«ԽՈՐՀՈՒՐԴ ՉԻ ՏՐՎՈՒՄ ԻՆՔՆՈՒՐՈՒՅՆ «ՏԱՄԻՖԼՅՈՒ» ԳՆԵԼ ԵՎ ԸՆԴՈՒՆԵԼ

-Ասոյանը ինֆեկցիոնիստ է, ոչ թե համաճարակաբան, եւ նա չի կարող ստույգ թվեր ասել համաճարակային իրավիճակի մասին: Ես պաշտոնապես հայտարարում եմ՝ Հայաստանում համաճարակ չկա, իրավիճակը վերահսկվում է, խուճապի պատճառներ չկան:

- Բայց կան նաեւ մահվան դեպքեր:

- Մահվան դեպքերը 7-ն են` 3-ը` 2015-ի վերջին, 4-ը` այս տարվա ընթացքում: Նրանք բոլորը վարակված են եղել H1N1-ով:

«Խոզի գրիպ» կոչվածն ընդամենը գրիպի տարատեսակ է, որն ընթանում է նույն ախտանշաններով, ինչը հատուկ է գրիպ հիվանդությանը եւ ենթակա է նույն բուժմանը: Պարզապես՝ այս դեպքում հիվանդությունը շատ արագ է զարգանում: Եթե այն սուր դրսեւորում ունի, ուրեմն պետք է բուժումը նույնպես վաղ փուլում կատարվի` հետագա բարդություններից խուսափելու համար: Գրիպի մյուս տարատեսակներն էլ նույնքան վտանգավոր են խոցելի խմբերի մարդկանց համար: Այնպես որ՝ «խոզի գրիպը» մյուս տարատեսակներից առանձնացնել պետք չէ, եւ նույն լրջությամբ պետք է վերաբերվել գրիպի բոլոր տեսակի շտամերին ու տարատեսակներին: Հիվանդության բարդացման պատճառներից մեկն էլ այն է, որ մարդիկ ծայրահեղ վիճակում են դիմում բժշկի: Թեեւ՝ շատ վարակվածներ անգամ տնային պայմաններում են առողջանում՝ առանց դեղորայքային բուժման: Նշեմ նաեւ, որ H1N1-ի դեմ «Տամիֆլյու» դեղամիջոցը հանրապետության հիվանդանոցներում անվճար է տրամադրվում հիվանդներին:

ՆԱԽԱՐԱՐՈՒԹՅՈՒՆԸ ԴԻՄԵԼ ՏՄՊՊՀ-ԻՆ

-Ո՞ր դեպքում է արդեն անհրաժեշտ «Տամիֆլյու» ընդունել:

- Նորից ասեմ, որ Հայաստանի բոլոր հիվանդանոցներն ապահովված են հակահարուցիչային «Տամիֆլյու» դեղամիջոցով, որը սովորաբար օգտագործվում է գրիպի բուժման դեպքում: Անհրաժեշտության դեպքում եւ համապատասխան ցուցումների առկայության պարագայում՝ ստացիոնար բուժում ստացող հիվանդներն անվճար ստանում են այդ դեղամիջոցը: Պոլիկլինիկաներն իրենց հերթին ունեն «Կագոցել», «Ավիկլովիր» եւ այլ հակահարուցիչային դեղամիջոցներ, ինչպես նաեւ հակաբիոտիկներ եւ C վիտամին: Այս ամենը նրանք անհրաժեշտության դեպքում կտրամադրեն գրիպով եւ սուր շնչառական վարակներով հիվանդներին: «Տամիֆլյուն» գրիպի բուժման պրոֆիլակտիկ դեղամիջոց չէ, եւ դրա նշանակման համար լուրջ հիմքեր ու անալիզների արդյունքներ են անհրաժեշտ: Այդ պատճառով՝ խորհուրդ չի տրվում ինքնուրույն «Տամիֆլյու» գնել եւ ընդունել, առանց բժշկի հետ խորհրդակցելու. դա բուժման համար խմելը սխալ է:

- Այդ դեպքում ինչո՞վ կբացատրեք «Տամիֆլյուի» կրկնակի թանկացումը դեղատներում:

- Առողջապահության նախարարությունը արդեն այդ հարցով դիմել է Տնտեսական մրցակցության պաշտպանության պետական հանձնաժողովին ¥ՏՄՊՊՀ¤, որպեսզի ուսումնասիրություններ կատարվեն: Որ սուր շնչառական վարակների աճով պայմանավորված՝ որոշ գործարարներ չփորձեն իրենց ապրանքը դեղատներում թանկացնել:

ՏՄՊՊՀ-ից էլ մեզ տեղեկացրին, որ «Տամիֆլյուի» հետ կապված ուսումնասիրությունները դեռ ընթացքի մեջ են: Փորձեցինք կապվել նաեւ Արա Ասոյանի հետ՝ պարզելու համար, թե ըստ նրա` ի վերջո, ներկայումս համաճարակ կա՞, թե` ոչ: Սակայն վերջինս մեր բազմաթիվ զանգերն այդպես էլ անպատասխան թողեց:

ԻԼՈՆԱ ԱԶԱՐՅԱՆ

Հավանեցի՞ր հոդվածը, կիսվիր ընկերներիդ հետ՝

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝