«ԱՄՆ ԴԵՍՊԱՆԱՏՈՒՆԸ ԵՌԱՍՏԻՃԱՆ ԵՐԵՍՊԱՇՏԱԿԱՆ ԲԱՆԵՐ Է ԽՈՍՈՒՄ»
Արխիվ 12-16
«ԱՄՆ ԴԵՍՊԱՆԱՏՈՒՆԸ ԵՌԱՍՏԻՃԱՆ ԵՐԵՍՊԱՇՏԱԿԱՆ ԲԱՆԵՐ Է ԽՈՍՈՒՄ»
Սահմանադրական բարեփոխումների հանրաքվեից անմիջապես հետո Հայաստանում ԱՄՆ դեսպանատունը հանդես եկավ ընտրակեղծարարներին հայտնաբերելու պահանջով` ակնարկելով մինչեւ իսկ պատժամիջոցներ կիրառելու մասին: Լավ էլ արեց, կեղծարարներին պետք է պատժել: Միայն թե... Նոյեմբերի 1-ին Ադրբեջանում տեղի ունեցան խորհրդարանական ընտրություններ, որոնք անգամ արեւմտյան բազում կառույցներ դեռ նույնիսկ նախընտրական փուլում որակեցին` անգամ ադրբեջանական կտրվածքով, աննախադեպ խայտառակ: Բայց ահա նույն ԱՄՆ-ի արդեն ադրբեջանական դեսպանը, էլ չասած` շատ ավելի բարձրաստիճան ամերիկյան պաշտոնյաներ, ձեւի համար հազիվ մի թեթեւ կնճռոտվեցին` Բաքվին առաջարկելով ջերմ համագործակցություն: Եվ դրանից հետո, ինչքան էլ համաշխարհային դեմոկրատիայից խոսես, մեկ է` երկակի ստանդարտներն ակնհայտ են: Ուրեմն` ինչո՞վ է սա բացատրվում: Այս հարցի շուրջ «Իրավունքը» զրուցեց մի շարք ճանաչված գործիչների հետ:
ԱԺ ՀՀԿ պատգամավոր ՄԿՐՏԻՉ ՄԻՆԱՍՅԱՆԻ խոսքով` ԱՄՆ դեսպանատունը զբաղված է պարզապես երեսպաշտությամբ եւ իրականացնում է քաղաքական պատվեր. «Հայտարարության առաջին մասին վերաբերում եմ բացասական, կարծում եմ ԱՄՆ դեսպանատունը չունի ուսումնասիրություններ: ՀՀ նախագահը եւ վարչապետն արդեն հայտարարել են, որ եթե կոնկրետ փաստեր ներկայացնեն ընտրակեղծարարների մասին, ապա մեղավորները կպատժվեն ըստ օրենքի: Այնպես որ, այստեղ խնդիր չկա, մենք նույնպես դրա կողմանակիցն ենք: ԱՄՆ դեսպանատունը եռաստիճան անտրամաբանական բաներ է խոսում: Հասկանում եմ, որ մեծ քաղաքականությունը, առավել եւս` ամբողջապաշտական զգացմունքները, ցանկությունները միաբեւեռ երկրագնդի պայմաններում ԱՄՆ-ին հաջողվում է իրականացնել: Մենք նրա համար ենք, որպեսզի ցույց տանք անարդարության բացահայտ ճիչերը: Սարսափելի է, երբ մարդիկ կարող են իրենց թույլ տալ` որտեղ ասես, ինչ կարգ ասես հաստատել, միայն թե նավթի գլխին իրենք կանգնեն: Աբսուրդ է սա»:
ՍԴՀԿ Հայաստանի վարչության ատենապետ ՆԱՐԵԿ ԳԱԼՍՏՅԱՆԸ փաստեց, որ Ամերիկայի հետ միասին երկակի ստանդարտներով են զբաղված նաեւ աշխարհի այլ գերտերություններ, երբ խոսքը վերաբերում է սեփական շահերին. «Կարծում եմ` Հայաստանն ինքն իր մեջ պետք է քաղաքական կամք եւ ուժ գտնի, որպեսզի բոլոր ընտրակեղծարարներին ուղարկի ճաղերից այն կողմ: Այս պահին աշխարհի բոլոր գերտերությունները պետք է ավելի շատ զբաղված լինեն սահմանում տեղի ունեցող միջադեպերի կանխարգելմամբ, քանի որ ամեն օր այնտեղ տեղի է ունենում ողբերգություն, ինչը նաեւ անպատժելիության մթնոլորտի արդյունք է: Իսկ նույն ամերիկացիները Մինսկի խմբում ունեն այն մանդատը, որով կարող են սանձել սահմանից այն կողմ գտնվող մեր թշնամուն»:
Գրող, հրապարակախոս ՄԵՐՈՒԺԱՆ ՏԵՐ-ԳՈՒԼԱՆՅԱՆԸ նշեց, որ չի կիսում ԱՄՆ դեսպանատան տեսակետը. «Անհնար է, որ Ադրբեջանում տեղի ունենան ժողովրդավարական ընտրություններ, ինչի մասին ամբողջ աշխարհը գիտի: Այստեղ մի շարք խնդիրներ գոյություն ունեն, հատկապես` Հայաստանի` ԵՏՄ-ին անդամակցելու հետ կապված: Ճիշտ է` ԱՄՆ-ը միշտ էլ ասում է, որ ողջունում են Հայաստանի այդ քայլը, բայց դե գիտենք, որ այս ամենը նրա սրտով չէ: Նրանք ամեն կերպ ցանկանում են ստվեր գցել մեր ընտրությունների վրա: Իմ կարծիքով` այդ հանրաքվեն անցել է բնականոն պայմաններում, թեեւ իհարկե բոլոր ընտրություններում էլ սխալներ կան: Իսկ ինչո՞ւ միաժամանակ չեն խոսում այն խախտումներից, որը տեղի ունեցավ, երբ Բուշն էր ընտրվում ԱՄՆ-ի նախագահ: Այնպես որ, մեծ-մեծ թող չխոսեն: Ամերիկան որ երկիրը մտնում է եւ ուզում է կարգավորումներ անել, այդ երկիրը, որպես կանոն, պարզապես քանդում է: Չի կարելի մտնել մարդու տուն եւ ասել` բազմոցը սխալ տեղ է դրված կամ գրապահարանը հանիր, ուրիշ տեղ դիր: Իմ տունն է, ինչպես ուզեմ, այնպես էլ կկահավորեմ: Հայաստանն ունի իր ներքին կանոնադրությունը, եւ պետք չէ գալ մեր երկիր եւ ասել, թե ինչ պետք է անենք: Մեր գործերին թող չխառնվեն, այդ դեպքում նրանց հեղինակությունը մեր աչքում ավելի կբարձրանա: Կյանքը ցույց տվեց, որ Ամերիկայի միջամտության պատճառով այսօր Իրաքից ու Սիրիայից սկսած` կորած են արյան մեջ»:
ԶՎԱՐԹ ԽԱՉԱՏՐՅԱՆ
Բաժանորդագրվե՛ք https://t.me/iravunk
1
15150 դիտում
2
10816 դիտում
3
2287 դիտում
4
2141 դիտում
5
1469 դիտում
1
17623 դիտում
4
8026 դիտում
5
4047 դիտում
4
8257 դիտում
