«ՀԱՅԱՍՏԱՆԸ` ՈՐՊԵՍ ԵՏՄ ԱՆԴԱՄ, ՀՆԱՐԱՎՈՐ Է, ՈՐ ԻՐ ՀԵՐԹԻՆ ՍԱՆԿՑԻԱՆԵՐ ԿԻՐԱՌԻ ԹՈՒՐՔԻԱՅԻ ՆԿԱՏՄԱՄԲ»
Արխիվ 12-16
«ՀԱՅԱՍՏԱՆԸ` ՈՐՊԵՍ ԵՏՄ ԱՆԴԱՄ, ՀՆԱՐԱՎՈՐ Է, ՈՐ ԻՐ ՀԵՐԹԻՆ ՍԱՆԿՑԻԱՆԵՐ ԿԻՐԱՌԻ ԹՈՒՐՔԻԱՅԻ ՆԿԱՏՄԱՄԲ»
«2015 թվականը գյուղատնտեսության համար դրական ձեռքբերումների տարի էր»,- ամփոփելով արդեն անցնող գյուղատնտեսական տարվա ձեռքբերումները` մեզ հետ զրույցում նման տեսակետ հայտնեց ԱԺ Գյուղատնտեսության եւ բնապահպանության հարցերի մշտական հանձնաժողովի նախագահ, պատգամավոր ՄԱՐՏՈՒՆ ԳՐԻԳՈՐՅԱՆԸ՝ նկատելով.
Այս տարի գյուղատնտեսության ոլորտում ունենք բավականաչափ ձեռքբերումներ: Ընդհանուր առմամբ՝ դրական եմ գնահատում տարին, եղանակային պայմաններն էլ մեր կողմից էին, նաեւ ոռոգման ջրի հետ կապված խնդիրներ չունեցանք:
Աննախադեպ էր խաղողի բերքը, ճիշտ է իրացման առումով մի փոքր խնդիր ունեցանք, բայց ամեն դեպքում, այն կարգավորվեց: Ինչպես գիտեք, այս տարի մեր հանձնաժողովը այցելեց Չեխիա, եւ տեղում քննարկեցինք գյուղատնտեսության ոլորտին հետաքրքրող հարցերը, ներկայացվեցին խաղողի հետ կապված մեր խնդիրները, տեղեկացանք, որ իրենք զարկ են տվել գինեգործությանը: Այդ իսկ առումով նշեցին, որ իրենք ունեն խաղողի պահանջարկ եւ պատրաստ են այս ոլորտում համագործակցել: Այս մասին ես տեղեկացրել եմ Գյուղատնտեսության նախարարությանը, եւ եթե լուրջ աշխատանքներ տարվեն, հնարավոր է, որ եկող տարի մենք այլես խաղողի իրացման խնդիր չունենանք, հանձին Չեխիայի Հանրապետության` ձեռք բերենք իրացման նոր շուկա, եւ գյուղացիներին ավելի նորմալ պայմաններում հնարավորություն տանք աշխատելու եւ զարգացնելու գյուղատնտեսության ոլորտը:
- Իսկ ո՞րն էր գյուղատնտեսության ոլորտի այս տարվա հիմնական խնդիրը: Ի վերջո՝ տարվա ընթացքում քիչ չէին գյուղացիների բողոքները, որ բերքն աճեցրել են, բայց վաճառելու ճար չունեն:
- Հիմնականը ես համարում եմ հենց իրացման շուկայի խնդիրը, քանի որ գյուղացիներին, այսպես ասած, հետ պահողը իրացման դժվարություններն են: Հենց դրանով է պայմանավորված, որ գյուղատնտեսության ոլորտը շատ առաջ չի գնում. գյուղացին տալիս է արտադրանք, բայց իրացման խնդիրների հետ բախվում էառաջին տարին ու երկրորդ տարին այլեւս չի զբաղվում գյուղատնտեսությամբ: Եթե մենք կարողանանք կարգավորել իրացման շուկան, գյուղացին այլեւս իրացման խնդիր չի ունենա, այս պարագայում գյուղատնտեսությունը Հայաստանում լուրջ զարգանալու շանս ունի:
-Մեկ այլ նախաամանորյա ավանդական հարց. ի՞նչ ակնկալիքներ ունեք 2016 թվականին գյուղատնտեսության ոլորտում:
- Կարծում եմ` գյուղատնտեսության ոլորտը թե՛ կառավարության, թե՛ ԱԺ-ի լուրջ ուշադրության կենտրոնում է: Այստեղ ակնկալիքն այն է, որ հույս ունենանք, որ եղանակային պայմանները բարենպաստ կլինեն, իսկ 2016 թվականի ընթացքում` մինչեւ բերքահավաքը, կառավարությունը, պետությունը տարբերակներ, ճանապարհներ կփնտրի` գյուղացիներին իրացման շուկաներով ապահովելու համար, որպեսզի գյուղացին այլեւս փաստի առաջ չկանգնի:
«ՀՆԱՐԱՎՈՐՈՒԹՅՈՒՆ ՈՒՆԵՆՔ` ԷԼ ԱՎԵԼԻ ԸՆԴԼԱՅՆԵԼՈՒ ՄԵՐ ԴԻՐՔԵՐԸ ՌՈՒՍԱԿԱՆ ՇՈՒԿԱՅՈՒՄ»
-Շուկայի լավ տարբերակ կա. Ռուսաստանը վերջերս արգելեց թուրքական պտուղ-բանջարեղենի մուտքը ՌԴ: Այդ շանսն օգտագործել է պետք:
- Եթե այս պատժամիջոցները շարունակվեն մինչեւ եկող տարի, մեզ լուրջ հնարավորություն կընձեռվի` առավել մեծ թափով մտնելու ռուսական շուկա: Մենք այսօր էլ կանք ռուսական շուկայում, բայց թուրքական ապրանքի հետ մրցակակցելու առումով միշտ խնդիր ենք ունեցել: Պատճառն էլ պարզ է. թուրքական ապրանքն ավելի էժան ու մատչելի է: Եվ քանի որ այսօր թուրքական ապրանքների մուտքը ՌԴ արգելված է, մենք այստեղ հնարավորություն ունենք էլ ավելի ընդլայնելու մեր դիրքերը, ինչը մեր տեղական արտադրությունն աշխուժացնելով՝ նաեւ կնպաստի թուրքականի համեմատ` հետագայում ավելի մրցունակ դառնալուն: Կարծում եմ, որ այս հանգամանքը հաշվի է առել նաեւ գյուղացին, որ մեծ շուկա է բացվել: Դրանով պայմանավորված` հույս ունեմ, որ գյուղացիները եկող տարի ավելի մեծ ջանքեր կներդնեն գյուղատնտեսության ոլորտում: Եվ պետությունը, հաշվի առնելով այս հանգամանքը, պետք է փորձի հնարավոինս նպաստել արտահանման կազմակերպմանն ու ընդլայնմանը:
- Մեր շուկան եւս ողողված է թուրքական լոլիկով, վարունգով եւ այլ ապրանքներով: Ի՞նչ է պետք անել, որպեսզի հնարավորինս ետ մղենք մեր շուկայից թուրքական արտադրանքը: Թեեւ կան խոսակցություններ, որ ռուսական արգելքից հետո Հայաստան եւս թուրքական գյուղմթերքներ շատ քիչ են գալիս:
- Այս պահի դրությամբ մենք ունենք բազմաթիվ միջազգային պայմանագրեր եւ չենք կարող հենց այնպես որոշել եւ ապրանքներ չընդունել: Բայց ինչ խոսք, դա իրոք խնդիր է, որը եղել է միշտ: Ամեն դեպքում, հիմա ճիշտ է սպասելը, տեսնենք, թե ինչ հանգուցալուծում կստանան ռուս-թուրքական հարաբերությունները, եւ Հայաստանը` որպես ԵՏՄ անդամ, հնարավոր է, որ իր հերթին որոշակի սանկցիաներ կիրառի Թուրքիայի նկատմամբ: Գուցե եկող տարի հենց այդ առումով էլ ունենանք ձեռքբերում:
ԻԼՈՆԱ ԱԶԱՐՅԱՆ
Բաժանորդագրվե՛ք https://t.me/iravunk
1
15150 դիտում
2
10816 դիտում
3
2287 դիտում
4
2141 դիտում
5
1469 դիտում
1
17623 դիտում
4
8026 դիտում
5
4047 դիտում
4
8257 դիտում
