ԵՐԵՎԱՆՅԱՆ ԹԱՏՐՈՆՆԵՐՈՒՄ ԱՄԱՆՈՐՅԱ ԵՌՈՒԶԵՌԸ ՍԿՍՎԱԾ Է

ԵՐԵՎԱՆՅԱՆ ԹԱՏՐՈՆՆԵՐՈՒՄ ԱՄԱՆՈՐՅԱ ԵՌՈՒԶԵՌԸ ՍԿՍՎԱԾ Է

Երեւանյան գրեթե բոլոր թատրոններն այս տարի հավուր պատշաճի են պատրաստվել Ամանորին: Թերեւս ամենախստապահանջ հանդիսականի սիրտը շահելու համար հայ բեմադրիչները, ինչպես ասում են, ջանք ու եռանդ չեն խնայել: Իսկ դերասաններն առավել եւս` օրեկան խաղում են 2-4 ներկայացում: Ամանորյա շնչով ողողված ներկայացումները սկսվել են դեկտեմբերի 19-ից մինչեւ 29-ը եւ կշարունակվեն 2016 թվականի հունվարի 3-7-ը:

Հրաչյա Ղափլանյանի անվան դրամատիկական թատրոնում փոքրիկների ուշադրությանը կներկայացվի անգլիական հեքիաթի մոտիվներով Գրիգոր Խաչատրյանի բեմադրած` "ԱՐՔԱՅԱԴՈՒՍՏՐՆ ՈՒ ՃԱԳԱՐԻԿԸ" ներկայացումը` համեմված The Beatles քառյակի երաժշտությամբ:

Կ. Ստանիսլավսկու անվան ռուսական դրամատիկական թատրոնում` երիտասարդ բեմադրիչ Նորա Գրիգորյանի ռեժիսուրայով կներկայացվի "ՄՈԽՐՈՏԸ": Ներկայացումից առաջ փոքրիկներին հյուր կգան Ձմեռ պապը, Ձյունանուշն ու հեքիաթի այլ սիրված հերոսներ:

Հ. Պարոնյանի անվան երաժշտական կոմեդիայի թատրոնում բեմ կբարձրանա "ՁԱԽՈՐԴ ՓԱՆՈՍԻ ՆՈՐ ԱՐԿԱԾՆԵՐԸ": Ամանորյա երաժշտական ուրախ ներկայացման ռեժիսորն է Անուշ Սարգսյանը:

Պատանի հանդիսատեսի թատրոնի բեմում կներկայացվի Է. Զոհրաբյանի պիեսը`"Ա՜Խ, ԱՅԴ ՎՀՈՒԿԸ"` թատրոնի գեղարվեստական ղեկավար Հակոբ Ղազանչյանի ռեժիսուրայով: Հեքիաթի մասնակից կլինեն Ձմեռ պապն ու Ձյունանուշը:

"Փոքր" թատրոնը` Վահան Բադալյանի մտահղացմամբ ինտերակտիվ ներկայացում կցուցադրի` "ՍՊԻՏԱԿ ԱՄԱՆՈՐ" անվամբ: Փոքրիկներն ու մեծիկներն անձամբ են շփվելու հեքիաթի հերոսների հետ, եւ Ձմեռ պապին հասնելու համար կհաղթահարեն մի շարք փորձություններ:

Կամերային երաժշտական թատրոնում կցուցադրվի Սամսոն Ստեփանյանի բեմադրած "ԵՐԵՔ ԽՈԶՈՒԿՆԵՐԻ ԱՄԱՆՈՐՅԱ ԱՐԿԱԾՆԵՐԸ". սցենարի եւ երաժշտության հեղինակը Վահե Հայրապետյանն է:

Մհեր Մկրտչյան արտիստական թատրոնում ռեժիսոր Արսեն Գրիգորյանը բեմադրել է "ԱՄԱՆՈՐՅԱ ՃԱՄՓՈՐԴՈՒԹՅՈՒՆ" ներկայացումը: Փոքրիկներին անձամբ կշնորհավորեն Ձմեռ պապն ու Ձյունանուշը:

Նարինե Մալյանի բեմադրած "ԱՄԱՆՈՐՅԱ ԹԱՏԵՐԱԿԱՆ ՀԱՆԴԵՍԻ" մասնակից կարող եք դառնալ Հենրիկ Մալյանի անվան կինոդերասանի թատրոնում: Իսկ

Խամաճիկների թատրոնում կցուցադրվի Մ. Մետերլինկի "ԿԱՊՈՒՅՏ ԹՌՉՈՒՆԸ": Ներկայացման բեմադրիչն է Նարե Հովհաննիսյանը, բեմադրության գեղարվեստական ղեկավարը` Լիլի Էլբակյանը:

Հայաստանի երգի պետական թատրոնը հրավիրում է. փոքրիկները ներկա կգտնվեն Արթուր Գրիգորյանի ամանորյա "ԿԱԽԱՐԴԱԿԱՆ ԴԱՇՆԱՄՈՒՐ" մանկական մյուզիքլին:

Խորեոգրաֆիայի պետական թատրոնը փոքրիկների դատին կհանձնի "ՃՊՈՒՌԻԿՆԵՐՆ ՈՒ ՄՐՋՅՈՒՆՆԵՐԸ" մանկական երաժշտական հեքիաթը` Վիգեն Ստեփանյանի բեմադրությամբ:

Ի դեպ, տոմսերի արժեքը տատանվում է 600-1500 դրամի սահմաններում:

Վ. ՄՈՒՐԱԴՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝