ՉԵԽՈՎԻ ԴՊՐՈՑԻ ՏՆՕՐԵՆԸ ՀԵՐՔՈՒՄ Է ԻՐ ԲԻԶՆԵՍ ԳՈՐԾՈՒՆԵՈՒԹՅԱՆ ՄԱՍԻՆ ԼՈՒՐԵՐԸ

ՉԵԽՈՎԻ ԴՊՐՈՑԻ ՏՆՕՐԵՆԸ ՀԵՐՔՈՒՄ Է ԻՐ  ԲԻԶՆԵՍ

ԳՈՐԾՈՒՆԵՈՒԹՅԱՆ ՄԱՍԻՆ ԼՈՒՐԵՐԸ

Օրեր առաջ լրատվամիջոցներից մեկը  գրել էր, որ Ծաղկաձորում գտնվող «Ալպինա» հանգստյան տունը պատկանում է Չեխովի դպրոցի տնօրեն Գայանե Սարուխանյանին:   Տեղեկատվությունը ճշտելու համար փորձեցինք կապ հաստատել  տիկին Սարուխանյանի հետ, սակայն  արի ու տես, որ երկու օր պահանջվեց  «Իրավունք» թերթի թղթակցից դպրոցի տնօրենի հետ կապ հաստատելու համար: Երեկ  տիկին Սարուխանյանը, լսելով «Ալպինա» հանգստյան տան մասին,  անջատեց հեռախոսահամարը, ապա  ուղարկեց հաղորդագրություն. ««Перезвоню позже»:

Քանի որ տիկին Սարուխանյանն այդպես էլ «позже»` ժամեր անց, չզանգահարեց, նորից փորձեցինք կապ հաստատել նրա հետ: Այս անգամ, սակայն, հեռախոսազանգին պատասխանեց մի տղամարդ, ով ներկայացավ որպես տիկին Սարուխանյանի վարորդ: Նա մեզ տեղեկացրեց, որ Գայանե Սարուխանյանը հանդիպման է: Դպրոցի տնօրենը, սակայն, այդպես էլ չզանգահարեց մեզ: Մենք էլ առաջնորդվելով հայտնի ասացվածքով` «երբ Մուհամեդը չի գնում սարի մոտ, սարն է գալիս Մուհամեդի մոտ», այսօր  դարձյալ զանգահարեցինք նրան` պարզելու, թե ի վերջո, դա կապ ունի՞ վերոնշյալ հանգստյան տան  հետ: «Ոչ, այդ տեղեկատվությունը ճիշտ չէ»,- ասաց   դպրոցի տնօրենը:

Այդ դեպքում ինչո՞ւ տիկին Սարուխանյանը հավատարիմ չմնաց իր ««Перезвоню позже» խոստմանը եւ  չզանգահարեց  լրագրողին: «Խնդրում եմ` լրացուցիչ հարցեր մի տվեք: Ես  ձեր հարցին արդեն  պատասխանեցի»,- խուսանավեց դպրոցի տնօրենը:

Եթե «Ալպինա» հանգստյան տունը  Գայանե Սարուխանյանին չի պատկանում, ինչո՞ւ է  հենց նա հայտնվել լրատվամիջոցների ուշադրության կենտրոնում: Ժողովրդական խոսք կա` «Ծուխն առանց կրակի չի լինում»: «Ես ձեր հարցերին պատասխանեցի: Ցտեսություն»,- պատասխանեց  դպրոցի տնօրենն ու անջատեց հեռախոսը:

Հ.Գ. Ի դեպ, Գայանե Սարուխանյանը  նախկին պատգամավոր է, ժամանակին Վանո Սիրադեղյանի ստեղծած  «Շամիրամ» խմբակցության ու համանուն  կազմակերպության անդամ:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝