Տիգրան Կարապետյան. «ԵՐԲԵՔ ՉԵՄ ԿԱՇԿԱՆԴՎԵԼ ԺՅՈՒՐԻԻ ԽՍՏՈՒԹՅՈՒՆԻՑ»

Տիգրան Կարապետյան. «ԵՐԲԵՔ ՉԵՄ ԿԱՇԿԱՆԴՎԵԼ

ԺՅՈՒՐԻԻ ԽՍՏՈՒԹՅՈՒՆԻՑ»

Կայացավ ArmBody Project-ի կողմից կազմակերպված «Լավագույններից Լավագույնը» երաժշտական մրցույթի երկրորդ փուլը: Ինչպես պահանջել էր ժյուրին, այս անգամ առաջին փուլը հաղթահարած 24 մասնակիցները ներկայացան հայկական երգերով: Նրանց թվում ոչ միայն իր կատարումով, այլեւ Արցախի խորհրդանիշ «Պատիկ-տատիկ» («Մենք ենք, մեր լեռները») հուշարձանի նկարով վերնաշապիկով առանձնացավ արցախցի ՏԻԳՐԱՆ ԿԱՐԱՊԵՏՅԱՆԸ, ում հետ էլ երկրորդ փուլից հետո զրուցեց «Իրավունքը»:

- Տիգրան, նախ անդրադառնանք այս փուլում կատարածդ երգին: Ինչպե՞ս կգնահատես կատարումդ` նախորդ փուլի համեմատ:

- Այս փուլում կատարեցի ինձ շատ հարազատ ստեղծագործություն, որը կոչվում է «Ղարաբաղի հորովել»: Ինչ վերաբերում է կատարմանս գնահատականին, ընդհանրապես, երգը կատարելուց հետո` նույնիսկ, եթե հանդիսատեսը հավանում է այն, միշտ ասում եմ, որ կարող էի ավելի լավ կատարել: Բայց կարծում եմ` համեմատելով նախորդ փուլի հետ`  այս փուլում կատարումս ավելի լավն էր: Սա կախված է մի շարք հանգամանքներից, թե, օրինակ, ինչքանով եմ ես զգում այս կամ մյուս երգը ու ինչքանով է այն ինձ հարազատ: Եվ, իհարկե, ինչ առողջական վիճակում եմ գտնվում:

- Ժյուրին հենց առաջին փուլում խոստացավ խիստ լինել, դա կաշկանդո՞ւմ է, թե ավելի պարտավորեցնում լավ պատրաստվել:

- Երբեք չեմ կաշկանդվել ժյուրիի խստությունից: Անկախ նրանից` ժյուրին խիստ է, թե` ոչ, փորձում եմ անընդհատ աշխատել, կատարելագործվել, քանզի այդ ամենը առաջին հերթին անում եմ ինձ համար: Բայց, իհարկե, ժյուրիի խստապահանջ լինելը ավելի պարտավորեցնող է:

- Ինչպե՞ս ստացվեց, որ այդքան կարեւորեցիր ու վստահեցիր այս մրցույթին եւ Արցախից եկար մասնակցելու:

- Ճիշտն ասած, արդեն մեկ տարի է, որ հիմնական բնակություն եմ հաստատել Երեւանում: Բայց սա չի նշանակում, որ առանց կարեւորելու եմ մասնակցում մրցույթին: Ինձ համար ցանկացած մրցույթ, անկախ իր ճանաչելիությունից, կարեւոր է:

- Որքանո՞վ արդարացան սպասելիքներդ:

- Սպասելիքներս կարող եմ ասել, որ արդարացան, եթե ոչ 100 տոկոս, ապա 70 տոկոս, բայց մրցույթը դեռ շարունակվում է:

- Գաղտնիք չէ, որ արցախյան ձայները հզոր են, վստա՞հ ես, որ կհաղթես:

- Շատ ուրախ եմ նման կարծիքի համար, պարտավորեցնող է եւ պետք արդարացնել: Բայց վստահ լինել չեմ կարող, որովհետեւ հզոր ձայն ունենալը շատ քիչ է, որպեսզի բավարարես ժյուրիի պահանջները: Միշտ չէ, որ հզոր ձայնով կարողանում ես ճիշտ մատուցել երգը:

- Ընդհանրապես, որքանո՞վ ես կարեւորում հաղթանակը:

- Բնականաբար, հաղթանակը կարեւոր կետերից մեկն է, որովհետեւ, եթե մասնակցում ես մրցույթին ու հաղթանակը չես կարեւորում, ապա չեմ կարծում, որ լիովին կարող ես տրամադրվել: Ինձ համար ամեն մի հաղթանակ նոր աստիճանի հաղթահարում է:

- Սա առաջին փո՞րձն է նման մրցույթի մասնակցելու, թե էլի մասնակցել ես նախկինում:

- Տարբեր ձեւաչափեր ունեցող շատ մրցույթների եմ մասնակցել: Յուրաքանչյուրն էլ իր ուրույն տեղն ունի իմ կյանքում, որովհետեւ ամեն մրցույթ ինձ տվել է նոր փորձ, նոր գիտելիք, նոր շրջապատ:

- Անդրադառնանք նաեւ երաժշտական կրթությանդ…

- Ափսոս, երաժշտական կրթությունս միջին է: Ավարտել եմ Ստեփականակերտի Սայաթ-Նովայի անվան երաժշտական ուսումնարանին կից վարժարանը` դասական վոկալ: Հուսով եմ` հետագայում կլրացնեմ բացթողումս եւ կստանամ բարձրագույն կրթություն:

- Ի դեպ, բեմերն ու պրոֆեսիոնալների հետ աշխատելը, որքանով նկատեցի, քեզ համար նորություն չէ: Ի՞նչ կարող է տալ այս մրցույթը քեզ, որը դեռ ձեռք չես բերել քո ստեղծագործական գործունեությամբ:

- Ճիշտ եք նկատել, նորություն չէ: Տարիներ շարունակ աշխատել եւ շարունակում եմ աշխատել պրոֆեսիոնալների հետ: Կարծում եմ` աշխատանքն ու շփումը նման մարդկանց հետ միայն դրական արդյունք կտա: Դեռ շատ բաներ կա, որ ձեռք չեմ բերել, իսկ թե ինչ ձեռք կբերեմ այս մրցույթում, կերեւա եզրափակիչ փուլից հետո: Բոլորին հաջողություն եմ մաղթում:

Հավելենք, որ թեպետ նախատեսված էր, որ կիսաեզրափակիչ փուլ 24 մասնակիցներից պետք է անցնեին 15-ը, սակայն նախագծի կազմակերպիչ եւ գլխավոր պրոդյուսեր Արման Կիրակոսյանի որոշմամբ` բոլոր 24 մասնակիցներն էլ հնարավորություն կունենան մասնակցելու կիսաեզրափակիչ փուլին: Հաջորդ փուլում մասնակիցները ժյուրիի առաջ կներկայանան ֆիլմերում կամ մուլտֆիլմերում հնչած հայտնի երգերով:

ՀՐԱՆՏ ՍԱՐԱՖՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝