաններում» տխրահռչակ վերնագրով:

– Անշուշտ, սա մասնակի հաղթանակ է, բայց ընդհանուր առմամբ` ԵԽԽՎ-ի պարտությունն է նույնիսկ մեկ բանաձեւի ընդունումը, եւ սա բոլորի համար պարզ է, հայկական կողմի համար` առավել եւս: Բայց եթե ԵԽԽՎ-ն չի կարողանում կոռուպցիայի դեմ պայքարել, ի վերջո, Հայաստանը մենակ ի վիճակի չէ այդ կառույցին դնել նորմալ ուղու վրա ու թույլ չտալ, որ այնտեղ կոռուպցիան տարածվի: Եվ սա համաեվրոպական խնդիր է:

«ԲԱՑԱՍԱԿԱՆ ԶԱՐԳԱՑՈՒՄՆԵՐ ԵՎՐՈՊԱԿԱՆ ԺՈՂՈՎՐԴԱՎԱՐԱԿԱՆ ԻՆՍՏԻՏՈՒՏՆԵՐՈՒՄ»

–Այս ամենը հաշվի առնելով` չե՞ք կարծում, որ ժամանակն է Ռուսաստանի պես մենք էլ դուռը «շրխկացնենք» ու հեռանանք ԵԽԽՎ-ից:

– Ժամանակը ցույց կտա, թե ինչպիսի մարտավարություն է ընդունվելու: Խնդիրն այն է, որ մենք տեսնում ենք լուրջ բացասական զարգացումներ եվրոպական ժողովրդավարական ինստիտուտներում: Բայց սա չի նշանակում, որ մենք ժողովրդավարական արժեքներից հրաժարվելու ենք, ընդհակառակը` ամրապնդելու ենք այն, որովհետեւ սա նաեւ մեր քաղաքակրթության հիմքն է: Ինչ վերաբերում է ԵԽԽՎ-ին, ապա դա արդեն իրենց խնդիրն է, եւ խորը ցավով պետք է հերթական անգամ նշենք, որ դժբախտաբար, կաշառակերությունն ու «շաբաշները» ներթափանցել են այդ կառույց:

ՀՐԱՆՏ ՍԱՐԱՖՅԱՆ

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝