ՉԱՅԿՈՎՍԿՈՒ ԱՆՎԱՆ 9-ՐԴ ՊԱՏԱՆԵԿԱՆ ՄՐՑՈՒՅԹԻՑ ՀԱՅ ՄԱՍՆԱԿԻՑՆԵՐԸ ՎԵՐԱԴԱՐՁԵԼ ԵՆ ՄՐՑԱՆԱԿՆԵՐՈՎ

ՉԱՅԿՈՎՍԿՈՒ ԱՆՎԱՆ 9-ՐԴ ՊԱՏԱՆԵԿԱՆ ՄՐՑՈՒՅԹԻՑ ՀԱՅ ՄԱՍՆԱԿԻՑՆԵՐԸ ՎԵՐԱԴԱՐՁԵԼ ԵՆ ՄՐՑԱՆԱԿՆԵՐՈՎ

Դեկտեմբերի 5-15-ը, Ռուսաստանի Դաշնության Նովոսիբիրսկ քաղաքում կայացած Պ. Չայկովսկու անվան 9-րդ պատանեկան միջազգային մրցույթում  Հայաստանը ներկայացնող ջութակահարներ ,Պ. Չայկովսկու անվան միջնակարգ երաժշտական մասնագիտական դպրոցի լարային բաժնի 11-րդ դասարանի աշակերտներ ԴԻԱՆԱ ԱԴԱՄՅԱՆՆ արժանացել է երկրորդ, ԱՆԴՐԱՆԻԿ ԱՂԱՋԱՆՅԱՆԸ` հատուկ մրցանակի:  Այս պատանի երաժիշտներն այս տարվա հուլիսին, որպես մենակատարներ, հանդես էին եկել Հայաստանի պետական երիտասարդական նվագախմբի հետ եւ մրցույթի նախընտրական փուլում հաղթելով միջազգային մրցույթի կազմկոմիտեի կողմից ստացել հրավեր, իսկ մրցույթին մասնակցել են ՀՀ մշակույթի նախարարության աջակցությամբ:

Մրցույթն անցկացվել է երեք փուլով` դաշնամուր, ջութակ, թավջութակ անվանակարգերում, որին մասնակցել են մինչեւ 17 տարեկան 130 պատանի երաժիշտ-կատարողներ, ավելի քան 23 երկրներից. Հայաստանից, Ռուսաստանից, Բելառուսից, ԱՄՆ-ից, Չինաստանից, Ճապոնիայից, Իտալիայից, Ավստրալիայից, Կորեայից, Ուկրաինայից, Ռումինիայից, Իսրայելից, Գերմանիայից, Լյուքսեմբուրգից, Ֆրանսիայից, Սերբիայից, Ավստրիայից, Ղազախստանից, Կանադայից, Դանիայից եւ այլ երկրներից:

Դաշնակահարների ժյուրին նախագահել է Մոսկվայի Պ. Չայկովսկու անվան պետական կոնսերվատորիային կից երաժշտական տասնամյակի տնօրեն, ՌԴ ժողովրդական արտիստ, պրոֆեսոր Վլադիմիր Օվչիննիկովը, ջութակահարներինը՝ ՌԽՍՀ վաստակավոր արտիստ, պրոֆեսոր Սերգեյ Կրավչենկոն, իսկ թավջութակահարներինը՝ ՌԴ ժողովրդական արտիստ, պրոֆեսոր Մարիա Չայկովսկայան:

ԼԻԼԻԹ ԵՂԻԱԶԱՐՅԱՆ

Բաժանորդագրվե՛ք https://t.me/iravunk

Հետևեք մեզ նաև տելեգրամում՝

Ներբեռնեք Iravunk հավելվածը և եղեք միշտ տեղեկացված՝