ԳՅՈՒՄՐՈՒ ՔԱՂԱՔԱՊԵՏԵՐԸ ՉԵՆ ՀԱՎԱՏՈՒՄ, ՈՐ ԻՇԽԱՆՈՒԹՅՈՒՆԸ ՍԱՏԱՐԵԼՈՒ Է ՄԱՐՏՈՒՆ ԳՐԻԳՈՐՅԱՆԻՆ

ԳՅՈՒՄՐՈՒ ՔԱՂԱՔԱՊԵՏԵՐԸ ՉԵՆ ՀԱՎԱՏՈՒՄ, ՈՐ ԻՇԽԱՆՈՒԹՅՈՒՆԸ ՍԱՏԱՐԵԼՈՒ Է ՄԱՐՏՈՒՆ ԳՐԻԳՈՐՅԱՆԻՆ

Այս տարի սեպտեմբերին Գյումրիում տեղի են ունենալու  քաղաքապետի ընտրություններ: «Իրավունք»-ը Գյումրու քաղաքապետ Սամվել Բալասանյանից  պարզեց` առաջադրելո՞ւ է իր թեկնածությունը քաղաքապետի ընտրություններում: «Ծրագրեր կան իրականացնելու, հետեւաբար պետք է մասնակցենք ընտրություններին: Անգամ ասֆալտապատման երեք տարվա ծրագիր կա, այնպես որ ոնց կարող ենք չմասնակցել»,- ասաց   քաղաքապետը:

Անդրադառնալով այն լուրերին, թե իշխանությունը Գյումրու քաղաքապետի պաշտոնում ցանկանում է Մարտուն Գրիգորյանին տեսնել եւ նրան էլ սատարելու է, Սամվել Բալասանյանն ասաց.

- Դե լավ էլի,  մի հավատացեք էդ աբսուրդի հասնող լուրերին:

- Այսինքն` իշխանությունը ձեզ է սատարելու, ոչ թե Գրիգորյանին:

- Ես չգիտեմ` ում կպաշտպանի:  Տենց հարցեր մի տվեք: Դուք ասացիք` ինձ վերաբերող հարց եք տալիս... Գնացեք իշխանությանը հարցրեք: Ուրիշ հարցեր ունե՞ք ինձ հետ կապվա:

- Այո: Մարտուն Գրիգորյանի տարեդարձին մասնակցելու հրավիրատոմս եք ստացել, բայց չեք մասնակցել նրա ծննդյան արարողությանը: Ինչո՞ւ:

- Ես  շատ կարեւոր գործ ունեի Երեւանում, դրա համար էլ չեմ մասնակցել:

Իսկ ահա Գյումրու նախկին քաղաքապետ Վարդան Ղուկասյանը, «Իրավունք»-ի հետ զրույցում պատասխանելով  հարցին` կմասնակցի  այս տարի սեպտեմբերին Գյումրիում  տեղի ունենալիք քաղաքապետի ընտրություններին, ասաց. «Ես ասել եմ` քաղաքականությամբ չեմ զբաղվում, էդպիսի ցանկություն չունեմ: Բայց այսպիսի խոսք կա` երբեք մի ասեք երբեք: Կգա ժամանակը, կտեսնենք: Բայց հիմա ցանկություն չունեմ»:

Ինչին է սպասում Վարդան Ղուկասյանը, ինչը կարող է դրդել  նրան` կայացնելու վերջնական որոշում: «Աշխարհ է, երկիր է, մարդ է, իսան է: Հիմա ցանկություն չունեմ, փաստ է»,- պատասխանեց նախկին պաշտոնյան:

Ի դեպ, պրն Ղուկասյանը նաեւ հավաստի չի համարում այն խոսակցությունները, թե իշխանությունը Գյումրու քաղաքապետի պաշտոնում ցանկանում է տեսնել Մարտուն Գրիգորյանին:

ՍՈՆԱ ԴԱՎԹՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝