«Մեր բողոքի ակցիան նախազգուշացում է ադրբեջանական նավթի, խավիարի եւ մանաթի տեսքից «ուշաթափվողներին»»

«ՄԵՐ ԲՈՂՈՔԻ ԱԿՑԻԱՆ ՆԱԽԱԶԳՈՒՇԱՑՈՒՄ Է  ԱԴՐԲԵՋԱՆԱԿԱՆ ՆԱՎԹԻ, ԽԱՎԻԱՐԻ ԵՎ ՄԱՆԱԹԻ ՏԵՍՔԻՑ «ՈՒՇԱԹԱՓՎՈՂՆԵՐԻՆ»»

«Այս հարցը համահայկական է եւ կուսակցական գույն, քաղաքական հայացքներ չի ճանաչում: Բոլորս դնում ենք այդ ամենը մի կողմ եւ պայքարում մի նպատակի համար` Հայաստանի Հանրապետության», - կոչ է անում «Հանուն Օրենքի» հասարակական շարժումն ու հորդորում բոլորին մասնակցել վաղը` հունվարի 25-ին, ժամը` 14:00-ին, Մեծ Բրիտանիայի դեսպանատան դիմաց (հասցե` Բաղրամյան 34) կայանալիք բողոքի ակցիային`դատապարտելով Մեծ Բրիտանիայի, ինչպես նաեւ Բոսնիա եւ Հերցեգովինայի խոչընդոտող քաղաքականությունը ղարաբաղյան հակամարտութունը կարգավորելու հարցում: Հիշեցնենք, որ հունվարի 26-ին Եվրոպայի Խորհրդարանի Խորհրդարանական վեհաժողովում նախատեսվում են լսումներ երկու հակահայկական զեկույցների շուրջ, որոնք պատրաստված են Բրիտանիայի ու Բոսնիա եւ Հերցեգովինայի ներկայացուցիչների կողմից: Հատկապես մեծ վրդովմունք է առաջացնում բրիտանացի պատգամավորի զեկույցը, որում նա հայերին անվանում է զավթիչներ` այսպիսով թեւ եւ թիկունք տալով Ադրբեջանի ագրեսիվ եւ ոչ ադեկվատ պահելաոճին ու վտանգելով խաղաղությունը տարածաշրջանում: Այս մասին «Իրավունքը» զրուցեց «Հանուն Օրենքի» հասարակական շարժման համակարգող խորհրդի անդամ ԾՈՎԻՆԱՐ ԿՈՍՏԱՆՅԱՆԻ հետ:

-Որքանո՞վ եք այս պահին կարեւորում նախաձեռնած բողոքի ակցիան, երբ հնարավոր ամեն ինչ թե՛ հայտարարություններով, թե՛ պատվիրակության ու ԵԱՀԿ Մինսկի խմբի գործադրած ջանքերով արդեն իսկ բավական մեծ գործ է արվել, որպեսզի ԵԽԽՎ-ում հակահայկական բանաձեւերի նախագծերն իրականություն չդառնան:

- Դիվանագետների, պատգամավորների եւ ձեր նշած կառույցի աշխատանքն, իհարկե, եւս կարեւոր են, բայց երբ դրան նաեւ միանում է ժողովրդի արդար բողոքի ձայնը, ապա պատկերացնել անգամ դժվար է, թե այդ ահռելի ուժը, ինչ կարող է անել: Այս բողոքի ակցիան անչափ կարեւոր է, որովհետեւ այն իր մեջ ավելի խորքային նպատակ ունի: Սա առաջին դեպքը չէ, երբ տարբեր եվրոպացի պաշտոնյաներ ու դիվանագետներ վաճառվելով Ադրբեջանի իշխանություններին` պաշտպանում են այդ երկրի շահերը` ի վնաս Հայաստանի Հանրապետության: Մեր բողոքի ակցիան միայն միտված չէ այդ երկու հակահայկական զեկույցների դեմ, այն ավելի գլոբալ խնդիրներ է բարձրացնում: Այն նախեւառաջ խիստ նախազգուշացում է ադրբեջանական նավթի, խավիարի եւ մանաթի տեսքից «ուշաթափվողներին»: Հայերն այլեւս չեն հանդուրժի ոչ մի ոտնձգություն իրենց պետության եւ ազգի նկատմամբ: Այսօր Հայաստանում ձեւավորվել է մի սերունդ, որն ունակ է պաշտպան կանգնելու իր ազգի շահերին: Եվրոպայում պետք է հասկանան, որ հայերը ոչ մեկին ոչինչ չունեն հանձնելու: Ավելին` մենք դեռ ունենք պատմական հողեր, որոնք ազատագրելու կարիք կա: Մեր նախնիների հոգիները դեռ սպասում են ու չեն հանգստանա այնքան ժամանակ, մինչեւ հայկական եռագույնը չծածանվի Արարատից այն կողմ: Եվ իմ խորին համոզմամբ` այդ օրն էլ շուտով կգա:

- Ինչքանով տեղյակ եմ, Ձեր բողոքի ակցիային են միացել նաև տարբեր կուսակցություններ ու կազմակերպություններ կմանրամասնե՞ք այդ մասին:

- Հուրախություն ամենքիս, մեզ են միացել ՀՅԴ կուսակցության երիտթեւը, «Նիկոլ Աղբալյան» ուսանողական միությունը, Սոցիալ-Դեմոկրատ Հնչակյան Կուսակցության «Մեծն Մուրադ» երիտասարդների միությունը, Միջազգային հումանիտար զարգացման եւ «Հայրենանվեր երիտասարդների միավորում» հասարակական կազմակերպությունները, եզդիների «Մեդիա Շանգալ» ՀԿ ներկայացուցիչները, մտավորականներ եւ բավականին շատ երիտասարդներ:

- Ի՞նչ ակնկալիքներ ունեք վաղվա ակցիայից:

- Մենք չենք սպասում որեւիցե ակնկալիքների, համարում ենք, որ սա մեր պարտականությունն է` որպես ՀՀ քաղաքացիներ, որպես հայ երիտասարդներ, որոնք անտարբեր չեն իրենց պետության ճակատագրի նկատմամբ: Այնպես որ, մենք ուղղակի մեր պարտքն ենք կատարում:

- Իսկ ի՞նչ քայլեր կհաջորդեն բողոքի ակցիային, եթե հակահայկական զեկույցների բանաձեւերի նախագծերը ընդունվեն կամ չընդունվեն:

-Այս աբսուրդային զեկույցները ընդունելու կամ չընդունելու դեպքում ոչինչ չի փոխվի: Արցախը միշտ եղել է ու կմնա հայերի հողը, կրկնում եմ` մենք ոչինչ չունենք հանձնելու: Էժանագին եվրապատգամավորների զեկույցները ընդունելով` ԵԽԽՎ-ն ինքն իրեն վերջնականապես կոչնչացնի որպես միջազգային կառույց: Այն այդ պատգամավորների նման վաճառված եւ էժանագին, փտած կառույցի է վերածվել: Հետեւաբար, այս երկու զեկույցներով չի ավարտվում հայերի իրավունքների խախտումները միջազգային ասպարեզում, դրա համար ցանկացած դեպքում մենք շարունակելու ենք մեր պայքարը:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝