ՍՈՒՐԲ ՍԱՐԳՍԻ ՏՈՆԸ ԿՆՇԱՆԱՎՈՐՎԻ ՄՇԱԿՈՒԹԱՅԻՆ ԵՎ ԿՐԹԱԿԱՆ ՄԻ ՇԱՐՔ ՄԻՋՈՑԱՌՈՒՄՆԵՐՈՎ

ՍՈՒՐԲ ՍԱՐԳՍԻ ՏՈՆԸ ԿՆՇԱՆԱՎՈՐՎԻ ՄՇԱԿՈՒԹԱՅԻՆ ԵՎ ԿՐԹԱԿԱՆ ՄԻ ՇԱՐՔ ՄԻՋՈՑԱՌՈՒՄՆԵՐՈՎ

Հայ առաքելական եկեղեցին այս տարի երիտասարդների եւ սիրո  բարեխոս Սուրբ Սարգսի տոնը կնշի հունվարի 23-ին: Այդ օրը Երեւանի տարբեր հատվածներում տեղի կունենա ոչ միայն մշակութային, այլեւ կրթական զանազան միջոցառումներ`տարբեր բուհերում կանցկացվեն ցուցահանդես վաճառքներ եւ համերգային ծրագրեր: ԱՀԹ առաջնորդ ՆԱՎԱՍԱՐԴ արքեպիսկոպոս ԿՃՈՅԱՆԻ նախաձեռնությամբ առաջին անգամ տոնի շրջանակներում կպարգեւատրվեն Հայաստանի սահմանները հսկող ժամկետային զինծառայողները, որոնք ծառայության ընթացքում իրենց լավ են դրսեւորել: Լավագույն զինվորների անուններն ԱՀԹ-ին տրամադրել է Հայաստանի Պաշտպանության նախարարությունը:  Զինվորների պագեւները կհանձնվեն հունվարի 23-ին Պատարագից անմիջապես հետո: ԱՀԹ Առաջնորդանիստ Սուրբ Սարգիս եկեղեցու խորհրդակատար Տեր ԵՍԱՅԻ քահանա ԱՐԹԵՆՅԱՆԻ խոսքով` Սուրբ Սարգսի տոնը վերջին 11 տարիների ընթացքում իրականացվող միջոցառումների շնորհիվ մեծ հետաքրքրություն է առաջացրել ժողովրդի շրջանում: Տոնով հետաքրքրված են հատկապես երիտասարդները, որի վառ ապացույցն այն է, որ տարբեր երիտասարդական կառույցներ այդ օրը կազմակերպում են միջոցառումներ`օրն ավելի բովանդակալից դարձնելով: Նրա բնորոշմամբ` Սուրբ Սարգսի տոնը հայերի համար առանձնահատուկ է, քանի որ տոնի շրջանակներում կարեւորվում ու ընդգծվում է այն զոհաբերվող սիրո խորհուրդը, որը յուրաքանչյուր հավատացյալի համար հոգեւոր կյանքի ու հոգեւոր փրկության ճանապարհին անչափ կարեւոր է.«Ժողովրդի մեջ Սուրբ Սարգիսն  առանձնահատուկ է նրանով, որ մարդիկ ավելի հաճախ իրենց դժվարությունների եւ փորձությունների մեջ ապավինել են սրբի բարեխոսությանը: Միամտություն է կարծել, թե եկեղեցին ձեւավորում է ավանդույթներ եւ դրանք պարտադրում ժողովրդին: Եթե ժողովուրդն այն չդարձնի իրեն, ապա ավանդույթը կյանք չի ունենա: 11 տարիները ցույց տվեցին, որ ժողովուրդը սիրեց այս տոնը»,-նշեց տեր Եսայի քահանա Արթենյանը: Նա նաեւ ընդգծեց, որ տոնի շրջանակներում իրականցվող բոլոր միջացառումներով փորձում են տոնն այնքան մոտեցնել մարդկանց, որ նրանցից յուրաքանչյուրն իրեն տոնի սեփականատեր զգա:

ԶՎԱՐԹ ԽԱՉԱՏՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝