ԻՆՉՈՒ ԷՐ ԼՌՈՒՄ ՕԵԿ-Ը ԴՈՒԲԱՅԻ ՔԵՖ ՄԱՍԻՆ

ԻՆՉՈ՞Ւ ԷՐ ԼՌՈՒՄ ՕԵԿ-Ը ԴՈՒԲԱՅԻ ՔԵՖԻ ՄԱՍԻՆ

ՕԵԿ ղեկավար Արթուր Բաղդասարյանն օրեր առաջ հարցազրույց է տվել, որտեղ, բացի ներքաղաքական հարցերին անդրադառնալուց, խոսել է նաեւ իր որդու` Վահան Բաղդասարյանի հարսանյաց արարողության մասին: Սակայն պրն Բաղդասարյանի  հարցազրույցը, կոնկրետ իր որդու հարսանյաց արարողության մասին նոր հարցեր առաջացրեց: Բանն այն է, որ օրեր առաջ ՕԵԿ-ի լրատվական ծառայությունը` ի դեմս  մամլո խոսնակ Արթուր Միսակյանի, «Իրավունք»-ի հետ զրույցում ասել էր, որ Արթուր Բաղդասարյանն իր որդու հարսանիքը Դուբայում չի անցկացրել: Իսկ թե որտեղ են ՕԵԿ պատգամավորները, ինչո՞ւ է ՕԵԿ խմբակցության ղեկավար Հեղինե Բիշարյանի  ու   պատգամավոր Հովհաննես Մարգարյանի հեռախոսներից արաբերեն խոսքեր լսվում, արդյոք դա չի նշանակում, որ նրանք եւս  եղել են Դուբայում եւ մասնակցել այդ խնջույքին, ինչպես նշել է Ա. բաղդասարյանը, ՕԵԿ մամլո խոսնակն ասել էր. «Չեք կարող նման ենթադրություն անել, քանի որ պատգամավորներն իրենց  արձակուրդը տնօրինում են այնպես, ինչպես ցանկանում են: Կարող են հանգստանալ մեր երկրում կամ երկրից դուրս: Իսկ երկրից դուրս լինելը  արտառոց  չէ: Բայց դա չի նշանակում, թե եթե մարդը, դիցուք, Դուբայում է, նա մասնակցում է  հարսանեկան արարողությանը»:

Մինչդեռ Արթուր Բաղդասարյանն իր հարցազրույցում ասել էր. «Այնտեղ  (նկատի ունի Դուբայում-խմբ.) կազմակերպած մեր միջոցառումը հարսանիք համարել ճիշտ չէ, թեկուզ և այն պատճառով, որ յուրաքանչյուր հարսանիքի բաղկացուցիչ մասը ԶԱԳՍ-ի և եկեղեցական պսկադրությունն է»:

Հարցազրույցում, ըստ էության,Բաղդասարյանը չէր հերքել նաեւ այն խոսակցությունները, թե իր թիմը` իր կուսակիցները, մասնակցել են նաեւ Դուբայում տեղի ունեցած արարողությանը: Սակայն մամլո խոսնակը ՕԵԿ պատգամավորների արձակուրդին վերաբերող հարցին մեզ  ասել էր. «….Պատգամավորներն իրենց  արձակուրդը տնօրինում են այնպես, ինչպես ցանկանում են: Կարող են հանգստանալ մեր երկրում կամ երկրից դուրս: Իսկ երկրից դուրս լինելը  արտառոց չէ: Բայց դա չի նշանակում, թե եթե մարդը, դիցուք, Դուբայում է, նա մասնակցում է  հարսանեկան արարողությանը»:

Ինչո՞վ է պայմանավորված այս երկու տեղեկությունների  հակասությունն ու թյուրիմացությունը, փորձեցինք պարզել ՕԵԿ մամլո խոսնակ Արթուր Միսակյանից: Վերջինս, սակայն, մեզ ասաց, որ թեմային չի անդրադառնալու. «Այլևս չեմ պատրաստվում այս թեմայի հետ կապված որևէ մեկնաբանություն անել: Բոլոր հարցերին տրվել է հստակ պատասխան ու որևէ թյուրիմացություն կամ հակասություն չկա»:

Հ. Գ. Թե ինչով է պայմանավորված ՕԵԿ-ականների իրարանցումն ու շփոթության մեջ ընկնելը, թերեւս հասկանալի է  հատկապես այն առումով, որ պարոն Բաղդասարյանն ու իր թիմը, հավանաբար, չեն ցանկանում այս նախընտրական տարում դուբայներում քեֆ անողի պիտակ ձեռք բերել: Չէ՞ որ Հայաստանի  աղքատության ֆոնին (աղքատության մասին ՕԵԿ-ականները գրեթե ամեն օր խոսում են ԱԺ ամբիոնից-խմբ.) դա այլ կերպ կընկալվի: Ինչեւէ, ջայլամային հոգեբանությամբ առաջնորդվող  այս կուսակցության գնահատականը թող տա ազգաբնակչությունը եւ   փոքր-ինչ խորհի`ով իրականում իրավունք ունի խոսելու  աղքատության մասին եւ այն մեղմելու քայլեր առաջարկի:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝